Ntơm ƀư nar 19/8/2025, lôch rlău du năm mbơh ƀư, nău nchrăp ƀư lĕ jêh, rgop n'hao nău dơi dŏng bah tach ndeh păr, tŏng đah nău ŭch wơt dơn ăp ntil ndeh păr mhe, n'hao boăt nthoi Gia Lai đah ăp ntŭk wăng sa, pâl nđaih tâm dak n'hanh dak bah dih. Tât râng n'hanh ntoh ngơi ta rơh lễ, Groi Thủ tướng Hồ Quốc Dũng rnê nău nsrôih bâh ta ntŭk n'hanh ăp ntŭk kan geh tât; nkre lah na nê̆, tach ndeh păr Phù Cát ndrel đah tach ndeh păr Pleiku lah n'gâng tơm ndơ dŏng khlăy gay ma rgum ntuh kơl, ntrôl an hun hao wăng sa, pâl nđaih ta nkual Tây Nguyên. Groi Thủ tướng đă n'gor Gia Lai tâm rgop đah ăp n'gâng kan, ntŭk kan mât đăp mpăn tach ndeh păr pah kan đăp mpăn, tâm ban; nchrăp pơk hvi ăp trong mpăr, dŏng săk rnglăy nău dơi tâm rgop dak lêng, bri n'hanh yôk prêh.