Ta phường Mũi Né, n'gor Lâm Đồng, rmôt pah kan hăn ăp ntŭk bah Công an n'gor hăn tât jay wa Nguyễn Thị Tiếp, 79 năm deh, gay sŏk ntil sinh phẩm ADN. Wa Tiếp geh bar hê nô lah tahen ơm khĭt Nguyễn Văn Nô, khĭt năm 1968 n'hanh Nguyễn Văn Ốm, khĭt năm 1973. Rlău n'gul rach năm aơ, rnăk wâl hôm e mpŏng joi dơi nting bah bar hê tahen ơm khĭt. Nău dơi sŏk ntil ADN dĭl ta jay hŏ ntop tay nău mpŏng joi tay nuĭh bên. Wa Lê Thị Tư, kon bu ur wa Tiếp, rngot nkoch:

Băng: "Rnăk wâl dŭt rhơn rnôk dơi sŏk mham ADN. Aơ lah nău ŭch bah rnăk wâl bah jŏ, yơn bah năp đaơ mô hŏ dơi ƀư. Aƀaơ, rnăk wâl mpŏng mbra ơm joi gĭt mpeh nuĭh bên".

Kŏ tâm phường Mũi Né, rnăk vâl wa Trần Văn Hùng kŏ ê geh joi saơ nting tahen Trần Văn Năm, nô păng, khĭt tâm năm 1966. Jêh âk năm kâp, wa Hùng ŭch nau kan sŏk ndrel tâm rđil ADN mra kơl an rnăk vâl gĭt năl ntŭk môch bah nuĭh nơm:  "Nău kơl sŏk ntil mham ADN gay joi, năl săk tahen khĭt dŭt geh nkô̆ khlay. Rnăk wâl mpŏng ơm joi tay dơi nuĭh bên, geh ntŭk gay nkah gĭt, mbah ryơk, kŏ lah nău rhơn n'hanh nău mpŏng jŏ jông aơ".

Tâm lvang 1 Nău kan 500 nar măng, n'gor Lâm Đồng lĕ ƀư 32 rơh uănh nđôi, mpôl kan dơi kan lĕ joi, rgum geh 26 nting tahen ơm khĭt, sŏk ntil mham rhŏ an uănh năl ADN đah 17 nŭh. Nkre lah, ƀư lôch sŏk ntil mham 3.625 nting geh tŏng nău dơi ta 11 nghĩa trang liệt sĩ, ơm lơn nău nchrăp 3 khay. Công an n'gor Lâm Đồng hôm nha geh sŏk 1.371 ntil mham ADN bâh nŭh tâm rnăk vâl tahen ơm khĭt.

Mbơh ƀư rơh 2 aơ, Lâm Đồng nchrăp sŏk nklăp 1.074 ntil sinh phẩm ADN bah rnăk wâl tahen khĭt. Prăm mpôl pah kan dơi njêng, geh 3 mpôl gŭ kâp n'hanh 3 mpôl hăn ăp ntŭk, na nê̆ tât jay ăp nuĭh rnăk wâl âk năm deh, geh nău ji jru mô lah jêr hăn nsong. Ndrel đah sŏk ntil, mpôl công an tâm rgop đah n'gâng kan ƀon lan ôp uănh, năl di nău lư, rgŏ jă ăp rnăk wâl râng, đăp mpăn mô geh ntlơi ăp nuĭh tŏng nău dơi. Đại úy Hoàng Đăng Hải, Jrô kan Cảnh sát Mât uănh hành chính mpeh đăp mpăn lam rêh jêng kon nuĭh, Công an n'gor Lâm Đồng, an gĭt:  "Săk gâp nơm dơi tâm pă mât uănh du rmôt pah kan hăn ăp ntŭk, na nê̆ tât jay sŏk ntil ADN bah nuĭh bên tahen khĭt. Mpôl hên râng đah nuih n'hâm dơn kan âk, nsrôih, nsrôih ƀư lôch jêh uĕh nău kan dơi jao".