Tât but uănh ta Ntŭk rgum kan dak si Phú Hòa, yuh Lê Thị Bích Loan, ta thôn Phú Thạnh, xã Phú Hòa 2, n'gor Dak Lak dăn ƀư ta măy dŏng êng, hôm kuăl lah kiosk dak si blău mhe, gŭ ta nkual wơt dơn. Knŭng ndơ̆ mã QR ta thẻ bảo hiểm y tế mô lah căn cước công dân lăp ta ntŭk pơk uănh, măy dŏng êng nchih mbơh săk nơm, kơl an yuh bah ir nău mbơh săk n'hanh sŏk rnoh mbrô dăp rgum ta ndơ dŏng. Yuh Loan saơ, nău ƀư ta măy dŭt dơh, bah nuĭh mom tât nuĭh ranh dơi dŏng đŏng."Gâp saơ măy aơ dŭt lah dơh an nŭih ji, mbơh kloh rwah. Nơm ri hôm e mom, yơn ăp kônh wa ranh hôm dŏng dơi đŏng. Geh măy aơ ri he nchih mbrô rnoh mbrô ngăch lơn, mô kâp jŏ, roh mông mô lah nŭih tât bah năp but uănh bah kơi, nŭih bah kơi tât but uănh bah năp".

Măy dăn ƀư but uănh êng dơi ndơ̆ lăp dŏng ta Ntŭk rgum kan dak si Phú Hòa bah khay 9 năm aơ, ăp tơ̆ dăn ƀư knŭng roh mô hŏ tât 1 mnĭt. Ndơ aơ kơl n'hŭch rnoh nuĭh kan an ƀa ƀơ ta ntŭk wơt dơn, an nuĭh kan an ăp nău kan êng.

Nai dak si Lương Văn Phước, Giám đốc Ntŭk kan dak si Phú Hòa an gĭt, săk rnglăy lah na nê̆ rnôk bah dŭt khay 7 tât aƀaơ, ntŭk kan nkre mbơh ƀư but uănh săk soan lam ƀon lan, đah rlău 3.500 tơ̆ nuĭh lĕ dơi but uănh. "Ntơm rnôk mbơh ƀư dŏng măy aơ ri nau kan mât nŭih pah kan geh đăp mpăn lơn, bah năp nơh ri ân geh pă âk nŭih, rnôk aơ knŭng ân geh 1 tât 2 nŭih lah hŏ jêh nau kan nê. Geh nau dơi gay ma nơm ntrŭnh du đê̆ cán bộ gay ma kơl an ân ăp ntŭk but uănh ji, ngăn lah ntŭk but uănh n'hâm soan lam ƀon lan dôl ndrel rnôk ntrŭnh. Knŭng leo wơt ta aơ bu mra dơi hăn lăp tâm ntŭk but uănh, nchlơi lơi rơh mpih ta măy ndơ dŏng bah ăp khoa jrô".

Nău nchih êng săk nuĭh ji tâm rnôk wơt dơn kơl Ngih dak si y tế Phú Hòa bah ir nău kan nchih nău lư n'hanh tâm pă tay nuĭh kan. Aơ lah nău ŭch ngăn tâm rgâl mrô ta ntŭk: ndơ dŏng tâm di, dơh dŏng, mpêt nkrem mông nar an lĕ ma nuĭh ƀon lan n'hanh cán bộ ƀư.

Wa Huỳnh Thị Son, Bí thư Đảng ủy xã Phú Hòa 1, n'gor Dak Lak nkoch, ndrel đah tơm prăk ngih dak, tâm bah ri aơ ta ntŭk lĕ dơn geh âk nău ntop kơl bah tơm prăk kon nuĭh. Măy dăn ƀư samƀŭt but uănh ji ta Ngih dak si Phú Hòa yor Agribank gŭ kan ta Phú Yên ntop kơl lah ngoăy tâm rnoh nĕ. "Tâm rnôk mhe rlău, xă Phú Hòa 1 dơn geh âk nău hăn ndrel, tâm pă, ntop kơl bah ăp công ty, ăp doanh nghiệp ta ntŭk, lơn lah trong kan rgâl mbrô. Aơ lah nău ntop kơl khlay đŏng, rgop nta tay tơm ndơ an xă Phú Hòa 1 tâm trong kan rgâl mbrô ta lĕ rngôch ăp trong kan".

Tĭng N'gâng kan dak si Dak Lak, rgâl mbrô dôl dơi an ƀư bah săm ƀŭt, samƀŭt rhăch nău săk soan điện tử tât trok prăk mô dŏng prăk măt n'hanh ăp ndơ rhŏ dŏng but săm ji. Lvang năm 2026-2030, Dak Lak hŏ tâm ban ŭch trong nchrăp pă an bơi 484 rmen prăk an 7 nău nchrăp ƀư dak si mbrô. Ndrel đah tơm prăk ntuh kơl bah Ngih dak, n'gor hôm ntrŭt nsôr rgum tơm ndơ rêh jêng gay ntop kơl, n'hao uĕh rhŏ dŏng ta ăp ntŭk tâm di.

Lôch nglăp nsum, n'gor Dak Lak geh 36 ntŭk but uănh săm ji geh nsưng bĭch săm ji mpeh tâm, geh 14 ngih dak si n'hanh 22 ntŭk rgum but uănh săm ji. Kiosk dak si thông minh aƀaơ hŏ dơi an ƀư ta 15 ntŭk. Tâm nê, Agribank gŭ ta Phú Yên ntop kơl ndơ dŏng ta Ntŭk rgum but uănh săm ji Phú Hòa n'hanh Ntŭk rgum but uănh săm ji Sơn Hòa. Wa Phan Thông Thái, Giám đốc Agribank gŭ ta Phú Yên an gĭt, ntŭk kan dôl geh trong nchrăp ntop kơl tay ăp ndơ dŏng kan êng tâm trong kan dak si n'hanh mkra samƀŭt ta ăp xă, phường ta ntŭk. "Mpôl hên dôl geh bôk nău kan ntop kơl tay Kiosk dak si gĭt blău mhe n'hanh ăp Kiosk an ăp n'gâng kan ta ntŭk đŏng, ntop kơl ăp ndơ dŏng na nê̆ gay mhâm ƀư kơl kônh wa dơi geh ăp nău uĕh bah rgâl mrô."

Tơm ndơ rgŏ jă mô rgâl nău ntuh kơl bah Ngih dak, yơn dơi ntop kơl tâm ăp nău ŭch geh na nê̆ ta ntŭk. Đah ăp ndơ dŏng n'hanh tơm ndơ tâm di nău ŭch dŏng ngăn ngên ta ntŭk, săk rnglăy rgâl mbrô dơi saơ na nê̆ bah ăp nău rgâl na nê̆. Kơt ta du đêt ntŭk ngih dak si bah n'gor Dak Lak, săk rnglăy mpơl bah ndơ dŏng dơi ndơ̆ lăp dŏng lĕ kơl nuĭh ƀon lan bah ir ƀư n'hanh n'hŭch mông nar kâp.