Dăp rgum nkual ƀon têh Buôn Ma Thuột tât năm 2050 geh nklăp 37.738 ha, geh lĕ rngôch n’har neh hành chính bah 5 phường: Buôn Ma Thuôn, Tân An, Tân Lập, Thành Nhất, Ea Kao n’hanh xă Hòa Phú. Nău n’gluh an ndâk njêng Buôn Ma Thuột jêng nklang nkual rgum, nău way kan gưl nkual n’hanh gưl n’gor; bôk trong boăt nthoi đah Tây Nguyên n’hanh duyên hải Nam Trung Bộ. Nkual têh hun hao tĭng trong ueh, mhe, âk nău ueh n’hanh tâm di đah rgâl trôk nar.

Ngoăy tâm âk ntŭk dôl uănh bah dăp rgum ƀư ta ntŭk ntô nkual ƀon têh jêng6 phân khu, 9 ntŭk nklang, 2 trong tơm khlay n’hanh 2 trong hun hao. Tâm nĕ, phường Buôn Ma Thuột lah nklang nkual ƀon têh, đah nkual nklang aƀaơ n’hanh nklang nkual rgum mhe ta nkual n’glău dak bât Ea Tam. Ăp nkual ƀa ƀă dơi nchrŏng đah nău dŏng êng. Phường Tân An hun hao tăch rgâl, nău rhŏ, ntĭm nti n’hanh ƀon lan ueh mhe; phường Tân Lập lah nkual ƀon têh mpeh bah lơ luh nar. Phường Ea Kao sŏk n’glău Ea Kao ƀư tơm hun hao pâl nđaih sinh thái, tăch rgâl, nău rhŏ, công nghệ n’hanh ntĭm nti. Phường Thành Nhất dơn uănh ƀư tơm ntop kơl n’hoch ƀon lan an nkual nklang aƀaơ. Xă Hòa Phú dơi nchrŏng trong hun hao công nghệ kloh ueh, logistics ndơ lŏ mir.

Nău mbơh dăp rgum nkual ƀon têh Buôn Ma Thuột tât năm 2050 lah ntŭk khlay gay Dak Lak n’hanh ăp ntŭk na nê̆ hun hao, ndâk ƀư nkual ƀon têh n’hanh rgŏ jă prăk ntuh kơl. Wa Đỗ Hữu Huy, Kruanh UBND n’gor Dak Lak mĭn lah, dăp rgum nkual ƀon têh Buôn Ma Thuột tât năm 2050 mô knŭng uănh trong hun hao mhe an nkual ƀon têh nklang Tây Nguyên ma hôm pơk hvi ntŭk ntô boăt nthoi đah yôk prêh n’hanh duyên hải Nam Trunbg Bộ. "N’gor mĭn mbơh dăp rgum an hăn ndrel đah nău ƀư tĭng săk rnglăy, rgŏ jă tơm prăk, mbơh ƀư ăp nău nchrăp ƀư khlay n’hanh tŏng ăp hun hao tâm ban, nâp nâl. Lôch jêh bah dăp rgum mô knŭng tĭng tâm nău uănh hun hao ma hôm knơm tâm nău dơi ƀư. Du nău ntrŭnh an ƀư na nê̆ đah nău kan, du nău tâm ton an dơi rgâl na nê̆ săk rnglăy, du nău dơi hun hao an rgâl đah nău ƀư hao jêng mhe”.

Dăp rgum nsum nkual ƀon têh Buôn Ma Thuột tât năm 2050 pơk luh trong uănh n’hanh ntŭk ntô hun hao mhe an nkual ƀon têh nklang Tây Nguyên. Gay ƀư tĭng trong uănh aơ, nău khlay lah nsrôih tâm rmôt kan ƀư tĭng, rgŏ jă tơm prăk n’hanh mbơh ƀư tâm ban ăp nău nchrăp ƀư, tĭng gưl ndâk njêng Buôn Ma Thuột jêng nkual ƀon têh kloh ueh, mhe, geh âk nău ueh ơm, tâm di nklang boăt nthoi nkual.