Năm nti mhe aơ, Y Hiển Nhi, kon bu ur nô A Trang, ƀon Kram, xã Rờ Kơi, n’gor Quảng Ngãi lăp nti jrâu 1B ngih săm ƀŭt Phổ thông nội trú rep gưl Tiểu học-Trung học cơ sở xã Rờ Kơi. Bar pơh rlau aơ, ăp nar mon kŏ hăn tât ngih săm ƀŭt gay ma mơng ma ngih săm ƀŭt mhe. Ăp nar bôk năp ri ê lăng mơng, geh nai ntĭm nti mbơh, ntĭm, Y Hiển Nhi mơng oi đŏng đah ngih săm ƀŭt mhe.

  Ur sai nô A Trang, ƀư mir tât lôch nar ri ma nau kan leo njŭn kon kŏ lah du nau rvê. Năm nti mhe aơ, nô A Trang đăp mpăn lơn rnôk Ngih săm ƀŭt Phổ thông nội trú rep gưl Tiểu học-THCS xã Rờ Kơi ƀư ntĭm nti lôch du nar, mô lah gŭ nkre nội trú ri ma nau ntĭm nti, rêh jêng ndrel leo njŭn kon mra nơih ueh lơn:  ‘Ta aơ ƀon lan hăn kan lôch ma nar jêr jŏt ngăn, geh rnôk mông dĭng nar mô geh mông ma hăn vơt kon ơm. Lah dơi geh nti gŭ dĭng nar nkre ri nơih ueh ngăn ân me mbŏ kon se, yor nau kan ta aơ knŭng mô knŭng pah kan ma jâng ty, ma lôch nar hăn pah kan ngai, mô dơi geh vơt kon ơm. Me mbŏ kŏ rhơn ngăn rnôk ma ngih săm ƀŭt geh ndâk nâp ueh, jêh ri mpông mpêr geh nâp nâl. Ngih dak kơl an tâm nkuăl n’har bri aơ, me mbŏ rhơn ngăn. Ŭch ngăn jêh aơ ăp kon nơm mra nsôih geh dơi, ntĭm nti ân blau”.

Năm nti 2026-2027, Ngih săm ƀŭt Phổ thông nội trú rep gưl Tiểu học-Trung học cơ sở xã Rờ Kơi geh 1.156 kon se nti, geh pă 34 jrâu nti, geh 20 jrâu ntơm 1-5 ndrel 14 jrâu ntơm 6-9. Ăp nau kan mpeh ntŭk gŭ sa, ntŭk bĭch, đăp mpăn, njrăng rdâng rtoh ŭng sa ndrel đăp mpăn ndơ ngêt sa kloh geh nchrăp tă bah ơm. Ngih săm ƀŭt ƀư ntĭm nti ân cán bộ, nau ntĭm, nŭih kan mpeh nau mât, chăm ân kon se nội trú, bán trú.

 Ngih săm ƀŭt Phổ thông Nội trú rep gưl Tiểu học-THCS xã Mô Rai dôl tâm rnôk ƀư jêh, ê dơi dŏng tâm rnôk lăp năm nti mhe. N’gor rgum lam ntrong kan chính trị ndrel ăp rmôt dân quân, tahen Biên phòng ndrel Công ty 78, Binh đoàn 15 kơl an ƀư ân jêh ăp nau kan hôm e. Ăp nar geh nklăp 30 nŭih kan râng rep, kơl an ăp nau kan gay ƀư ân ma ngăch jêh.

 Yor ngih săm ƀŭt ê dơi geh lăp dĭng, kon se nti ntơm jrâu 1-9 hôm nti tâm ngih săm ƀŭt ơm, đăp mpăn nau nchrăp năm nti mhe. Ăp jrâu bôk gưl nti geh ƀư vơt kon se tĭng tâm di nau ntrŭnh. Wa Trương Công Chính, Bí thư Đảng uỷ xã Mô Rai mbơh, tât rnôk aơ, rmôt cán bộ mât nau kan ndrel nai ntĭm kon se bah ngih săm ƀŭt geh tŏng nâp.

Tâm rơh bôk năp, n’gor Quảng Ngãi ndâk dŏng geh 4 ngih săm ƀŭt Phổ thông nội trú rep gưl tâm ăp xã Dục Nông, Sa Long, Rờ Kơi ndrel Mô Rai tâm lơ 5/9/2026. N’gâng kan ntĭm nti n’goê Quảng Ngãi tâm rgop ma ăp nkuăl kơp, pă mrôt cán bộ mât kan, nai ntĭm nti, nŭih pah kan, ƀư jêh nau leo lăp nti, ntĭm nti, pă ntŭk gŭ sa ndrel mât chăm ân kon se nti. Ăp ndơ dŏng nti, ngih ŭnh, thư viện, jrâu nti...mra leo lăp dŏng ueh ntơm bôk năm nri mhe.

Wa Nguyễn Ngọc Thái, Giám đốc N’gâng kan ntĭm nti n’gor Quảng ngãi mbơh, n’gor geh 9 ngih săm ƀŭt geh Trung ương ntuh kơl, geh 4 ngih săm ƀŭt tâm rơh 1 ndrel 5 ngih săm ƀŭt tâm tơh 2, rnoh prăk nth kơl bơi tât 2000 rmen prăk: ‘Aơ lah nau ntrŭnh tâm di ngăn ndrle tâm dăch ngăn, mô knŭng kơl an nau kan ntĭm nti ma hôm geh tât nau mât đăp mpăn, nâp nâl, đăp mpăn mât neh dak, mât nkuăl n’har bri. N’gâng kan ntĭm nti n’gor Quảng Ngãi hŏ kơl mbơh nchra ưnau ma UBND n’gor Quảng Ngãi rgum ăp tu tơm kan, n’hao nŭih kan, nsôih ƀư jêh ăp nhoat geh kơp uănh tay ăp nau ntrŭnh ƀư bah săm ƀŭt ndrel leo lăp dŏng tâm năm nti mhe tâm di nau ntrŭnh bah n’gor”.

 Ntơm bah Rờ Kơi tât Mô Rai, Sa Long, Dục Nông, n’gor Quảng Ngãi, ăp ngih săm ƀŭt mhe dôl ma jêh tâm nkuăl n’har bri, leo tât nau rhơn ndrel nau mpŏng bah kon se nti, me mbŏ kon se ndrel nai ntĭm nti. Rnôk kon se geh hăn nti tŏng ăp, nŭih ƀon lan đăp mpăn mât nâp neh ntu, mât nâp ƀon lan, hun hao văng sa, mât nâp nkuăl n’har bri bah neh dak./.