Nglôch lôch nău ntrŭnh 67 bâh n’gâng kan Chính trị, Nghị quyết 72/2022 /QH 15 bâh Quốc hội mpơl nău mât kơl khlăy bâh Trung ương, njêng  ntrong mper kơl kan n’hanh rnoh kan gay ma rdâk njêng Buôn Ma Thuột jêng nkuăl ƀon têh tơm nklang ta Tây Nguyên. Ăp nău kơl aơ lĕ nta ntrong kan chính trị bôk năp tơm, pháp lý khlăy gay ma Đăk Lăk an lor rnoh ntuh kơl, hun hao Buôn Ma Thuột. Dŭt nkah, Nghị quyết 72 geh nău ntrŭnh 5 rmôt kan tơm khlăy mpeh tơm prăk, nău nchrăp kan, geh âk ntuh kơl n’hanh nuĭh kan blău. Tâm nĕ, nău kơl mpeh ntop an 45% rnoh dŏng ƀa ƀơ lĕ geh n’hao săk rnglăy na nê̆.

Lvang năm 2021-2025, lĕ rnoh prăk ntuh kơl hun hao lam ntŭk rêh jêng ta nkuăl ƀon têh Buôn Ma Thuột geh rlău 125 rbăn rmen prăk. Ndơ dŏng ntung trong nkuăl ƀon têh, trong hăn, dak si, ntĭm nti geh mât kơl, ăp nkual công nghiệp geh âk nău kan , ntop kơl ndâk nsơm nău kan tơm khlăy bâh nkuăl ƀon têh.

Yơn lah, wa Cao Đình Huy, Giám đốc sở tài chính n’gor Đăk Lăk an lah, nau geh hun hao ê hŏ tâm di đah nău dơi geh. Tâm 10 nău mpŏng kan tơm, geh 5 nău mpŏng ê hŏ tâm di. Nău wăng sa nkuăl ƀon têh ê hŏ geh leo kan, ê hŏ geh âk nuĭh ntuh kơl n’hanh nău nchrăp kan têh. Công nghiệp nkret ƀư, logistics, pâl nđaih ueh n’hanh tâm rgop ta nkual hôm nha mô âk. “Geh 3 nău kan ê hŏ geh nău ntoh luh nău dơi geh. Bôk năp lah nău kơl n’hao rnoh rnon an manh ê hŏ geh ntoh rnoh manh, tal 2 lah kơl soăy nău geh doanh nghiệp ê hŏ geh nău kan tŏng nău dơi n’hanh tal 3 lah nău kơl geh âk nuĭh tât kan, nuĭh kan khoa học ê hŏ geh âk tât kan”.

Bâh nău geh nglôch lôch nău ntrŭnh 67 n’hanh Nghị quyết 72, Đăk Lăk đă Trung ương an geh ndơn tay, rgâl mhe tay nău kan ăp ntrong lĕ geh ƀư n’hao nău geh săk rnglăy, mĭn uănh ăp ntil nău kan ntop tay mpeh ndơ dŏng ntung trong, rgâl mhe rnoh mbrô, khoa học, công nghệ, logistics n’hanh tâm rgop ta nkual. Đăk Lăk lĕ dăn đă pơk hvi nău kan ntop kơl an 45% nău rnoh dŏng ƀa ƀơ, tâm di đah nău hun hao mhe, ndrel đah ăp nkual tơm gay ma hun hao bâh Buôn Ma Thuột-Buôn Hồ n’hanh Tuy Hoà- Đông Hoà.

Wa Lương Nguyễn Minh Triết, Bí thư n’gor Uỷ Đăk Lăk uănh năl, ăp nau way kan ma Trung ương pă an Buôn Ma Thuột lag nău dơh nơih n’hanh nău dơn kan têh ngăn bâh ta ntŭk. Tâm rnôk ta n’gor Đăk Lăk mhe geh ntŭk ntô hun hao têh hvi, nău ndơn tay ăp nău kơl kan aơ an geh ndrel đah nău nchrăp kan nsum nkuăl ƀon têh Buôn Ma Thuột tât năm 2050, n’hao nău tâm rgop n’hanh n’hao nău ƀư tơm rnglăy bâh nkuăl ƀon têh đah lam nkual. “Nău ntrŭnh lĕ geh, nău nchrăp kan lĕ geh mbơh tơih, ăp nău kan tơm khlăy ngăn hôm nha lah nău leo ƀư. Mơh nău I lĕ dơi ƀư rĭ an geh năl nkô̆ nău, mơh lơh mô dơi, mơh lơh ê hŏ geh uănh năl na nê̆, mơh bâh ntŭk nău dĭng mô dơi mô uănh na nê̆, nkô̆ nău bâh ntŭk”.

Wa Nguyễn Đức Trung, groi kruanh rnâng kan nău kơl kan n’hanh ntrong kan tơm bâh Trung ương lah na nê̆ nău way kan tơm khlăy ngăn kanŭng geh ƀư ngăn ngên tam rnôk hăn ndrl đah nău dơi leo kan n’hanh nău dơi rgum leo kan, dŏng âk săk rnglăy geh kan tơm. Trung ương kơp dơn, kơl an ăp nău dăn đă bâh n’gor, yơn an geh mbơh săch nău kơl kan geh nău tơm khlăy, doh rklaih di nău kŏ văk, geh nău uănh năl na nê̆ geh nău tât n’hanh nău dơi kan khlăy di.  “Ntrong kan kơl an way kan kanŭng geh n’hao săk rnglăy dơi tam rnôk geh njêng kan tâm di đah nău ŭch ngăn n’hanh hăn ndrel đah nău dơi leo kan ƀư tĭng n’hanh nău dơi rgum dŏng an săk rnglăy ăp rnoh kan. Nău kan tơm lah nău dơi an geh, hôm nău leo ƀư mơ lah nău ntrŭnh khlăy ngăn”.

Nău geh ƀư lôch tay ăp nău kơl kan khlăy gay ma hun hao Buôn Ma Thuột mô dơn gay ma doh rklaih ăp nău jêr năp lor, ma hôm nha njêng nău nsrôih gay ma nkuăl ƀon têh n’hao nău ƀư tơm, săk rnglăy tâm rgop n’hanh leo hun hao wăng sa- rêh jêng bâh n’gor Đăk Lăk mhe n’hanh lĕ nkual Tây Nguyên. Yơn lah, bâh nău ntrŭnh, nău kơl tât nău geh ngăn hôm nha an geh du nău nsrôih răng dăng, leo kan n’hanh nău kan rjăp tâm ntŭk leo ƀư kan. Aơ mbra lah nău kan tơm khlăy gay ma njêng ăp nău dơi nău geh mpeh ntrong kan, rnoh kan jêng ăp nău rgâl mhe ngăn ngên, ndơ̆ Buôn Ma Thuột hun hao an tâm di đah nău dơi ta nkuăl ƀon têh tơm nklang.