Ntoh ngơi ta lễ nkah ndray, Tổng Bí thư, Kruanh dak Tô Lâm lah kloh, gay rđău đă neh dak hun hao, Đảng ân mô rlu rgâl mhe nău mĭn, hun hao lý luận. Rlău 30 năm, Hội đồng Lý luận Trung ương hŏ lah rjăp nău khlay ƀư bôk tơm tâm ôp tâm nchră mpeh lý luận chính trị; rgum nău gĭt blău bah ăp kruanh rđău kan, mât bôk kan, nuĭh khoa học, cán bộ đảng viên n'hanh Nuĭh ƀon lan. Neh dak dôl an ƀư Nghị quyết Đại hội Đại biểu lam dak tâl XIV bah Đảng, nsrôih tĭng ƀư ăp rnoh tât hun hao neh dak tât năm 2030 n'hanh năm 2045 n'hanh 100 năm bah kơi. Nău ŭch ndơ̆ luh lah hun hao ngăch, nâp dăng; n'hao nău dơi ƀư tơm, đăp mpăn nău rgâl hao, tâm ban tâm nău rêh jêng n'hanh nău rêh ƀon lan. Tổng Bí thư, Kruanh dak Tô Lâm dăn đă Hội đồng an ƀư tay nău lah rjăp n'hanh n'hao nău khlay ƀư tơm, n'gâng tơm tâm mĭn njêng lý luận, n'glôch jêh nău ngăn n'hanh mbơh kơl trong nchrăp bah Đảng, lor nchrăp n'hanh ban saơ ăp nău mhe. Hội đồng rgum gŭ mĭn ăp nkô̆ nău lý luận n'gâng tơm n'hanh ăp nkô̆ nău mhe, jăch ndăn bah neh dak, bah rơh mhe. Nkre hăn lăp jru rgâl mhe nău mĭn rđău đă trong ƀư, rgâl mhe mât bôk kan neh dak; nkra tâm ban ŭch tâm boh đah Ngih dak, ntŭk tăch rgâl n'hanh lam rêh jêng kon nuĭh; n'hao nău dơi tam, săk rnglăy dŏng tơm ndơ.