Rlau 70 năm, bu ranh Y Yơng Niê Kdăm, tâm ƀon Ea Mdroh, xã Ea Mdroh, n’gor Dak Lak hôm nsôih ma ăp nau kan nsum bah bon. Tâm ăp nar hăn rƀŭn ƀon, ăp nau nkoch bri ăp nar, wa nkah đă kônh wa mât nau tâm rnglăp, ƀư ueh nau ntrŭnh bah pháp luật, mât chăm nau hăn nti bah kon sau. Rnôk tâm ƀon lan geh tâm rkeh, wa  hăn bonh đă, kơl an ăp rnăk dơi geh joi nau ngơi nsum. Nô Y Knap, Kruanh ƀon Ea Mdroh nkoch, ăp nau ƀư bah bu ranh ƀon lah nau blau ueh ngăn gay ăp riwh mom kơt tĭng tâm rnôk ndơn nau kan tâm dâng:‘Săk gâp nơm ryơk ngăn nau rgop kan bah bu ranh Y Yơng tâm nau nkoch mbơh nau tâm rnglăp rnoi mpôl bah ƀon kŏ kơt lah tâm ăp nau kan nkoch trêng pháp luật mpeh nau rêh jêng, nau kan rklaih nau tâm rkeh, rjaih nau tâm ƀon lan. Đah kônh wa ri nau ngoqi bah bu ranh ƀon lah nau khlay. Nê kŏ lah du nau gay ăp rơh mom kơt hên kơt tĭng nti ndrel ƀư tĭng”.

            Ƀon Ea Mdroh hôm geh bu gĭt ma moh săk lah Ƀon Cháy, ndrel ma ăp năm khay nŭuh ƀon lan du nuih n’hâm tĭng cách mạng, ƀon geh bu su tâm rnôk tâm lơh. Rnôk aơ, geh 307 rnăk, đah 1.300 nŭih, âk ngăn lah rnoi Rđe. Ntơm bah nkuăl neh âk nau khuch, Ƀon Cháy rnôk aơ hŏ geh trong nâp, âk rnăk hun hao tăm cà phê, ăp nhoat rgâl nau geh jêng.

            Lah nŭih tâm krêp ma nkuăl căn cứ cách mạng kăl e, bu ranh Y Yơng râng saơ âk nau rgâl bah ƀon lan jêh rnôk neh dak đăp mpăn. Rlet rlau âk nau kan, bu ranh Y yơng mro nkah kônh wa mât nau tâm rnglăp, nkre kơl an âk lơn tât nau rêh rnôk aơ:

          ‘Bonh đă kônh wa ăp nau ntrŭnh, trong kan bah Đảng ndrel ngih dak. Kơt lah rnôk aơ gâp bonh đă kônh wa saơ nau tih ri nơm mô dơi tĭng, mât nâp nau ueh jêng, nau rêh ueh lăng. Ntơm bah rnôk tâm rnglăp mhe aơ ri kônh wa bonh đă geh nau tam, ngăn lah kon se, mât chăm ân kon nơm hăn nti tĭng nau ntrŭnh, trong kan bah Đảng ndrel pháp luật bah Ngih dak”.

            Xã Ea Mdroh rnôk aơ geh ndâk tă bah nau tâm rnglăp bah 3 xã Ea Mdroh, Ea Mnang ndrel Quảng Hiệp. Tâm 2 năm ma aơ, bah Bôk nau kan bah neh dak n’huch ach o nâp nâl, nkuăl hŏ kơl an geh 76 mlâm ndrôk me deh kon ân 38 rnăk. Lam xã hŏ huch geh 55 rnăk ach o, tâm nê geh 44 rnăk rnoi npôl đê̆. Tĭng wa Trần Doãn Tới, Bí thư Đảng uỷ xã Ea Mdroh, ăp nau ntrŭnh bah Ngih dak geh ntrŭnh geh tâm dăch ma nau ŭch geh bah ăp rnăk. Êp n’gâng kan ndrel rmôt kan, bu ranh ƀon, kruanh ƀon, nŭih bu rnơm geh nau dơi khlay ngăn tâm nau nkoch mbơh ăp nau jêr mpeh ƀon lan, nkoch trêng, bonh đă, pơk nau tâm tâm nuih n’hâm tă bah ƀon lan:

          ‘Bu ranh ƀon hŏ ƀư ueh nuih n’hâm cách mạng, lŏ lah laih ty nthoi jong bah Đảng ndrel n’gâng kan tâm nkuăl, geh ăp nau rgop têh tâm nau kan leo nau ntrŭnh, trong kan bah Đảng lăp tâm nau rêh bah ăp nar rƀŭn ƀon, ntĭm mbơh tay ân kon sau, rgop nau tâm rnôk ƀư ndâk njêng trong kan chính trị tâm thôn, ƀon, ƀư ueh nau hun hao văng sa rêh jêng ndrel ngăn lah nau mât ndrel ƀư ueh nau ơm yau bah ƀon lan. Aơ lah ăp nŭih leo trong lor gay ân rơh mom kŏ kơt lah kon sau tâm ƀon kơt tĭng’.

            Mô knŭng dŏng nau ngơi, ăp bu ranh ƀon, nŭih bu rnơm tâm ăp ƀon tâm Dak Lak hôm ndrel ma nau nkoch trêng bonh đă ƀon lan hun hao văng sa, rgâl nau rêh. Tâm Thôn Phước Tân, xã Tây Sơn, wa La O Lanh, rnoi Chăm, năm aơ 74 năm, hôm nsôih pah kan jan sa ndrel rânh nau kan nsum.  Wa bonh đă kônh wa mât nau tâm rnglăp, tâm rjaih tâm rkeh tâm ƀon lan, nkre mât chăm nau kan tuch tăm, ƀư tĭng nau kan mhe lăp tâm nau kan ndrel dŏng săk tam neh ntu. Wa La O Lanh ân lah, ŭch kônh wa rnơm ndrel kơt tĭng ri săk ranh ân leo trong lor, ngơi dơi ndrel ƀư dơi:

            ‘Lah nŭih bu rnơm ân geh leo trong lor, leo ƀư bah năp ƀon lan tâm ăp nau kan, leo trong tâm ntŭk nơm gŭ. Gâp bol ma săk lĕ ranh yơn hôm râng pah kan jan sa gay bonh đă kônh wa jut n’huch ach o, nsôih bonh đă nkoch trêng gay kônh wa ƀư tĭng, ndrel rklaih ach o nâp nâl”.

            Dak Lak rnôk aơ geh 1.546 thôn, ƀon, Tổ dân phố, đah 1.069 nŭih bu rnơm tâm ƀon lan. Đah nau nsôih tâm dăch, gĭt rbăng ndrel nau kan đah ƀon lan, rmôt aơ ƀư ueh nau dơi tâm nthoi đah n’gâng kan ndrel ƀon lan, kơl nau kan n’gâng kan tâm nkuăl 2 gưl ơm ƀư ueh nau kan ân săk tam.

            Wa Lương Nguyễn Minh Triết, Bí thư n’gor uỷ Dak Lak lah rjăp, tâm rnôk hun hao mhe, bu ranh ƀon, kruanh ƀon, nŭih bu rnơm lah rmôt khlay tâm nau ƀư nâp nau tâm rnglăp ăp rnoi mpôl:

            ‘Rmôt nŭih bu rnơm tâm ƀon lan, bu ranh ƀon, kruanh ƀon lah ăp nŭih tâm êp ma ƀon lan ngăn, gĭt nau ƀon lan ngăn ndrel kŏ geh nau ngơi gay ma bonh đă ƀon lan ngăn. N’gor mro ŭch rmôt kan aơ lŏ ƀư ueh nuih n’hâm leo trong lor, mât nâp nau kan bah ƀon lan. Ngăn ngên lah ntung nthoi rnơm ngăn đah gưl uỷ, n’gâng kan ndrel ƀon lan gay bonh đă ƀon lan ƀư ueh nau ntrŭnh bah Đảng, pháp luật bah Ngih dak, nkre nkoch mbơh bah ƀon lan đah Đảng ndrel n’gâng kan ăp gưl”.

            Nau ntrŭnh 307 bah Chính phủ, geh nau tam ntơm khay 9 năm aơ, lŏ ƀư n’hêl nau ntrŭnh đah nŭih bu rnơm tâm nkuăl rnoi mpôl đê̆, ngăn lah nau kan mbơh nau mhe, ntĭm nau mhe, nau blau dơi tâm nau bonh đă ƀon lan. Aơ lah nau dơi gay ăp nkuăl lŏ kơl an, ƀư ueh nau dơi bah ăp nŭih bu rnơm, kơl an khân păng geh tay nau dơi gay hăn ndrel ma kônh wa tâm nau hun hao văng sa, n’huch ach o ndrel ndâk njêng nau rêh ƀon lan nar lơn ma ueh lơn./.