N’gâng kan ăp ntŭk dôl ngăch ndăn mbơh ƀư ăp trong kan tâm rdâng, mbơh njrăng ƀon  lan leo kan mât an đăp mpăn . Ta Đăk Lăk, mih têh ƀư an du đê̆ nkual ƀon lan gŭ ta ta xã Mđrăk geh dak băm âk ntŭk. N’gâng kan  n’hanh ăp thôn, ƀon lĕ geh uănh năl kơl an ƀon lan ntrơn dăp ndơ, rgŏ jă ăp rnăk ta nkual geh nău tât ntrơn ta ntuk gŭ đăp mpăn lơn. Ta xã Cư Prao, mih têh ƀư dak băm âk ntŭk ta ăp ntŭk bât dak ler. Công an xã lĕ tât ntăm nău nchih mbơh njrăng drăng rse mô an kon nuĭh n’hanh ndeh klư hăn nsong ta ăp ntŭk geh nău tât jêr njrăng. Mih têh jŏ nar ƀư n’hao nău dak buk ta ăp dak me, dak diăng, dak rchoh, rluh neh n’hanh dak băm ta nkual rđŭng dêh. N’gâng kan ăp ntŭk mbơh njrăng ƀon lan mô hăn let ntung, ntŭk dak lêr, ntŭk dak băm jru mô lah dak dack hoch thăng, ƀư tĭng ăp nău mbơh njrăng mô geh rlet rlău ntŭk nking n’gang.

UBND xă Canh Vinh, n’gor Gia Lai mô an nuĭh n’hanh ndeh hăn rlău yôk Nha Sam jêh rnôk kơp dơn geh nău đang neh ta chor taluy yor mih têh tâm âk nar bah năp. Lah mih tay jŏ jong, neh dơi lêk đah dak, ƀư yôk sop mô đăp mpăn n’hanh ƀư neh lŭ rhung măt neh. N’gâng kan ta ntŭk lĕ geh samƀŭt mô an nuĭh hăn jâng n’hanh ăp ntil ndeh ta lvang aơ. Công an că Canh Vinh tâm rgop đah rmôt tahen pă kâp njrăng, n’hanh ntĭm trong hăn. Ndrel đah canh Vinh, aƀaơ, âk ntŭk tâm n’gor Gia Lai dôl geh pĭch rlâm n’hanh dak băm. Na nê̆, xă Tây Sơn năl geh 8 nkual geh dak băm n’hanh 11 trong geh dak băm. ta phường Quy Nhơn, rlău 30 rnăk đah 11 nuĭh ta 2 thôn Đức Phổ n’hanh Cát Khánh luh du nkual geh pĭch râm bah dâng jâng yôk Gành.