Ta du rơh livestream buăt nthoi tăch ndơ lŏ mir, yuh Đặng Thị Hồng Đào, nuĭh tơm ntŭk tăch Trà Nghinh Phong, ta phường Phú Yên, n'gor Dak Lak, nkoch ăp ndơ trà, mứt n'hanh dak sŭt chanh rse tă bah ntŭk nkra njêng. Tĭng geh nău tă ơm gĭt tăch rgâl, ndơ̆ ndơ tăch lăp du đêt ntŭk tăch n'hanh ntŭk pâl nđaih, yơn đah rnoh ƀư njêng hôm e đêt, lơn âk knơm tâm săk soan bah he, yuh Đào hôm e ŭch geh tay nuĭh kan n'hanh ăp trong tăch rgâl mhe. Livestream lah du trong gay yuh Đào ndơ̆ ndơ tât dăch lơn đah năch, joi trong pơk hvi ntŭk tăch rgâl. "Livestream lah he ŭch gĭt tât, ndơ̆ ndơ tât nuĭh dŏng, nta trong dơh tât nuĭh rwăt, pơk hvi ntŭk tăch rgâl. Aƀaơ rnăk tăch rgâl nkra njêng jêt, geh du hê dơm mô hŏ geh nuĭh hăn ndrel jêng mô hŏ pơk lĕ nău dơi, jêng nơm dŭt ŭch mâp dơi nuĭh hăn ndrel hun hao ntŭk tăch rgâl."

Bâh du nar mbơh tơih ndơ ta ntŭk mrô tât nău njêng ntŭk tăch rgâl đăp mpăn hôm nha geh nău tâm ƀah. Đah ăp ntŭk ƀư njêng jê̆ kơt bâh yuh Đào, công nghệ mbra pơk tay nău dơh nơih geh gĭt đah năch, yơn gay ma rgâl nău dơh nơih jêng nău dăn rwăt, mât đăp mpăn nău tăch rgâl n'hanh pơk hvi nău kan hôm nha knơm ta nău ueh ndơ, nău dơi pă an n'hanh nău dơi tâm rgop ntŭk tăch rgâl.

Ta du gâl êng bah trong nkra njêng, công nghệ dôl kơl du đêt rnăk ƀon lan kan lŏ mir lor nchrăp lơn tâm mât chăm tơm tăm. Rnăk vâl wa Lê Thị Yến, ta xă Ea Drăng, n'gor Dak Lak lĕ rgâl rnoh neh 5ha cao su kro ranh an tăm cà phê tâm breh sầu riêng. Ta rnoh neh aơ, rnăk vâl lĕ ntuh kơl trong tŏ ntruh nkre đah ŭnh nar đah lĕ rngôch rnoh prăk bơi tât du rmen prăk. Trong tŏ dơi ƀĭt joet bah ngai ma điện thoại, kơl nău tŏ dak dơh lơn, n'hŭch nsing tâm nău ƀư na nê̆ ta mir. Wa Yến an gĭt, nău kơt dŏng công nghệ kơl rnăk wâl mpêt nkrem nar mât chăm, nchrăp lor n'hanh săk rnglăy lơn tâm nău kan tuch tăm. "Aƀaơ 5 ha lĕ ntuh kơl ŭnh nar jêh nĕ tŏ ntruh, ntrŭp tâm điện thoại, rnôk gŭ ntŭk êng hôm pơk tŏ dơi đŏng. Dŏng khoa học kỹ thuật mhe rĭ nău geh âk lơn, bah năp nĕ geh 5 tấn cà phê/ha yơn aƀaơ hao 6 tấn/ha ma bah ir hoach prăk kan".

Bâh nău ƀĭt joet tŏ dak bâh điện thoại tât joi năch ta ntŭk trực tuyến, ăp nău dŏng aơ an saơ công nghệ mbrô dôl tĭng kơn geh ta nău pah kan jan sa, tăch rgâl bâh ƀon lan kan lŏ mir Dak Lak. Yơn nău dơi tât mô tâm ban. Mô di ăp rnăk geh tŏng prăk ntuh kơl ndơ dŏng kan êng; lŏ mô di ăp nuĭh ndơ̆ ndơ ta mạng dơi mât nău pah kan tăch rgâl ueh. Yor kơt nĕ, ta meng nău leo kan bâh ăp rnăk, nău ntĭm, tâm rgop n'hanh kơl an ƀon lan kan lŏ mir săch công nghệ tâm di đah nău ŭch ngăn geh geh nău khlăy. Ta xă Ea Drăng, Rmôt kan lŏ mir xă dôl tĭng kơn ndơ̆ công nghệ mrô lăp kan mât uănh, ƀĭt joet. Wa Vũ Thị Thúy Hòa, Kruanh Rmôt kan lŏ mir xă Ea Drăng nkoch mpeh trong ƀư bah Hội. "Gâp mbơh ƀư lĕ rngôch ma trong điện tử mrô. Bah rnôk nglăp nsum ngih pah kan tât aƀaơ lĕ rngôch ăp rnoh nău lư dơi rgâl ƀa ƀơ n'hanh na nao. Gay dơi ƀư nău nê ri bah năp nê gâp lĕ nti dŭt na nê̆, djôt ti ntĭm nău kan an tĭng đồng chí chi hội trưởng. Ntŭk nsing khlay ngăn bah xă Ea Drăng lah ân joi dơi nuĭh ƀon lan dôl ŭch moh ndơ gay nơm ntop kơl an di n'hanh an tâm di nău rƀŏng hội viên ƀon lan kan lŏ mir dôl ŭch mpeh tơm ntil, kon ntil đah uĕh jêng, rnoh khlay n'hanh geh tu tơm kloh rwah."

Đah nău tă ơm gĭt kan mbơh ƀư ta ntŭk, nău ŭch ndơ̆ luh mô dơn lah ndơ̆ ăp ndơ dŏng mrô tâm nău kan bah rmôt nuĭh, ma hôm nha kơl an hội viên dŏng công nghệ gay ma doh rklaih ăp nău ŭch geh na nê̆ tâm nău pah kan jan sa, tăch rgâl. Tâm 6 khay bôk năm aơ, ăp gâl kan Hội Nông dân n'gor Dak Lak lĕ kơl an bơi tât 2.000 rnăk ndơ̆ ndơ ta ntŭk tăch rgâl điện tử; rgŏ jă rlău 116.000 hội viên cài đặt, dŏng kơt ứng dụng Nông dân Việt Nam. Rlău 300 jrô nti nău kan khoa học kĩ thuật geh ƀư, geh bơi tât 27.000 rơh hội viên, ƀon lan kan lŏ mir tât râng. Wa Võ Duy Kha, Groi Kruanh Hội Nông dân n'gor Dak Lak an gĭt, Hội ndơ̆ luh nău rƀŏng ntop kơl ăp ntŭk nkoch n'hơ ndơ geh ƀư, ntĭm nti joi tu tơm n'hanh n'hao tâm rgop tăch rgâl.  "Mpôl hên lĕ rdâk njêng trong nchrăp rƀŏng tât ăp năm ăp xã, phường ân rdâk njêng dơi ăp clip gay nkơnh nsơ ndơ geh ƀư OCOP, ndơ geh ƀư tuch tăm ntoh lư an kônh wa ƀon lan kan lŏ mir, ntĭm nti ntop kơl ndơ geh ƀư tât bah 3 sao let lơ geh rup QR joi tu tơm luh, nkre tâm rgop đah ăp ntŭk kan tâm nău ton rwăt luh".  

Nău ngăn ân saơ, trơn rgâl mrô tâm nău kan tuch tăm mô êng lah ntrŭp ndơ dŏng ueh mhe mô lah ndơ̆ ndơ tăch tâm ăp ntŭk trực tuyến. Nău khlay lah nŭih ƀon lan kan lŏ mir geh nău săch dơi công nghệ tâm di, blău dŏng ndrel mât dŏng tâm nău ngăn lah mô; nkre, ăp ndơ dŏng nê geh kơl an khân păng n'huch oi prăk dŏng, n'hao nău nâp ueh ndơ ndrel tât đah ntŭk tăch ueh lơn đŏng lah mô. Rnôk nău dŏng công nghệ nkre đah nău ŭch geh na nê̆ n'hanh nsĭt tay săk rnglăy dơi kơp dơn, rgâl mrô mhe jêng suan ntrôl rgâl trong ƀư nkra njêng, tăch rgâl, kơl nuĭh ƀon lan kan lŏ mir Dak Lak tĭng kơn ƀư tơm công nghệ n'hanh n'hao rnoh khlay ndơ tuch tăm.