Tă aơ 4 năm, rnăk yuh K'Thị Nam ta thôn 2 dơi Hội Liên hiệp bu ur xă Đông Giang nta trong dơh manh 50 rkeh prăk bah Ngân hàng Chính sách xã hội Hàm Thuận Bắc gay ntuh kơl hun hao tơm sầu riêng n'hanh mât rong ndrôk. Tât aƀaơ, trong ntĭt leo ƀư wăng sa bah rnăk yuh Nam lĕ mât uĕh săk rnglăy, nău geh tĭng kơn rgâl uĕh, jêng nău rêh rnăk wâl nar lơn ma đăp mpăn. "Rnăk vâl gâp geh manh bâh mpôl kan bu ur 50 rkeh prăk gay ma hun hao tơm sầu riêng, rong ndrôk. Ta jay lŏ ntuh kơl trong dak tŏ an tơm gay ma tơm ngăch hun hao. Nơm saơ bu ƀư tơm sầu riêng geh săk rnglăy jêng nơm kơt nti ƀư tĭng. Mpeh kĩ thuật ri nơm kơt nti tay bâh ăp rnăk vâl bah năp nơh ƀư sầu riêng geh săk rnglăy, he ƀư tĭng".

Ndrel đah rnăk yuh K'Thị Nam hôm nha geh rnăk yuh K'Thị Ẩn, lôch geh manh prăk, yuh Ẩn lĕ janh sreh jăng bơi tât 2ha tơm điều ranh mô jêng gay ma rgâl jêng tăm 1.000 tơm cà phê n'hanh 120 tơm sầu riêng. Aƀaơ 2 ntil tơm tăm aơ geh rnăk yuh Ẩn mât chăm, hun hao dŭt ueh, mpŏng mbra nsĭt tay nău geh đăp mpăn an rnăk vâl tâm bar pe năm tât. “Jay gâp bah năp đaơ dŭt âk tăm điều yơn bar pe năm aơ tăm điều saơ mô jêng jêng mhe rgâl tăm cà phê, tăm sầu riêng bơi tât rlău 1,5ha, lŏ knơm manh tay tơm prăk bah Ngân hàng Chính sách gay ntuh kơl ntil, phân, dĭng dak,… aƀaơ tơm dôl hao jêng ueh, he nsôih mât chăm bar ntil tơm aơ gay jêh aơ tay nsĭt geh wăng sa ân rnăk vâl”.

 Đah rlău 800 hội viên bu ur râng rƀŭn ta 5 chi hội thôn, ăp năm bah năp, gay kơl hội viên tât đah ăp tơm prăk manh kơl an hun hao wăng sa, Hội Liên hiệp bu ur xă Đông Giang, n'gor Lâm Đồng lĕ tâm rgop na nê̆ đah Ngân hàng Chính sách xã hội Hàm Thuận Bắc, n'gor Lâm Đồng n'gluh ăp tơm prăk manh kơl an, nta nơih an hội viên hun hao wăng sa rnăk wâl, tĭng kơn rgâl nău rêh. Yuh K'Thị Châu ta xã Đông Giang, n'gor Lâm Đồng nkoch, ntơm bah tơm prăk manh bah Ngân hàng Chính sách, rnăk yuh hŏ ntuh kơl tăm tơm sầu riêng ndrel tơm cà phê tâm rnoh neh 1,5ha. Yơn lah, rnôk lêh cà phê ndrel sầu riêng jŏ ngăn ri gay sŏk gleh rong jong, yuh Châu mât rong tay ndrôk, sur, tăm ăp ntil tơm gleh nar gay geh prăk ƀa ƀơ ân rnăk vâl. Yuh K'Thị Châu an gĭt, gay tơm tăm hun hao uĕh tâm khay duh phang kơt năm aơ, yuh nănh ntuh kơl trong tŏ dak êng, nkre mpêt nkrem dơi tơm dak tŏ an tơm tăm, hŭch đêt roh huach prăk kan, nkre đăp mpăn tơm tăm dơi tŏng dak gay hao jêng ngăch, nsĭt geh wăng sa âk. "Gâp geh manh prăk Ngân hàng Chính sách ntuh kơl tăm cà phê n'hanh sầu riêng. Gay geh dak tŏ, jay gâp ntuh kơl rlău 200 rkeh prăk, lĕ ma ƀư ntu lĕ ma ƀư ntung, ƀư n'gâng, ƀư jŭr tơm. Bar pe tơm aơ jŏ an lêh play ngăn, jêng he an ƀư ba, ƀư bum, mât sŭr, mât ndrôk gay ma geh prăk dŏng ăp nar, prăk rvăt phân poh, dak si ntuh kơl an bar pe tơm cà phê, tơm sầu riêng”.

 Nău ngăn ân saơ, ăp năm rlau aơ, tơm prăk manh kơl an hŏ kơl an âk rnăk ƀon lan rnoi mpôl đê̆ tâm xã nkuăl yôk Đông Giang geh nau dơi ntuh kơl hun hao tuch tăm, n'hao nau geh jêng ndrel pơk nau kan nâp nâl. Ngăn lah ăp rnăk ach o, êp ach o ndrel ăp nŭih geh kơl an rnơm geh manh tơm prăk manh kơl an hŏ tĭng kơn đăp mpăn nau rêh, hun hao rklaih ach o nâp nâl. Wa K'Thị MHảo, Kruanh Hội Liên hiệp bu ur xã Đông Giang, n'gor Lâm Đồng an gĭt, tât aƀaơ, tơm prăk ma Hội dôl mât bơi 12 rmen prăk, đah 350 hội viên manh. Lôch rnôk hội viên dơi manh prăk, Hội lĕ ntĭm rđău ăp chi hội tâm rgop đah ăp thôn ntrôl dăng nkoch trêng, ntĭm nti hội viên dŏng tơm prăk geh săk rnglăy, di nău ŭch.  "Tâm rnôk mhe aơ, du đêt hội viên nchrăp manh prăk n'hanh rgâl tơm tăm. Rlău ma tơm tăm tơm lah tơm điều, hội viên hôm nchrăp rgâl bah tơm điều jêng tăm tơm cà phê, tơm sầu riêng n'hanh aƀaơ trong leo ƀư aơ hun hao uĕh, nsĭt geh nău rgâl wăng sa an rnăk wâl. Âk hội viên gĭt kơt dŏng khoa học kỹ thuật tâm nău kan tuch tăm, ăp rnăk hŏ nănh ntuh kơl trong tŏ dak mhe gay n'hŭch đêt roh huach prăk n'hanh mông nar tŏ dak mhe jêng tơm tăm hao jêng ngăch lơn".

 Tât aƀaơ, nău rêh bâh âk nuĭh kan mom geh dơn rnoh prăk manh kơl an bâh Ngân hàng Chính sách xã hội Hàm Thuận Bắc, n'gor Lâm Đồng ăp nar lơ ma hun hao. Bâh rnoh prăk manh aơ mô dơn kơl oh yuh njêng nău kan, n'hao nău geh an rnăk vâl ma hôm nha ntop rgâl nău mĭn bâh bu ur rnoi đê̆ nkual yôk xã Đông Giang, n'gor Lâm Đồng tâm nău hun hao wăng sa, rdâk njêng nkual ƀon lan mhe./.