Ndăn rnôk rlu dĭng nar, Trung tá Y Dhăm Byă, Groi Kruanh Công an xã Quảng Phú, n’gor Dak Lak hăn tât ƀon Ea Măp. Nô tât ngih bu ranh Y Lưng Êban, nŭih bu rnơm ndrel kŏ lah Kruanh rmôt mât nau đăp mpăn tâm ƀon, gay ma tâm nchră nau kan, gĭt nau kan tâm dâng bah năp nar lễ Quốc khánh.

            Rlau du năm ma aơ, ăp nau tâm mâp kơt nê geh mro. Mô kâp tât ăp nar duh, Trung tá Y Dhăm ndrel bu ranh Y Lưng mât nau tâm nkoch mbơh nau gay ma năn gĭt ăp nau kan tâm ƀon. Bu ranh Y Lưng nkoch:

            ‘Nô Y Dhăm tâm dăhc ngăn ma ƀon, ngăn lah ntơm rnôk jêh tâm rnglăp ndrel ƀư n’gâng kan 2 gưl. Nô ƀa ƀơ lăp tâm ƀon djăt nau kan, ngăn lah tâm ăp ntŭk bu rƀŭn chroh ăp ntil, djăt nau kan bah rmôt kan dôl ƀư geh tâm di pháp luật đŏng lah mô. Rnôk hăn uănh kơt nê ri gâp kŏ hăn ndrel, tâm rgop gay ma kơl mbơh ndrel bonh đă ƀon lan đŏng”.

            Ntơm bah ăp rnôk tâm mâp ma bu ranh ƀon, nau geh tât nau rêh, nau mĭn bah ƀon lan geh njoăl tât n’gâng kan ndrel công an xã. Rnôk geh nau kan ntoh luh, nŭuh bu rnơm ndrel n’gâng kan ndrel công an tâm dâng lŏ lah nau tâm mâp, nkoch mbơh, bonh đă, rgâl ma ƀư ân ăp nau kŏ kol ntoch jong.

            Nau ƀư aơ hŏ lơn ma geh săk tam lơn tâm ƀon Ea Măp tâm nau rklaih nau kan geh tât mpôl chroh. Bah rnôk aơ 7 năm, du đê̆ rnăk vâl râng nau rƀŭn chroh mô tâm di nau ntrŭnh. Công an xã Quảng Phú tâm rgop ma gưl uỷ, n’gâng kan, bu ranh ƀon ndrel nŭih bu rnơm tâm mâp, nkoch trêng, ntĭm mbơh gay ƀon lan gĭt ndrel ƀư tâm di ma pháp luật. Rlau 200 nŭih jêh nê plŏ rƀŭn nsum tĭng nau ntrŭnh bah pháp luật.

            Mục sư Y Nuer Bdap, Mât rmôt rƀŭn chroh Lutheran ƀon Ea Măp mbơh, n’gâng kan ndrel công an ƀa ƀơ nkoch mbơh, ntĭm đă gay ăp ntŭk ƀư nau kan tâm di nau ntrŭnh. Rnôk aơ, nau kan “Nau rnơm nâp nâl-ƀon lan đăp mpan’ dôl geh ntrŭnh tâm ƀon, rƀŏng tât ndâk njêng mpol chroh rƀŭn tâm rnglăp, rêh ueh, chroh ueh, ƀư tĭng pháp luật ndrel râng mât nau kan rnă njrăng ân nâp nâl:

            ‘Kônh wa mpôl chroh rhơn ngăn rnôk geh n’gâng kan kơp dơn, geh rgum rƀŭ tâm du ntŭk. Ăp nŭih mro bonh đă, tâm jă tâm djăt tĭng nau rđau đă, nau ntĭm mbơh bah n’gâng kan, gơih pah kan jan sa, đăp mpăn nau rêh, nau kan ƀư “Nau rnơm nâp nâl, ƀon lan đăp mpăn” ntơm geh ƀư, nŭih ƀon lan geh dơi tâm mâp, tâm dăch ma ăp gưl kan n’gâng kan bah xã tât n’gor. Nŭih ƀon lan tĭng chroh đăp mpăn ngăn”.

            Jêh rnôk tâm rnglăp, xã Quảng Phú, n’gor Dak Lak rnôk aơ geh 37 thôn, ƀon, đah bơi tât 62 rbăn nŭih, tâm nê, geh 9 ƀon, ngăn lah rnoi Rđe rêh. Nkuăl hvi, ƀon lan tâm ƀah ngai, nau rƀŭn rgum nau tĭng chroh âk ntil ƀư nau kan mât đăp mpăn nau kan bah ăp ntŭk tâm dâng lơn ma ŭch cán bộ ân geh mât ân nâp ndrel gĭt nau dơi nau rêh bah ƀon lan.

           Lah rnoi Rđe, geh ntĭm nti nau kan mât đăp mpăn, Trung tá Y Dhăm Byă geh nau dơi mpeh nau blau nau ngơi ndrel nau vay mơng tâm nau rêh. Gay dơi gĭt tâm nkuăl ndrel rklaih nau kan tă bah tâm dâng, nô ƀa ƀơ hăn tât thôn, ƀon, tâm mâp ma ƀon lan, bu ranh, nŭih bu rnơm gay ma djăt ndrel joi gĭt nau mĭn nau tât bah nau kan. Trung tá Y Dhăm Byă mbơh, ntơm bah nau kan nê, rmôt công an xã mơ dơi nchrăp rklaih ăp nau kan ntoh luh nkre tă bah tâm dâng ƀon lan:

            ‘Nơm ân geh ƀa ƀơ tâm dăch ma ƀon lan, djăt ăp nau ŭch, nau mĭn bah ƀon lan, nkre lah nŭih nkoch trêng tay ăp nkô̆ nau, nau ntrŭnh tă bah ba lơ gay ma ƀon lan dơi gĭt, dĭt ndrel ƀư ân tâm di ăp nau ntrŭnh bah pháp luật. Nơm kŏ ân tâm dăch, hăn ôp khâl, tâm nchră mbơh nau ma ăp nŭih bu rnơm, bu ranh ƀon, kruanh chroh gay bu gĭt, rbăng ndrel tă bah nê ntrŭnh ƀư nau nkoch trêng tât ma nŭih bu rnơm gay ma ƀư tĭng ân ueh lơn"”

            Tâm ăp ƀon kan geh nau rêh jêng, tĭng chroh âk ntil, nau mât đăp mpăn ƀon lan ân geh ntơm bah nau tâm dăch dơh ndrel tâm rnơm. Đah Trung tá Y Dhăm Byă, nê lah ăp rnôk hăn tât tâm ƀon lan, mâp bu ranh ƀon, mâp nŭih bu rnơm, djăt nŭih ƀon lan gay năn gĭt ndrel doh rklaih ăp nau kan tă bah tâm dâng. Ăp nau kan ƀư nơih dăch nê rgop nau rhuăt gleh nau tâm ƀah đah cán bộ ndrel ƀon lan. Rup gui nŭih cán bộ ndăn mông rlu dĭng nar gay ma hăn tât rnăk bu rnah ƀon kŏ lah du nau kan kơt tĭng ndrel ƀư tĭng nau Wa Hồ: Tâm êp ma ƀon lanm dăch ma tâm dâng, gay mât đăp măpn tă bah ăp ƀon lan./.