Show nchreng an uănh “Jay rot” geh puăn gâl, ntơm bôk ma “Miền mơ tưởng” n’hanh pe gâl tơm “Dring gah”, “Gah” n’hanh “Ốk”. Nuĭh djăt uănh dơi têk ndrêng ma ntŭk gŭ rêh, rlat koh bah nău rêh Rđe, bah nău gŭ âm tât bri dak, nchron pănh, mât chăm mir ba tât nău rêh văn hóa, nuih n’hâm nkre đah nău rêh jay rot.

Ăp nău mpât mprơ, chĭng gong, ndơ uh goh way ơm, nău ot ndrong, nău way n’hanh nău rêh ƀon lan dơi nkre đah njroh mprơ dăp mprĭp, lơp chrat n’hanh công nghệ nchreng an uănh. Nău mha êng bah nău njroh mprơ lah nuĭh djăt uănh mô dơn treng uănh ma hôm dơi hăn tĭng ntŭk gŭ rêh, rlai lăp tâm du đêt nău kan dơi mpơl tay, ma nê tât dăch lơn đah nău rêh văn hóa way ơm bah nuĭh Rđe.

Ăp nuĭh râng nchreng an uănh lah ăp bu hăr blău nuĭh Rđe da dê. Lĕ rngôch dŏng nău Rđe, rgop mât săk ntơr bah ntŭk văn hóa dơi mpơl tay.

Tĭng groi nđôi măng njroh mprơ, wa Lê Thị Lý, ta phường Buôn Ma Thuột, n’gor Dak Lak an gĭt, nău mprơ nsĭt tay âk nău rhơn mƀak mpơl tay nău rêh, nđăp nsao, nău way ơm, ndơ nsoh n’hanh ndơ nkrơ̆ bah bu ur Rđe ntơm nơh.

“Rnôk gâp uănh ri dŭt rhơn mƀak ngăn. Gâp saơ nău rêh bah ƀon lan kăl e dŭt âk mpưm n’hanh saơ du jâng văn hóa du ma mât ndray ngăn. Mô gĭt lah Dak Lak rdâk dơi du bôk nău kan dŭt uĕh kơt aơ”

Wa Trần Hồng Tiến, Giám đốc Sở Văn hóa, Thể thao n’hanh Pâl nđaih Dak Lak an gĭt, nău n’glăp công nghệ tâm nchreng an uănh văn hóa lah trong rƀŏng hăn tâm di đah nău hun hao công nghiệp văn hóa, nkre pơk luh nău dơi jêng ăp ndơ geh ƀư pâl nđaih mhe, rƀŏng tât rdâk njêng ndơ geh ƀư pâl nđaih văn hóa geh nău dơi wăch rgum năch n’hanh nta jêng geh tay rnoh khlay wăng sa săk tơm ta ntŭk.

“Mpôl hên mpŏng jêng du gâl ndơ geh ƀư pâl nđaih gay kơl n’gâng kan pâl nđaih hun hao. Rnôk năch tât đah Dak Lak, mhâm ƀư gay ŭch rŏng dơi uănh, dơi djăt ăp show rup geh ngăn kơt dja”.