Bôk năm 1945, nau tâm lơh lam ntur neh tal bar ntơm tâm rnôk lĕ dŭt. Lơ 12/3/1945, Trung ương Đảng ntrŭnh nau rđau đă: ‘Nhật-Pháp tâm păng ndrel ƀư nau kan bah he nơm’ lah rjăp “Aơ lah rnôk ueh ngăn gay ƀon lan nơm nsĭt nau đăp mpăn”.

            Ntơm n’gul năm 1945, nau kan tâm lơh rdâng phung Nhật kơl an neh dak rêng hvi, nau kan tâm lơh chính trị tâm rgop nsum ma tâm lơh tahen, ndâk ƀư ăp gưl geh rjăp dăng tâm âk n’gor bah lam dak. Rnôk ma nau tât dơi bah cách mạng tât, lơ 13/8/1945, Uỷ ban Ndâk lơh lam neh dak geh ndâk ndrel nkre tâm nar nê lĕ ntơm ntrŭnh nau rđau đă mrô 1, ƀư nau kan ndâk lơh tâm lam dak.

            Lơ 16/8/1945, Quốc dân đại hội rƀŭn nchră ta Tân Trào nchră luh Jêt nau ntrŭnh đă têh bah Mặt trận Việt Minh, nchrăp ƀư nau ndâk lơh, leo sŏk dŏng quốc kỳ Bok chăng, mănh êr prăm nar, săch “Tiến quân ca” ƀư quốc ca, ndrel đă luh Uỷ ban Rklaih rnoi mpôl Việt Nam (lah Chính phủ ndơn nau kan cách mạng Việt Nam) yor Kruanh Hồ Chí Minh dâk bôk. Ndrel ma rnôk nê Wa njoăl săm ƀŭt kuăl jă lam ƀon lan, lah rjăp: “Mông ntrŭnh kơl ân nau geh jêng bah rnoi nơm lĕ tât. Lam rnoi mpôl sâm dâk, leo n’hâm nơm ma rklaih êng ân nơm”.

            Lơ 19/8, âk rmưn tahen ndrel ăp rmôt cách mạng tât in tâm ăp ntŭk kan tơm bôk, nsĭt n’gâng kan ân ƀon lan. Nau geh dơi tâm Hà Nội njêng nau nsôih dăng rjăp ân nau ndâk lơh bah n’gâng kan tâm lam dak. Ntơm bah nkuăl têh tât ƀon lan, ntơm bah nkuăl ba dâng tât mpeh ba lơh, ntơm bah neh kơh ân daka gôl dak-nau kan ndâk lơh dŭt n’hâm dăng. Knŭng tâm n’gul khay, nau ndâk lơh hŏ nsĭt geh nau dơi lĕ ngăn ân tâm lam dak.

            Lơ 2/9/1945, ta Quảng trường Ba Đình lịch sử, Kruanh Hồ Chí Minh răk Tuyên ngôn Độc lập, ton mbơh nau geh dơi đăp mpăn, dah rŏng, tâm ban bah rnoi mpôl Việt Nam bah năp lam ntur neh “Dak Việt Nam geh nau dơi ŭch geh dah rŏng ndrel đăp mpăn, ndrel ngăn ngên hŏ jêng du dak dah rŏng, đăp mpăn.

Lam dĭng lĕ rnoi mpôl Việt Nam, nsôih leo lĕ nuih n’hâm ndrel rmôt nŭih kan, nau rêh ndrel drăp ndơ gay ma mât nau dơi dah rŏng, đăp mpăn nê”. Dak Việt Nam Dân chủ Cộng hoà ntơm ntoh luh-nau nkah lor ân nau pơk du bông rach năm mhe bah rnoi mpôl: Rcah năm đăp mpăn, dah rŏng ndrel ƀư tơm bah neh dak.

            Nkah gĭt 81 năm Cách mạng khay 8 geh nau dơi ndrel Quốc khánh 2/9 lah rnôk gay lam Đảng, lam ƀon lan ndrel lam tahen nơm nkah tay nau geh dơi têh dăng bah rnoi mpôl; nkah gĭt nuih n’hâm nau kan têh dăng bah Kruanh Hồ Chí Minh, ăp rơh hăn lor bah cách mạng, nŭih janh dăng, tahen lĕ khĭt ndrel kônh wa ƀon lan nơm lĕ khĭt yor nau đăp mpăn, dah rŏng bah neh dak. Nau ntô̆ n’hao ơm nê, ăp nŭih Việt Nam lŏ bun dăp nau ŭch rŏng sak, nau nsôih êng, ƀư êng, ƀư ueh nuih n’hâm tâm rnglăp lam rnoi mpôl, nsôih mât neh dak ndrel ndâk njêng neh dak nâp nâl, ueh lăng, đăp mpăn./.