N’gor Dak Lak aƀaơ geh nklăp 450.000 nuĭh ranh, geh 13,5% rnoh nuĭh. Nău kơl dơi dăn đă gay ntop kơl rmôt bah 60 tât 75 năm geh nău rêh jêr jŏt mô dơi geh nău ntop kơl BHYT êng, nkre rgop n’hao geh lam BHYT bah n’gor.

Wa Trần Mạnh Toàn, Giám đốc Bảo hiểm xã hội n’gor Dak Lak an lah, nău khlay lơn lah Nghị quyết mhe mbra dơi mkra lĕ nău soih đăp mpăn rêh jêng đah nuĭh âk năm deh: "Nău rgŏ jă nuĭh âk năm ta n’gor Dak Lak rwăt êng BHYT ri dŭt jêr jŏt. Ăp nuĭh bah 60 tât 75 năm ma mô dơi geh nău kơl an đah bảo hiểm y tế lah ntŭk soih ƀah đah đăp mpăn rêh jêng. Nghị quyết aơ mbra tŏng ăp lĕ rngôch bảo hiểm y tế an nuĭh ranh".

Đah tơm prăk, n’gor Dak Lak lĕ nchrăp nkrem 38 rmen prăk gay ƀư nău kơl tâm 4 khay dŭt năm 2026. Bah năm 2027, nklăp prăk aơ nchrăp dơi kơp tâm pă tơm prăk xă, phường. Ăp nău kan, ƀon lan dơi đă ƀa ƀơ uănh joi samƀŭt mât prăp gay năl săk nuĭh dơi kơl, dêr tâm trŭp đah ăp nău ntop kơl êng.

Bi thư N’gor ủy Dak Lak Lương Nguyễn Minh Triết lah rjăp, bôl n’gor hôm e jêr jŏt, nău an tơm prăk đăp mpăn rêh jêng hôm dơi an lor."Tâm nău dŭt jêr jŏt bah n’gor yơn ma an tơm prăk dŭt têh an nău kơl đăp mpăn nău rêh jêng. Jao an ủy ban tâm nchră nău aơ n’hanh jao an ăp Ban bah HĐND kơp uănh gay jêh nĕ mbơh an rơh rƀŭn bah HĐND êp tât”.