Bol hŏ 75 năm deh yơn wa Thông Long hôm rong an lĕ n’hâm suan, nău gĭt blău an nău hun hao bah ƀon lan Chăm thôn Phú Thuận, xã Hàm Thuận Bắc, n’gor Lâm Đồng. Mô dơn dâk leo lor tâm hun hao wăng sa, rdâk njêng ƀon lan mhe, wa Long hôm ntik n’hao nău khlay kan lah găr ntil, nsrôih râng rdâk njêng lam trong kan chính trị, mât ndray n’hanh ntik n’hao ăp rnoh khlay văn hóa way ơm bah ƀon lan nuĭh Chăm. Bol mô ƀư kruanh ngăn tâm n’gâng kan ta ntŭk, yơn âk năm aơ, wa Long lah nuĭh dơi kônh wa tâm thôn nsing nơm rnôk geh ăp ntil nkô̆ nău ân nkra bah nău tâm rkeh.

Wa Thông Lạc, ta thôn Phú Thuận, xã Hàm Thuận Bắc nkoch, geh ăp nău n’gâng kan ta ntŭk mô hŏ năn rƀah gĭt, wa Thông Long hŏ ngăch tâm nkoch gĭt. Geh ăp nău tâm rkeh ntôn jêr nkra, ma nuih n’hâm uĕh di ngăn n’hanh trong nkra kloh rvah, păng kơl ăp ding joi geh nău tâm ban ŭch nsum.

“Rnăk wa Thông Long dŭt nsing nơm ta aơ, hôm wa Long way dăch dêh đah kônh wa, ăp nău păng lah yor an geh nsum bah ƀon lan jêng ăp nuĭh djăt tĭng da dê”.

Wa Thông Long, an gĭt, nău dŭt mpŏng ŭch bah păng lah saơ kônh wa tâm ƀon tâm rnglăp dơn ngoăy tĭng lam n’gâng kan, Ngih dak, chroh rƀŭn ân tâm uănh khlay nsum, saơ kônh wa tâm rnglăp du nuih n’hâm, păng dŭt rhơn.

“Gâp hăn rgŏ jă kônh wa ƀư tĭng trong nchrăp bah Đảng, pháp luật bah Ngih dak, mô ƀư tih pháp luật. Tâm ƀon geh tâm rkeh đah ăp rnăk ri gâp nsum ti ndrel mpôl mât bôk kan thôn tât nkra nău tâm rkeh mhâm ƀư an uĕh răm”.

Tâm ban kơt wa Thông Long đŏng, ăp năm mhe aơ, wa Huỳnh Cứng, Groi kruanh Hội đồng Chức sắc Bàlamôn giáo n’gor Lâm Đồng mô dơn tĭng ƀư jăp nău kan tâm nău rêh chroh rƀŭn, ma hôm nsrôih râng ăp trong leo ƀư ta ntŭk đŏng, jêng ntung njŏ đah n’gâng kan ta ntŭk n’hanh ƀon lan.

Đah nău ƀư lah groi Sư cả Quản hạt Bắc Bình (nkual Bắc Bình, Bình Thuận ơm), wa Huỳnh Cứng lah n’gâng tơm tâm trong leo “Chức sắc Bàlamôn giáo râng mât đăp mpăn rnă njrăng – yor an đăp mpăn nău rêh”. Ăp nău rgop bah păng, rgop n’hao dăng tâm boh krêp dêh đah n’gâng kan ta ntŭk, mpôl công an đah ăp kruanh chroh rƀŭn n’hanh ƀon lan Chăm.

Wa Huỳnh Cứng an gĭt, nău râng đăp mpăn rnă njrăng, rĭng grep lah nău dơn kan nsum bah ăp nuĭh ƀon lan, gay mât njrăng nău rêh uĕh lăng bah rnăk wâl, nsum mpôl n’hanh ƀon tơm.

“Săk gâp nơm mbra nsrôih ndrel đah n’gâng kan ta ntŭk, Mpôl mât bôk kan thôn Phan Hiệp rgŏ jă kônh wa Chăm ta aơ mât rnă njrăng đăp mpăn an păng uĕh lăng lơn. Lơi an ăp kon ăp său he jêh aơ tay tŭp tâm ăp nău tih tâm nău rêh kơt: tâm rlong ndeh, su chuh xì ke ma túy… kơt nê ri mô uĕh ôh”.

Ƀon lan Chăm n’gor Lâm Đồng geh rlău 43.000 nuĭh, gŭ rêh rgum âk ta 9 xã, lah: Tuy Phong, Liên Hương, Bắc Bình, Hồng Thái, Hàm Thuận Bắc, Hàm Thuận, Tân Thành, Sơn Mỹ n’hanh Tánh Linh. Ƀon lan nuĭh Chăm ta Lâm Đồng geh bar mpôl kruanh chroh tơm krêp nkre đah chroh rƀŭn bah khân păng, lah: Hội đồng Chức sắc Bàlamôn giáo n’hanh Hội đồng Sư cả Hồi giáo Bàni n’gor Lâm Đồng.  

Yơ Táo Thị Mộng Quyên, Kruanh Ủy ban MTTQ xã Bắc Bình, n’gor Lâm Đồng an gĭt, ăp kruanh chroh tâm ƀon lan Chăm nar aơ, mô dơn rgop mât ndray săk tơm văn hóa rnoi nuĭh, ma hôm lah mpôl kan khlay tâm nkoch trêng, rgŏ jă ƀon lan hun hao wăng sa, rdâk njêng nău rêh văn hóa, mât đăp mpăn rnă njrăng n’hanh rdâk nâp tay tâm rnglăp lam rnoi nuĭh.

“Ăp tung kuâng mpơl lĕ nău dơn kan bah he đah du hê kruanh chroh. Rlău ma nău rgŏ jă tĭng ƀư ăp trong leo tâm rlong ta ntŭk, hôm ntik n’hao dơi nău khlay mât đăp mpăn rnă njrăng n’hanh nkra bah nău tâm rkeh tâm dâng đŏng. Du đêt kruanh chroh râng tâm mpôl nkra nău tâm rkeh ta thôn, dâk leo gay nkra ăp nău tâm rkeh tâm rnăk wâl tâm ban kơt rnoi deh keh na, thôn ƀon đŏng”.

Nkoch tât nău khlay kan bah kruanh chroh nuĭh Chăm ta ntŭk, wa Võ Ngọc Hiệp, Groi kruanh UBND n’gor Lâm Đồng lah rjăp:

“Lôch tĭng djăt nău lư nsum tâm ban kơt nău tâm ôp đah ăp oh nô ta ntŭk ri ƀon lan kônh wa Chăm, hôm ăp sư cả, ăp kruanh chroh rƀŭn, nuĭh kơl kan dŭt nsing nơm tâm nău rđău đă bah Đảng, nău mât bôk kan n’gâng kan ta ntŭk, nsing nơm tâm ăp gung trong bah Đảng, ntơm bah nê tâm ban ŭch, du nuih n’hâm tâm trong wăng sa lor bôk năp lah gay nsan hao tâm nău rêh klaih rlău ach o, nar lơn ma nsan hao geh mbơm, têh ndrŏng”.

Đah nău ƀư bah he, ăp kruanh chroh rƀŭn dôl ndrel mpôl mât bôk kan ăp thôn geh âk ƀon lan Chăm bah n’gor Lâm Đồng ƀư jăp trong leo kan ta ntŭk, nkre krêp dêh đah ƀon lan, rgop tâm rơh rdâk njêng n’gâng kan bar gưl nar lơn ma nâp dăng.