Dak Lak aƀaơ geh 104 săm ƀŭt an sŏk joi lŭ choih hôm geh nău tam, tâm nĕ geh 12 săm ƀŭt an dŏng nău nchrăp ƀư ntuh kơl nsum, 14 săm ƀŭt n'hanh kơp dơn sŏk joi lŭ choih tâm nkual ăp nău nchrăp ƀư ndâk ƀư, đah lĕ rngôch rnoh âk rnoh dơi an sŏk rlău 8.2 rkeh m3.

 Êng tâm 3 khay dŭt năm 2026, nau ŭch bah 44 ntŭk kan, nau kan ndrel nkuăl nklăp 690.000 m³. Lơn âk nău nchrăp ƀư hŏ năl dơi tơm ndơ, yơn du đê̆ ban mât uănh lŏ ntoh nau mô tŏng lŭ, rnoh ndơ ndâk nkra tâm ntŭk tăch hao khlay. Wa Đỗ Hữu Huy, Kruanh UBND n'gor Dak Lak mĭn lah, nău aơ lah yor du đê̆ ntŭk mô hŏ dơi ndơ̆ an dŏng yor kol săm ƀŭt neh ntu, ntŭk ntô gŭ âm; nkra njêng rnoh pă an ta du đê̆ ntŭk mô tŏng.

Kruanh UBND n'gor Dak Lak đă tĭng groi nđôi lĕ rngôch nău kan bâh ntơm sŏk dŏng, tăch rgâl tă bah ăp ntŭk ƀư nau kan n'gâng tơm tât nchuăn rdeng ndơ. Rnoh mrô ƀư mpeh nkra njêng rnoh âk, hóa đơn điện tử, nau kan soay ndrel nau kan nchuăn rdeng ân geh tâm nthoi, tâm ban; dŏng nau kan mrô, nau blau njêng mhe n'hanh rup vệ tinh gay saơ ntŭk ntu mô tâm di, ngăn lah nau kan sŏk joi rlau nau dơi, sŏk joi tâm măng mô lah kơp dơn lŭ choih sŏk dŏng mô tâm di.

Đah rnoh tăch, Kruanh UBND n'gor Dak Lak đă ntŭk kan dơi kan mbơh rnoh khlay ndơ dŏng năn ngăch, tâm di ngăn tĭng ntŭk, kơp di prăk dŏng sŏk joi, nkra njêng tăch n'gluh n'hanh nchuăn rdeng; mô an rnoh khlăy mbơh rnoh khlay rlău ir rnoh ntŭk tăch rgâl, ƀư jêng ntrŭt rnoh khlay rlău ăp gưl ntŭk tăch. Ăp ntŭk tăch rgâl ân geh nchih kloh rnoh, tăch ndơ di rnoh tăch rgâl, an di rnoh khlăy; mô ntŭng rmuănh, nchăm ndơ ƀư mô tŏng ndơ tăch, tâm ton nchih rnoh khlay mô lah ntrŭt rnoh khlay rlău ntŭk tăch rgâl, ntŭk kan nchuăn rdeng:

"Tâm rơh tât rđau kan Uỷ ban mra n'hao nau hăn mêt uănh ngăn tăch rgâl rgum tâm săm ƀŭt ƀư kloh, nau dăng, rnoh âk, tu tơm rnoh khlay tăch, rnoh tăch, nchuăn rdeng, jêh nĕ nău kan prăk kaih n'hanh nău pă an ăp nau nchrăp ƀư. Ngăn lah nău uănh nđôi ăp ntŭk geh nău rgâl rnoh khlay ndơ mô tâm ban, nău nkoch mbơh mô tŏng, rgum âk ndơ geh nău tih. Rnôk geh nău mpơl tih ri mbơh an Kruanh UBND n'gor đă ăp ntŭk kan uănh nđôi, uănh năl rmal rjăp tĭng nău ntrŭnh."