Bar pe năm bah năp nơh, wa Briu Chéo, nuĭh rnoi Cơ Tu, ta xã mpeh yôk yang Bến Giằng, nkual ƀon têh Đà Nẵng (nkuâl Nam Giang, n’gor Quảng Nam ơm) lơn âk ƀư mir ba, hăn kan an bu ăp ntil nău kan yơn nău rêh nha hôm ach o mbro đŏng. Wa Briu Chéo hŏ manh ngân hàng rlău 200 rkeh prăk, dơi n’gâng kan ta ntŭk ntop kơl kon si ntil,  ndơ mât, wa Briu Chéo pơk hvi ndrung n’gar gay mât rong sŭr, ndrôk, tăm tơm sa play. Aƀaơ ndrung n’gar mât sŭr bah Briu Chéo geh bơi 200 mblâm sŭr, ndrôk ƀon tơm ta ntŭk n’hanh mir tơm sa play….Ndrung n’gar mât rong bah wa Briu Chéo dơi âk nuĭh tât uănh kơt nti. Rnăk I jêr jŏt tâm thôn, ƀon jêr jŏt, wa Briu Chéo mbra ntop kơl.

 “Rnăk gâp tât dơi đah tơm prăk manh thuk jêng ntuh kơl hun hao wăng sa rnăk wâl đăp mpăn n’hanh hun hao lơn, nău rêh rnăk wâl geh mbơm oi rlău ntơm nơh. Let lăp tay n’gâng kan ta ntŭk nta trong dơh ntop kơl tơm prăk manh, mât chăm kỹ thuật ndơ mât tâm nău hun hao wăng sa. Nuĭh ƀon lan ta ntŭk, moh rnăk I ŭch đă he ntĭm trong wăng sa an khân păng geh trong hun hao wăng sa n’hanh nta trong kơl an kônh wa geh tay nău kan”.

 Yuh Bhnướch Thị Blắc, rnoi Cơ Tu ta xã A Vương, nkual ƀon têh Đà Nẵng (nkuâl Tây Giang, n’gor Quảng Nam ơm) deh tâm rnăk jêr jŏt. Nar luh gŭ êng, yuh nchră đah I sai pơk ntŭk tăch ndơ rhăch rhên an kônh wa tâm ƀon. Nơm geh rgum đê̆ đă tơm prăk, yuh manh tay prăk ngân hàng, ntuh kơl mât chăm n’hanh tăm tơm sa play. Tât aƀaơ, yuh Blắc tăm rlău 2 héc ta tơm cam Vinh, đah 800 tơm n’hanh play bŭng ntô ư̆r an nsĭt geh bar pe jât rbăn prăk/năm. Ndăn dŏng neh mir yôk n’hanh tơm ndơ sa ta ntŭk nơm, yuh Blắc ƀư ndrung sŭr, djăr n’hanh ntuh kơl tăm bri si têh.

Rnăk yuh Blắc hŏ klaih rlău rnăk ach o n’hanh geh ndơ ntêm, ndơ sa, rdâk njêng jay têh uĕh, rvăt năp ndeh ôtô hăn wăng sa. Yuh Bhnướch Thị Blắc hôm nta joi tay nău kan an âk rnăk ach o ta ntŭk, nsĭt geh wăng sa đăp mpăn. Lôch n’hâp lĕ prăk dŏng kan, ăp năm rnăk yuh Bhnướch Thị Blắc nsĭt geh wăng sa ntơm bah bơi 200 rkeh prăk.

“Ntơm nơh, rnăk jêr jŏt, ntơm bah rnôk dơi Ngân hàng ntop kơl manh tơm prăk rnăk hên pơk hvi tay nău kan kơt tăm tơm cam n’hanh tăm tơm keo n’hanh mât rong, ntơm bah nê nău rêh rnăk wâl hun hao. Aƀaơ nău rêh đăp mpăn nsĭt geh wăng sa mbơm oi. Jêh aơ tay ur sai hên nchrăp manh tay tơm prăk gay hun hao trong ntĭt leo hvi lơn”.

Gay nta trong dơh an nuĭh ƀon lan hun hao wăng sa, n’hao geh, n’gâng kan xã A Vương ntop kơl si tăm, ndơ mât, ntop kơl ƀon lan hun hao wăng sa. Wa Lưu Văn Khương, Groi kruanh UBND xã n’har bri A Vương, nkual ƀon têh Đà Nẵng an gĭt, n’gâng kan ta ntŭk way ntrŏng pah kan n’hŭch ach o lah nău dơn kan chính trị, an ƀư lĕ n’hâm suan ăp trong tâm n’guăk kan, trong ntop kơl bah Trung ương, nkual ƀon têh gay rgŏ jă, ntop kơl ƀon lan tĭng ƀư jut jăng ji ngot, n’hŭch ach o.

“Âk rnăk hŏ nănh manh tơm prăk gay pơk hvi nău kan tuch tăm, geh âk rnăk jêng rnăk ƀư njêng tăch rgâl jăp blău. Ntĭt kơt rnăk yuh Blắc, rnăk nô Khánh hôm du đêt rnăk ta ăp thôn êng ƀa ƀă. N’gâng kan ta ntŭk nta trong dơh gay tuch tăm đah ngân hành chính sách, ngân hàng nông nghiệp n’hao âk tơm prăk manh gay kônh wa geh tơm prăk dŏng đăp mpăn ntop kơl hun hao tuch tăm mât rong”.

Nkual ƀon têh Đà Nẵng aƀaơ geh rlău 50.000 ƀon lan kan lŏ mir wăng sa jăp blău, tâm nê geh âk nuĭh ntĭt leo lor lah ƀon lan rnoi Cơ Tu. Ăp năm, Hội Nông dân nkual ƀon têh Đà Nẵng kan nsum đah ăp n’gâng kan, ăp ntŭk tâm dâng, Ngân hàng ntop kơl kônh wa manh tơm prăk deh prăk kon đêt, kơl an ntil tơm tăm, ndơ mât, kơl hội viên hun hao wăng sa. Âk rnăk ƀon lan lah rnoi Cơ Tu hŏ nănh ntuh kơl hun hao wăng sa rnăk wâl, rgop rdâk njêng ƀon lan mhe.