^{Đah ăp nău nchrăp ƀư sŏk loih kônh geh nău mha êng, ntoh măt Đặng Đức Hiệp, Groi Kruanh rmôt kan ntoh măt Quốc hội n'gor Lâm Đồng, đă gŭ mĭn trong ƀư sŏk mplơ̆ neh geh năm mô lah Ngih dak manh neh bah nuĭh ƀon lan. Tĭng ntoh măt, nau kan sŏk joi bô-xít tâm rnoh neh têh hvi tâm Lâm Đồng geh tât âk rnăk ƀon lan, tâm rnôk nău sŏk dŏng dŭt âk geh ta rnoh neh măt tâm ntŭk, geh mông nar n'hanh dơi mplơ̆ tay neh. Lah sŏk mplơ̆ neh jŏ jong, prăk trok tâm, ntrơn ntŭk gŭ mhe n'hanh mra ƀư jêr jŏt âk đah tơm prăk. Ntoh măt Đặng Đức Hiệp dăn đă:  "He ân mĭn uănh đŏng nău sŏk mplơ̆ neh geh năm mô lah Ngih dak dŏng neh bah ƀon lan gay đăp mpăn an nău kan sŏk loih kông. Kơt nĕ nkre n'hŭch prăk dŏng an, nkre n'hŭch prăk trok tâm, ntrơn ntŭk gŭ mhe, ntrơn ntŭk êng; n'hŭch dơi rnoh sŏk joi gay đăp mpăn nău tâm rlong an ăp ndơ geh ƀư jêh aơ tay. Nău aơ an geh mĭn uănh ntop tay ta luật gay ma njêng nău nơih ngăn an nău kan sŏk joi loih kông n'hanh ngăn lah sŏk joi bô xít ta Lâm Đồng".}

 ^{Ntoh măt Bùi Xuân Thống, Groi Kruanh rmôt kan ntoh măt n'gor Đồng Nai, đă ƀư kloh nău ntrŭnh mpeh neh bri, nkra nău tâm rkeh rnoh nchih rgum đah n'gâng kan neh ntu n'hanh n'gâng kan mât njrăng bri. Wa nkre dăn đă mât nau dơi bah nŭih ndơn tăch, ndơn rgop tơm prăk đah nau dơi dŏng neh dŏng neh n'hanh drăp ndơ geh nsum đah neh, đăp mpăn dơi dŏng tay di nău ŭch dŏng. Tă bah nău ngăn geh ta Đồng Nai, wa dăn đă:}"Bah nau ngăn ta Đồng Nai, du đê̆ nkuăl geh nau ŭch sŏk dŏng loih kông ƀư ndơ rdâk njêng an ăp ndơ ƀư khlay, tâm rnôk aƀaơ rnoh dŏng neh geh lĕ ma neh tăm tơm jŏ năm, neh tăm tơm ăp năm êng. Yor kơt nê̆, dăn đă mô nchâp đă knŭng đah bri ƀư si lah bri tăm ma gŭ mĭn tĭng trong rƀŏng lĕ rngôch ăp ntil neh tâm di, tâm nê geh neh tăm tơm jŏ năm, n'har neh tăm tơm ăp năm êng gay njêng ntŭk nsing pháp lý dŏng ăp nău geh ngăn".

^{Mpeh trong rƀŏng nkra rgâl luật, Thủ tướng Chính phủ Lê Minh Hưng an gĭt nchrăp ƀư nau nchră Luật neh ntu rgâl nkra rgâl dŭt âk trong tâm pă ntil neh, rgum tâm pe rmôt tơm lah neh tuch tăm, neh mô dŏng tuch tăm n'hanh neh nchrăp an hun hao. Trong ƀư rnoh nchih aơ kơl an pah kan dăp rgum n'hanh mât uănh ngih dak, ntơm bah sŏk mplơ̆, jao, an manh neh tât ntrơn nau dŏng neh, kơp prăk dŏng neh, prăk manh neh ndrel pă săm ƀŭt kơp dơn nau dơi dŏng neh. Mpeh nau trok tâm, kơl an ndrel ntrơn ntŭk gŭ, Thủ tướng đă dăn đă rgâl bah nău mĭn trok tâm drăp ndơ geh sŏk mplơ̆ jêng ndâk tay nău rêh an nuĭh ƀon lan:  "Nau nchrăp luật ntrŭnh, nŭih geh neh geh sŏk lơi geh trok tâm đah neh geh nsum nau dŏng đah nau dơi sŏk lơi neh êng, ngih gŭ mô lah trok tâm ma prăk. Tal bar lah dơi kơl an ntrơn ntŭk gŭ mhe ta ntŭk đah ăp nău nchrăp ƀư nkual ƀon têh. Tâl pe lah dơi trok tâm neh gŭ geh sŏk mplơ̆ an neh hôm ƀa ƀă bah neh mô lah rgâl rnoh neh êng mpeh tâm nău dơi dŏng neh bah nơm tâm nkuăl gưl xã ntŭk geh neh sŏk lơi. Êng ma nău pă ntŭk gŭ, ngih gŭ, hôm lah rơh gŭ, nău rêh jêng, ntung trong kơt ndơ dŏng ơm yau, ngih sam ƀŭt, ngih dak si ri kơt nĕ mơ đăp mpăn mât nau dơi ndâk tay nau rêh ân ƀon lan rnôk Ngih dak sŏk lơi neh".}

^{Ndrel đah nău kơl trok tâm, rnoh khlăy neh lah nkô̆ nău khuch tât na nê̆ tât nău dơi nuĭh ƀon lan, prăk dŏng bah ntŭk kan tăch rgâl n'hanh tơm prăk. Rnoh khlăy neh an geh mât đăp mpăn ngăn ngên, tâm di, mbơh kloh rvah, nsing tâm neh ntu n'hanh nău way kan, nkre tâm ban ŭch nău geh đah Ngih dak, nuĭh dŏng neh n'hanh ntŭk ntuh kơl. Rgop mpeh nkô̆ nău aơ, Kruanh Quốc hội Trần Thanh Mẫn dăn đă ƀư lôch jêh uĕh trong ƀư rnoh khlay neh tĭng trong tâm di đah ntŭk tăch rgâl yơn hôm e đăp mpăn, kloh rvah, der bah nău rnoh neh hao ndal ƀư prăk trok tâm n'hanh prăk dŏng n'har neh hao prêh, khuch tât rnoh ngăch ăp trong nchrăp ƀư: "Ntop tay nău đăp mpăn nău geh Ngih dak, nuĭh dŏng neh, tơm ntuh kơl; geh rnoh rgâl nkra nkual rnoh khlay neh di na nê̆. Rnoh khlay neh ri tâm 5 năm mô lah ngăch lơn lah mbơh ơm trong nkra rgâl tâm năm rnôk geh nău rgâl ndal. Ntrŭnh nau mêt uănh lah ân geh ƀư êng, mbơh kloh nau kan ndrel nau geh dŏng. Ƀư kloh dŏng rnoh khlay, jêh nĕ rnoh an trok tâm, prăk dŏng, manh neh, der rnoh lŏ hao khlay. Ndâk njêng ntŭk mât prăp rnoh khlay neh gưl neh dak tâm rgop, mbơh ƀư ăp nkô̆ jŏ jong lah n'hŭch nău tâm rkeh, roh huach prăk kaih, n'hŭch jâk an ntŭk kan tăch rgâl, nuĭh ƀon lan; njêng dơi nău nchrăp lor an ntŭk tăch rgâl”.}

 ^{Ăp nău rgop ta ngih rƀŭn an saơ, nkra rgâl Luật neh ntu ân nkre đah nău ngăn, lơn lah ăp nău khuch tât nău rêh n'hanh nău dơi bah nŭih ƀon lan. Ƀư jêh nau kan trok tâm, ntrơn ntŭk gŭ mhe, rnoh neh n'hanh nau kan sŏk lơi neh mô knŭng rgop nau rklaih nau jêr tâm nau mât, dŏng neh ma hôm hôm an geh mât đăp mpăn tâm ban nău geh đah ngih dak, nuĭh ƀon lan ndrel ntŭk kan tăch rgâl, njêng jâng nsing an hun hao văng sa - rêh jêng kon nuĭh nâp dăng./.}