Ta xã Bảo Lâm 1, nău tâm ban ŭch bah nuĭh ƀon lan dôl rgop droh rklai ngoăy tâm ăp jêr jŏt dŭt têh rnôk an ƀư ntung trong: đă ntrơn du. Âk nuĭh tơm rnăk lor rơih mpêr n’gar, ndơ rdâk bah năp jay gay jao neh an ntŭk ƀư gung trong. Geh ăp rnăk ân n’gluh prăk mô đêt gay rdâk, nkra tay, yơn hôm nsum suan đŏng yor an nău geh jŏ jong ma ntung trong nsĭt an tay. Yơ Cao Thị Nghệ, nuĭh ƀon lan xã Bảo Lâm 1, mpơl nău:

“Bol roh bơi rhiăng rkeh prăk, gâp hôm dŭt di nuih n’hâm đŏng. Oh nô rdâk ƀư trong dŭt rah rơch, ƀư ndăng măng nar, mih sial nha hôm ƀư đŏng”.

Nău tâm ban ŭch bah nuĭh ƀon lan kơl droh rklai jêr jŏt mpeh neh soih, nta trong dơh gay nuĭh tơm ndranh rgum nuĭh kan, ndeh rklư n’hanh ndơ dŏng ƀư. Ta ăp njăr trong dŏng an luh mir ba, nău rhuăt glêh mông nar ƀư lơn ma geh nkô̆ hôr khlay rnôk nuĭh ƀon lan bơi tât khay klêh cà phê. Wa Lê Quang Tuấn, ntơh măt nuĭh tơm rdâk mon, an gĭt:

“Mpôl hên rgum nuĭh kan, ndeh rklư, ndơ ntrŭp dŏng, nchrăp ăp tŏng ndơ dŏng kan gay ndăn ngăch ƀư trong. Oh nô leo tâm pleh ƀư, kơp lĕ ma bri măng, nsrôih ơm lôch jêh, n’glăp dŏng trong hăn, kơl kônh wa rsong hăn dơh ngăch tâm khay mih n’hanh rdeng cà phê tâm khay klêh”.

Nsrôih tâm pleh mông, n’hao âk mpôl kan bah nuĭh tơm ƀư ndranh ndeh nău tâm ban ŭch jao neh bah nuĭh ƀon lan dôl rgop ntrôl ngăch ƀư ntung trong. Aơ lah ăp ndơ khlay rnôk Lâm Đồng lăp tâm rơh ndăn ngăch n’gluh tơm prăk ntuh kơl năm 2026.

Wa Trần Đình Phước, Groi kruanh UBND xã Bảo Lâm 1 an lah, nău tâm ban ŭch bah nuĭh ƀon lan lah ndơ khlay gay droh rklai jêr jŏt mpeh neh ntu, ntrôl ngăch ƀư n’hanh n’gluh tơm prăk ntuh kơl:

“Gay njêng dơi nău tâm ban ŭch, mpôl hên hŏ kan nsum đah ăp jrô way blău kan, ntŭk mbơh nti ƀư rơh hop, rgŏ jă ăp rnăk ton rơih mpêr n’gar, jao neh soih. Geh ăp rnăk ân rơih lĕ ma gâl jay bah năp, mpêr n’gar ta neh hvi, yơn kônh wa hôm n’grŏ tĭng đŏng gay gung trong ơm dơi rdâk ƀư, ntrôl ngăch n’gluh tơm prăk ntuh kơl”.