Ta Ntŭk kan Rhŏ an hành chính nsum xă Tây Sơn, n’gor Gia Lai, ntŭk wơt dơn samƀŭt rhăch nău neh ntu âk lơn ăp ntŭk ƀư samƀŭt êng. Nuĭh ƀon lan tât ƀư samƀŭt âk ntil: pă samƀŭt kơp dơn, tăch rgâl, an ndơn, nkra nu nău... ta ntŭk wơt dơn, cán bộ dŏng nău mĭn ƀư mhe (AI) gay kơp uănh samƀŭt, tâm nkôp nău ntrŭnh, saơ ăp nkô̆ nău hôm e mô tŏng lor rnôk wơt dơn. Rnôk samƀŭt rhăch nău ndơ̆ sĭt Jrô kan wăng sa, công chức địa chính dŏng tay AI gay răk, rgum ăp samƀŭt, uănh joi tĭng nău di n’hanh uănh joi trong mkra.

Bah 3 khay aơ, AI neh ntu ndrel dơi dŏng du tơ̆ ta âk jrô kan, âk ntil nău ta xă Tây Sơn, bah wơt dơn, mkra nău way kan tât groi nđôi samƀŭt. Knơm nĕ, bôl du khay wơt dơn nklăp du rbăn samƀŭt rhăch nău hành chính, dŭt âk geh tât neh ntu, yơn xă mô geh samƀŭt rhăch nău mbrơi. Wa Võ Ngọc Thương, chuyên viên uănh nđôi samƀŭt samtra, Ntŭk kan rhŏ an hành chính nsum xă Tây Sơn an gĭt: “Bah rnôk ƀư, du jrô rnâng kan geh tât lĕ năp AI dŏng êng gay dŏng săk rnglăy âk ngăn. AI dŭt săk rnglăy, kơl xă dŭt âk, kơl cán bộ wơt dơn samƀŭt rhăch nău đêt nar mĭn njêng. Rnôk uănh năl samƀŭt rhăch nău, AI saơ âk nkô̆ nău an ntop tay. Đah cán bộ uănh nđôi hành chính, lah ăp samƀŭt rhăch nău đah jrô kan way kan ndơ̆ an nău mbơh rlu mô lah mô mkra, mbra đă AI ƀư, uănh năl tay. Nău aơ n’hao săk rnglăy mkra nău kan.

Gay geh ndơ mĭn ƀư mhe dôl dơi cán bộ xă Tây Sơn n’hanh ăp ntŭk êng tâm n’gor Gia Lai dŏng kơt aƀaơ hin, bah bôk năm 2026, ăp cán bộ Ntŭk kan rhŏ an hành chính nsum n’hanh Văn phòng Dăn ƀư samƀŭt neh ntu n’gor Gia Lai lĕ ndrel mĭn njêng, saơ. Rmôt lĕ dŏng hăng rhiăng samƀŭt way dŏng mpeh trong way kan, luật, nău ntrŭnh geh tât ntil nău neh ntu ndrel âk samƀŭt rhăch nău n’hêl na nê̆ dơi săch gay “tiăr nti” mĭn njêng mhe.

Wa Đặng Hữu Bình, Giám đốc Văn phòng Dăn ƀư samƀŭt neh ntu n’gor Gia Lai an gĭt, kơt dŏng aƀaơ lĕ tâm di đah mkra nău kan n’hêl na nê̆: “AI neh ntu rgum mkra 2 nău têh: Ngoăy, uănh lah samƀŭt rhăch nău di tŏng ăp đŏng lah mô. Tal 2 lah geh nău tâm di bah samƀŭt rhăch nău gay ndơ̆ an ăp trong mkra ngăch ngăn. Lơn lah ta ntrong ƀư n’gâng kan ƀon lan 2 gưl, oh nô cán bộ địa chính, cán bộ jrô kan wăng sa gưl xă, geh nuĭh ơm, geh nuĭh mhe mhe geh tât nău kan, nău rnăk wât lĕ rngôch gay ndơ̆ trong mkra tĭng samƀŭt rhăch nău dŭt roh mông nar. Knơm AI, mông mkra samƀŭt rhăch nău dŭt đêt mông. Jêh rnôk dŏng AI ntop kơl, rnoh samƀŭt rhăch nău mbrơi dŭt đêt lơn”.

Mô knŭng dơi jêh ntop kơl nău kan, rmôt hun hao hôm dŭt uănh khlay đă mât mpôn, đăp mpăn nu nău. Samƀŭt mât prăp bah công vụ dơi mkra, mât ta Văn phòng UBND n’gor Gia Lai, ndrel ăp trong mkra mât mpôn nu nău êng nuĭh tâm samƀŭt rhăch nău. Tât aƀaơ, kơt dŏng nău mĭn ƀư mhe AI neh ntu bah Gia Lai lĕ dơi uănh năl uĕh nâp n’hanh rnoh mât mpôn âk.

N’gor lĕ ƀư tiăr nti, ndơ̆ kơt ndơ kơt dŏng aơ tât lĕ rngôch 135 xă, phường n’hanh lĕ ngăch ntop kơl mkra hăng rbăn samƀŭt rhăch nău; rnoh samƀŭt rhăch nău mbrơi n’hŭch 1/3 knŭng bah kơi 3 khay kơt dŏng. Bah săk rnglăy aơ, Gia Lai dôl kơt dŏng tay trong ƀư tâm ban kơt nĕ gay hun hao ăp ndơ mĭn njêng mhe (AI) mkra ăp nău kan na nê̆ ta ăp ntil nău êng. Wa Lê Dũng Linh, Giám đốc Ntŭk kan rhŏ nău hành chính nsum n’gor Gia Lai an gĭt: “Jêh rnôk lĕ ƀư jêh AI neh ntu, Kruanh UBND n’gor Gia Lai lĕ jao Ntŭk kan Rhŏ an hành chính nsum tâm rgop đah ăp nău kan ndâk ƀư ăp ntrong ƀư nău kan êng tâm ban kơt nĕ. Nchrăp Ntŭk kan mbra ndâk ƀư du văn phòng tâm ôp tâm nchră mrô ta ntil nău wăng sa rêh jêng. Aơ lah ntrong ƀư tĭng tâm samƀŭt mât prăp n’hanh AI kơl ntĭm rđău ƀĭt joet, ndơ̆ nău ntrŭnh mât uănh tâm ntil nău wăng sa rêh jêng”.

Đah AI neh ntu, Gia Lai mô knŭng jêng geh du ndơ ntop kơl cán bộ, ma hôm jêng du trong ƀư mhe. Bah ăp jêr jŏt n’hêl na nê̆, n’gor nchrăp joi ăp trong mkra mhe an ăp nău ơm, rgop kơl n’gâng kan ƀon lan 2 gưl pơk dŏng na nao, săk rnglăy n’hanh rhŏ an nuĭh ƀon lan uĕh lơn./.