UBND n’gor Lâm Đồng đă ăp n’gâng kan bah n’gor n’hanh n’gâng kan 124 xã, phường, đặc khu Phú Quý way tĭng groi nđôi lhăt nău lư nchroh lor trôk nar, nkah njrăng lor trôk nar lơh; ngăch mbơh tât nuĭh ƀon lan gay lor nchrăp njrăng der, đăp mpăn mpeh nuĭh n’hanh drăp ndơ.

Mpôl kan dơi kan rgum ra uănh tay ăp nkual ƀon lan meng dak lêng, meng dak me, dak diăng, nkual rđŭng dêh n’hanh ăp nkual geh ma nău băm dak bŭk, dak rchoh, pĭch rlâm neh. Ban Rđău đă Njrăng n’gang ƀon lan n’gor ƀư gŭ kâp ndăng măng nar, dơn nău lư tât trôk nar lơh ma Tổng đài 112; nchrăp ăp tŏng mpôl kan, ndeh rklư, ndơ dŏng tĭng trong rƀŏng “4 ta ntŭk”, nchrăp an kơl nuĭh, kơl nău tât rmoh rmanh nkhêp geh nău tât.

Bah năp nau tât bah mih têh, UBND n’gor Dak Lak ntrŭnh nau mbơh đă ndal mrô 6, đă ăp rmôt kan, nkuăl nchrăp ntrŭnh ƀư ăp nau kan njrăng, rdâng đah mih têh, dak lip, dak bŭk, rluh neh ndrel dak rchoh. N’gor đă ăp nkuăl ơm mêt uănh tâm ăp ntŭk mra tât nau khuch kơt lah, dak me, dak jăng, nkuăl rđŭng dêh, ntĭk mra geh rluh neh ân geh nchrăp ntrơn leo nŭih ƀon lan, ndơ dŏng, ndơ kơl; ƀư ntŭk njrăng rdâng tâm ăp ntŭk mra geh nau khuch bah trong hoch dak, băm jru, mô ân nŭih ndrel ndeh klơ hăn rley tâm ăp nkuăl tât jêr. Rđau kan n’gor Dak Lak đă ăp tơm mât njrăng nglau dak, thuỷ điện ân ƀư rjăp nau leo hoch, pă, đăp mpăn ntŭk ntu ndrel tâm nkuăl rđŭng. N’gâng kan ăp xã ndrel ăp rmôt kan geh tât nchrăp nau kan kơl an, rmôt kan, ndơ sa, dak ngêt ndrel prăk gay kơl an ƀon lan rnôk ntrơn du, ntrơn hăn ndal yor geh dak bŭk lơh.