Bah năp huêng khlay bah Kruanh Hồ Chí Minh, Tổng Bí thư, Kruanh dak Tô Lâm ndrel ăp nuĭh hŏ n’guh mbah mpoh nhang mpơl nuih n’hâm nkah gĭt jru đah Kruanh Hồ Chí Minh, kruanh têh kuâng bah ƀon lan Việt Nam; nuĭh kan ngăch prăl bah trong leo cộng sản n’hanh công nhân lam ntŭr neh.

Wa hŏ n’groh an lĕ nău gĭt blău, n’hâm suan du bông nău rêh an n’gâng kan rklaih luh rnoi nuĭh, rlăch ndăng an bah tâm lơh tâm su n’hanh rhơn răm bah rnoi nuĭh Việt Nam n’hanh ƀon lan lam ntŭr neh. Ăp têl ơm yău, ndơ hôm mât ndray, siƀŭt ơm dôl dơi pla n’hơ ta Nkual têl ơm yău Kruanh Hồ Chí Minh ta Nhih pah kan kruanh dak lah ăp ndơ an saơ n’grêh rêh n’hanh dŭt ngăn ngăn, an saơ nău rêh, n’gâng kan, nău mĭn, nuih n’hâm uĕh lŏng n’hanh trong gŭ rêh Wa Hồ. Aƀaơ, ăp siƀŭt ơm, ndơ hôm mât prăp mpeh Wa ta aơ hôm dơi mât ndray na nê̆, rgop rhŏ dŏng âk mpưm lam nuĭh uănh saơ, gŭ mĭn, kơt nti mpeh nău rêh, nău kan, nău mĭn, nuih n’hâm uĕh lŏng n’hanh trong gŭ rêh Hồ Chí Minh.