- Dăn lah uĕh wa Y Thịnh Bon Yôk Ju hŏ râng nkoch bri ndrel nău ngơi Bu Nong – VOV Tây Nguyên!

Wa Y Thịnh: Gâp dŭt rhơn rnôk dơi râng nkoch bri nkhêp geh nău ngơi Bu Nong tă bah Radio nău ngơi Việt Nam nkah ndray 20 năm pơk ƀoh nău ngơi. Gâp lah Y Thịnh Y Thịnh Bon Yôk Ju, Tă ƀư Groi kruanh UBND n’gor Dak Nông, nkre lah nuĭh geh âk năm gŭ mĭn, joi gĭt mpeh nău ngơi n’hanh văn hóa bah rnoi nuĭh Bu Nong.

- Hơi wa, lôch tĭng djăt nău ngơi Bu Nong – VOV Tây Nguyên, moh ndơ may dŭt nkah uĕh nău nchih nkoch bah Radio mêh?

Wa Y Thịnh: Tĭng gâp, aƀaơ nău mhe lư tâm dak n’hanh dak bah dih ta ah ntŭk kônh wa dơi rƀah gĭt da dê. Yor kơt nê̆, nău ƀư jêng rnoh khlay êng bah nău ngơi Bu Nong lah ăp nkô̆ mpeh văn hóa, nău ngơi, mpât mprơ, ot ndrong, nkoch nđơn, nău way ôp brah lah yang n’hanh nău rêh bah ƀon lan he. Nê lah nău ma kônh wa mpŏng kâp rnôk pơk djăt, yor bah nê khân păng nkah mpeh tu tơm ta ƀon lan.

-Lah nuĭh gŭ mĭn văn hoá, nău ngơi Bu Nong, tĭng may, dŏng nău ngơi Bu Nong pơk ƀoh ta VOV Tây Nguyên aƀaơ ân mhâm ƀư gay dăch dêh n’hanh dơh wât đah kônh wa ăp nkual mêh?

Wa Y Thịnh: Nău ngơi Bu nong geh 7 ntil nău ngơi (Preh, Rlâm, Gar, Prâng, Kuênh, Nong, Bunơr), yơn ăp nuĭh gŭ mĭn nău ngơi hŏ tâm ban ŭch sơch nău ngơi Preh ƀư nău ngơi nsum yor geh âk nuĭh gĭt n’hanh geh tơm nău ngơi âk mpưm. Yơn lah, tâm rnôk rblang, lah nău ngơi tơm mô hŏ geh nău tâm di ri mbra dŏng ăp nău ngơi bu nong êng. Nău nê mô di lah tih ma hôm rgop ƀư âk mpưm tay nău ngơi Bu Nong. Dŭt khlay lah ân mât dơi nău kloh rvah bah nău ngơi n’hanh gay kônh wa ta ăp nkual mbra wât dơi nkô̆ nău nkoch.

-Ndrĭ hơi wa, nău ngơi Bu nong VOV Tây Nguyên hŏ mhâm rgop tâm nău mât ndray kloh rvah bah nău ngơi n’hanh văn hóa ƀon lan he mêh?

Wa Y Thịnh: Mô êng gâp ma kônh wa Bu nong lam ăp ƀon lan, kơp lĕ ma nuĭh dôl gŭ rêh ta âk ntŭk tâm n’hanh bah dih dak, dŭt rhơn da dê n’hanh n’hao êng săk rnôk dơi djăt nău ngơi bah rnoi he nơm ta Radio nău ngơi Việt Nam. Nău ngơi mô dơn nđơn trêng tay trong nchrăp, trong kơl bah Đảng n’hanh Ngih dak ma nău ngơi me deh he nơm ma hôm rgop mât ndray nău mpât mprơ, ot ndrong, nđơn yău n’hanh ăp rnoh khlay văn hóa way ơm. Ŭch mât ndray du rnoi nuĭh ri lor bôk năp ân mât ndray nău ngơi bah rnoi nuĭh nê. Yor kơt nê̆, ăp nuĭh ƀư nău ngơi Bu Nong dôl rgop dŭt khlay tâm nău mât ndray n’hanh nđơn trêng tay nău ngơi, chữ nchih n’hanh săk tơm văn hóa an rơh kơn bah kơi tay.

-Hơi wa, bah radio tât điện thoại n’hanh mạng xã hội, trong kônh wa tât đah nău lư hŏ rgâl dŭt âk ngăn. Tĭng may, nău ngơi Bu nong VOV Tây Nguyên ân mhâm rgâl mhe gay tât dăch lơn đah ƀon lan mêh?

Wa Y Thịnh: Aƀaơ hŏ êng đah ntơm nơh hôm. Lĕ rngôch ăp ƀon lan geh internet, điện thoại hŏ dŭt âk ngăn hôm. Mô dơn druh ndăm dơm ôh, lĕ dĭng nuĭh rơh mpôl hên, 6x, 7x, hŏ gĭt dŏng Facebook, Zalo, YouTube gay pơk uănh nău lư, djăt nău mprơ mô lah djăt uănh tay ma nău ngơi Bu nong. Kônh wa hăn luh mir, ba ri mbra dơi djăt di mông pơk, yơn rnôk sĭt jay djăt ma pơk điện thoại lah mbra dơi djăt tay moh rnôk he ŭch. Tĭng gâp, nê lah nău dŭt dơh bah báo chí aƀaơ. Yor kơt nê̆, rlău ma pơk ƀoh nău ngơi kơt nău way ơm, nău ngơi Bu nong ân n’glăp âk ta ăp ndơ pơk ƀoh nău lư keh mbrô gay ƀon lan tâm dak tâm ban kơt ta dak bah dih mbra dơh tât. Bah meng nê, mpôl ƀư nchih nău ngơi ân nănh dŏng âk ăp công nghệ mhe đŏng, kơp lĕ ma trí tuệ nhân tạo AI nê, gay ƀư nkô̆ nău nkoch uĕh lơn. Yơn bol dah ntŭk tât rgâl mhe ri nău dŭt khlay hôm lah nkoch trêng nău lư di ngăn đŏng, mât dơi nău ngơi, săk tơm văn hóa n’hanh ăp rnoh khlay way ơm bah  rnoi nuĭh Bu nong.

-Nkhêp geh nău ngơi Bu nong VOV Tây Nguyên nkah ndray di 20 năm pơk ƀoh nău ngơi, may moh geh nău njuăl tât ăp nuĭh ƀư nchih nkoch tay nău ngơi nar aơ mêh?

Wa Y Thịnh: Gâp dăn njuăl nău lah uĕh tât ăp nuĭh nchih, rblang, rŏ ngơi hŏ mât ndray nău ngơi bah rnoi nuĭh Bu nong 20 năm rlău aơ. Mpŏng ăp mon mât tay nuih n’hâm nđơr kan, hăn âk lơn, dêh dăch ƀon lan lơn, mô rlu dơi kơt nti n’hanh rgâl mhe trong ƀư gay nău ngơi Bu nong nar lơn ma mpăr lot ngai ta ăp ndơ pơk ƀoh nău lư uĕh mhe. Gâp mĭn lah, rnôk nău ngơi Bu nong hôm n’gloh lam ntŭk pơk ƀoh nău ngơi n’hanh ăp ntŭk pơk uănh keh mbrô ri săk tơm văn hóa bah rnoi nuĭh he mbra hôm dơi mât ndray n’hanh nđơn tay rlău âk rơh kơn."

- Dăn lah uĕh ăp nău nkoch lĕ nuih n’hâm bah wa Y Thịnh Bon Yôk Ju. Dăn an may n’hâm suan ngăch lăng dăng soih n’hanh rgop âk nău gĭt blău an ƀon lan Bu nong.