Kêng măng dŭt pơh, ngih rƀŭn nsum mpôl ƀon Dak Ndrung, xă Đức An, n'gor Lâm Đồng n'gŭr răm nău nteh chĭng gong. 25 nuĭh nti dơi ăp nghệ nhân na nê̆ ntĭm tĭng nău nteh chĭng, bah nău mât chĭng tât nău tŭr chĭng an tâm di nău nteh. Tĭng ăp mông nti, nău nteh chĭng mbrơi mbrơi jêng hăr blău, dăch dêh. Yuh Thị Hợi, rhơn nkoch: "Lor rnôk nti, gâp mĭn tŭr chĭng jêr ngăn. Yơn râng jrô nti aơ, gâp saơ mô jêr kơt nơm mĭn. Tât aƀaơ, gâp hŏ tŭr geh pe nău chĭng bôk năp. Dŭt rhơn yor gâp lĕ gĭt tŭr chĭng. Gâp mbra nsrôih tiăr nti tay gay rgop mât ndray văn hóa bah nơm".

Jrô ntĭm nti chĭng gong bôk năp geh nău ntop kơl bah n'gâng kan xă Đức An n'hanh n'gâng kan văn hóa n'gor Lâm Đồng. Jêh rnôk jrô nti lôch, ăp oh yuh hôm nsrôih mât tay mông nar tiăr nti ta jay văn hóa ƀon Dak Ndrung đŏng. Ƀa ƀơ tâm ăp măng dŭt pơh, oh yuh rgum nău kan mir ba, nău kan jay gay ndrel tiăr nti tay ăp nău chĭng, nkah tay ăp nău tŭr goh. Ăp mông tiăr nti nĕ lĕ kơl nău nteh chĭng mbrơi mbrơi jêng bên, lăp jru tâm nău rêh ƀon lan. Yơ Điểu Thị Huế - Groi Bí thư Chi bộ, Kruanh Ban pah kan Mặt trận ƀon Dak Ndrung nkoch:"Nung nar, oh yuh hăn luh mir jan ba, mĭn an rnăk wâl. Tât măng ri nchrăp rgum ta jay văn hoá gay nti tŭr chĭng. ăp nuĭh rhơn nđơr đŏng, dŭt n'hâm. Knơm nău mât uănh, ntop kơl n'hanh nta trong dơh bah N’gâng kan, Jrô kan Văn hoá, kônh wa mpôl hên geh tay nău dơi mât ndray, mât uĕh n'hanh ntik n'hao ăp rnoh khlay văn hoá way ơm bah rnoi nuĭh he".

Đah ăp nghệ nhân, nău trêng ntĭm chĭng mô di lah ntĭm dŏng du ntil ndơ uh goh, ma lah ndơ̆ tay lĕ ma nău rêh, kơl an rơh druh ndăm gĭt tĭng nău chĭng nteh tâm rnôk moh nar, moh nău khlay, gay bah nĕ n'hao êng săk ƀư ngăn tâm nău rêh bah ƀon lan. Tĭng ăp rơh tiăr nti, Nghệ nhân Thị Dryan ŭch geh tay âk nuĭh mom ndăm joi tât đah chĭng gong: "Xă Đức An lĕ nta trong dơh an ƀon pơk jrô nti tŭr chĭng gay ăp băl mom geh nău ŭch dơi kơt nti. Tă bah jrô nti, mpôl hên mpŏng ŭch trêng nti tay ăp nău chĭng ơm an rơh druh ndăm, gay kon sau mô chuêl ndơ ơm yău ma u che he mât ndray bah ăp rơh kơn".

Gay ntrŭt nsôr ăp nghệ nhân ntĭm nti tay ăp nău khlay văn hóa uĕh an rơh bah kơi, lôch n'glăp nsum xă, UBND xă Đức An lĕ n'gluh an dŏng nău ntrŭnh ntop kơl prăk khay ăp khay an bar Nghệ nhân Ưu tú bah ƀon Đắk N'Drung. Tâm nĕ, NNƯT Thị Phyơn, Kruanh rmôt njroh mprơ ƀon Đắk N'Drung, dơi ntop kơl rlău 3 rkeh prăk ăp khay. Đah wa, aơ lah nău uănh mĭn tŏng ăp ta trong mât ndray văn hóa M'nông."Gâp dŭt rhơn n'hanh lah uĕh Đảng, Ngih dak hŏ geh trong ntop kơl an gâp rlău 3 rkeh prăk 1 khay. Aơ lah tơm ndơ ntrŭt nsôr têh gay gâp mât ndray tay văn hóa way ơm. Gâp mbra ntĭm tay, trêng nti tay nău tŭr chĭng an rơh druh ndăm, ndơ̆ rmôt chĭng bu ur hun hao lơn, gay kon sau nthoi tay drăp ndơ ơm yău ntlơi an tay bah u che".

Ntơm bah ăp rnoh khlay văn hóa dơi mât ndray, xă Đức An dôl rƀŏng trong ndâk njêng ntŭk pâl nđaih nsum mpôl ta ƀon Đắk N'Drung. Năch mbra geh rnôk rlong uănh saơ chĭng gông, ăp lễ hội, nău kan cheh tanh n'hanh ndơ sa M'nông. Tâm nê, jay văn hóa nsum mpôl lah ntŭk rgum tơm, mpla nsơ ndơ dŏng way ơm, nkoch nău uĕh ƀon tơm n'hanh ăp nău ƀư văn hóa pâl nđaih. Wa Thị Rơi, Bí thư Chi bộ ƀon Đắk N'Drung, nkoch: "Nău rgŏ jă oh yuh, đoàn viên druh ndăm râng nti chĭng gong mô knŭng mât ndray săk tơm ma hôm n'hao nău tâm rnglăp nsum mpôl. Xă lĕ ntuh kơl rdâk njêng jay văn hóa mhe an ƀon, nta trong dơh gay kônh wa gŭ rêh, tiăr nti. Mpôl hên mpŏng ŭch ndơ̆ ăp ndơ dŏng, ndơ dŏng gŭ rêh way ơm lăp măt uănh ta aơ, gay rơh druh ndăm gĭt wât lơn mpeh văn hóa rnoi nuĭh".

Ntơm bah ăp mpang ty krêp chai yor duh phang mir ba, ăp bu ur Bunong ta ƀon Dak Ndrung dôl ntroh n'gôr, mât nuih n'hâm an nău nteh chĭng ƀon tơm. N'gâng ŭnh ta jay rgum rƀŭn nsum mpôl hôm mpoh ang ăp măng dŭt pơh, nău nteh chĭng n'gôr gră ƀư nău uĕh blău ƀon lan têh hvi ndrel đah nău hun hao bah ƀon tơm Đức An, Lâm Đồng.