Tây Nguyên neh ntu, trôk nar nđik uĕh n’hanh âk ntil ndơ gŭ rêh, lah ndơ geh gay gŭ mĭn, tăm rơ̆ jêng âk ntil tơm dak si, tâm nê geh ăp ntil tơm tâm di đah tăm ta n’hâm bri. Ntŭk soih hvi lôch n’glăp nsum pơk luh trong dơh gay buăt nthoi nkual tăm đah ntŭk nkret njêng n’hanh ntŭk tăch rgâl đŏng. Rlău ma sâm Ngọc Linh n’hanh Hồng Đẳng Sâm hŏ dơi năl rnoh khlay, ăp ntŭk ân sơch tay tơm geh rnoh khlay wăng sa, tâm di đah bri dak, mât ndray tơm gen n’hanh leo tăm glêh nar đah nău ŭch geh rvăt dŏng âk đŏng. Gay ntrŭt nsôr wăng sa tơm dak si, ân ntop kơl ntil, kỹ thuật n’hanh tâm nkrêp kan nsum rgum rvăt; nkre năl kloh nău dơi, nău dơn kan đah nsum mpôl, nuĭh tơm bri n’hanh doanh nghiệp đŏng. Wa Nguyễn Thị Thu Hà, Giám đốc ntŭk nchrăp kan bah Tập đoàn Trường Sinh an lah, tơm dak si Tây Nguyên hŏ geh du đêt nkual tăm têh yơn mô hŏ âk mpeh ntil tơm n’hanh n’glĕ ta trong ƀư mblâm dơm. Doanh nghiệp dŭt ŭch rŏng rdâk njêng tay âk nkual tăm n’hanh geh âk ntil tơm lơn, nkre đah nkret njêng jru:

“Mpôl hên mbra mô rlu n’glĕ ta nău ƀư mblâm ma ân nkret njêng jru ăp ndơ geh ƀư jêng kơt dak si, lha dak si gay ƀư njêng dak si mô lah ndơ ngêt mât njrăng n’hâm suan gay tâm pot tâm ăp ndơ geh ƀư êng ƀa ƀă. Mô dơn lah ăp ndơ geh ƀư dŏng bah trong ngêt, he mbra n’glăp tâm dak si nkrơ̆ mât chăm n’hâm suan đŏng”.

Âk nuĭh ntơh măt râng rgum nchră an lah, bah nău dăn đă ntuh kơl tât nkual tăm geh nău dơi hôm âk ntil ndơ ân ƀư tŏng ăp. Lor bôk năp, n’gâng kan ta ntŭk ân ra uănh tay, njêng bản đồ nkual săk geh, ƀư kloh tơm bri, nău geh bri dak, ntŭk ntô ndơ dŏng n’hanh trong tăch ndơ; ăp nkual ân geh trong mât njrăng bri, groi nđôi ring tam tât sĭt jêng tay bri dak, neh ntu n’hanh tu dak. Ndrel đah nê lah ntrŏng ndơ ƀư n’hanh ntŭk tăch lah nău ŭch tât geh lor rnôk sơch công nghệ, dăp rgum nkual tăm; ndơ tăm ân dơi uănh năl di săk ntơ, dak hóa học, rnoh geh đăp mpăn n’hanh ƀoi tơm luh tĭng rlô bri tăm. Wa Đoàn Ngọc Có- Groi Giám đốc Sở Nông nghiệp n’hanh Môi trường Gia Lai an gĭt:

“Tât năm 2030, đề án tăm rơ̆ jêng âk tơm dak si ta n’hâm bri geh nklăp 31.000 ha. Rnoh khlay bah tơm dak si Việt Nam dŭt khlay. Yơn lah, nău tăm rơ̆ jêng âk tơm dak si ân nkre đah tăch ndơ geh ƀư, nkret njêng n’hanh nta geh trong tăch luh ri mơ hun hao uĕh.”

Bah ăp nău rgop, dăn đă ta rnôk rgum nchră, ndơ̆ luh an Tây Nguyên lah ra uănh tay nkual tăm tâm di, sơch trong ntĭt leo geh nău dơi lor rnôk pơk hvi; nkre, tăm rơ̆ jêng tơm dak si ta n’hâm bri ân geh nău tât râng bah nuĭh ntuh kơl geh nău dơi tŏng ăp prăk kaih, công nghệ n’hanh trong tăch kloh rvah. Ntơm bah nê njêng luh ndơ bah tơm dak si geh rnoh khlay, kơl n’hao tơm geh wăng sa bah nuĭh ƀon lan, njêng jâng nsing an mât njrăng bri n’hanh tăm rơ̆ jêng tơm dak si jŏ jong.