N’gul khay 10, yuh Bàn Mùi Diết, nuĭh mpôl Dao, ta thôn 12, xă n’har bri Ia Rvê, geh măt bah ơm ta Ngih UBND xă gay râng săch dơn neh gŭ. Sai hăn pah kan ta dak bah dih, yuh gŭ jay mât rong 2 hê kon jêt. Jay dôl gŭ manh ƀư ta nĕ me bơ̆. Nău rêh nsing tâm tăm biăp, mât djăr, prăk geh mô tŏng. Yor rĭ, nău dơi dơn neh gŭ jêng yuh mô dơi mpôn nău răm rhơn. “Oh dŭt lah răm rnôk dơi ngih dak an neh gŭ, neh tuch tăm kơt aơ oh dŭt răm n’hanh lah ueh Ngih dak dŭt âk ngăn”.

Ndrel nău răm nsum nĕ, wa Đặng Tòn San, ta thôn 13, lĕ geh bơi 10 năm rêh ta n’har bri Ia Rvê yơn rnăk wâl mô geh neh gŭ, neh tuch tăm. Gay năp nău rêh, wa San hăn kan manh bu, ƀư kan ăp ntŭk. Rnôk Ngih dak mbơh ƀư nău ntop kơl neh ntu, wa San mpŏng kâp tĭng nar dơi dơn neh, tă bah nĕ, dơi ƀư sa đăp mpăn ta ƀon lan dâl. "Bah năp đaơ gâp mô geh neh, aƀaơ Ngih dak ntop kơl neh an kônh wa, dŭt lah uĕh, bah năp đaơ gâp hăn kan bu, aƀaơ geh neh hôm ri ƀư sa ta aơ dơm."

Đah ăp rnăk ƀon lan kơt yuh Diết, wa San, neh gŭ lah ndơ gay đăp mpăn gŭ âm; neh tuch tăm lah ntŭk nsing gay tĭng kơn ƀư tơm nău rêh, n'hŭch knơm tâm nău kan hăn kan bu tĭng yan. Tĭng kơp uănh bah xă n'har bri Ia Rvê, lam xă geh 155 rnăk ân dơi ntop kơl mpeh neh ntu n'hanh samƀŭt pháp lý mpeh neh ntu.

 Tâm nĕ, 92 rnăk mô tŏng neh gŭ, neh tuch tăm; 6 rnăk lĕ geh neh tuch tăm yơn mô hŏ geh neh gŭ, ndrel âk rnăk an geh kơl ƀư lôch nău kan pháp lý mpeh nău dơi dŏng neh. Ƀư tĭng nău ntrŭnh mbrô 104 bâh Thủ tướng Chính phủ mpeh hun hao wăng sa - rêh jêng nkre đah mât đăp mpăn rnă njrăng, mât đăp mpăn ta nkual Tây Nguyên n'hanh Nghị quyết mbrô 28 bâh HĐND n'gor Dak Lak mpeh nău kơl neh ntu đah ƀon lan rnoi đê̆, xă Ia Rvê rdâk njêng trong kan pă neh an tâm di đah nău ŭch geh ngăn ngên.

Nkual neh gŭ dơi dăp rgum geh rnoh hvi nklăp 8 ha, njok trong hăn let thôn bah thôn 8 tât thôn 10, pă jêng 198 lô. Tĭng trong nchrăp, ăp rnăk dơi pă an 400 m², geh 200 m² neh gŭ n'hanh 200 m² neh tăm tơm ăp năm.

Lor rnôk an ƀư, rnoh moh săk ăp rnăk dơi dơn, bản đồ dăp rgum na nê̆ n'hanh ăp nău ntrŭnh geh tât dơi nchih mbơh kloh rvah tâm 15 nar ta nhih pah kan UBND xă. Ban mât uănh êng ăp thôn lĕ mbơh na nê̆ gay nuĭh ƀon lan gĭt, râng rgop nău. Rơh sŏk uănh nđôi n'gul khay 10 an 28 rnăk mô hŏ geh neh gŭ, dơi ƀư mbơh kloh rvah đah nău uănh saơ bah n'gâng kan ƀon lan, Mặt trận Tổ quốc n'hanh nuĭh ƀon lan.

Wa Nông Văn Gióng, Kruanh thôn 4, xă Ia Rvê, an gĭt tâm rơh bôk năp tĭng ƀư Bôk nău rgop an tâm nchră 104, thôn geh 6 rnăk dơi dơn neh. Aơ lah ăp rnăk geh nău rêh dŭt jêr jŏt, gŭ rêh ta ntŭk âk năm yơn mô hŏ geh neh tuch tăm n'hanh đăp mpăn ntŭk gŭ. "Dơi geh nău uănh mĭn bah Đảng n'hanh Ngih dak 6 rnăk ƀon lan aơ dơi ngih dak pă neh aơ ri nuĭh ƀon lan dŭt rhơn nđơr. Aƀaơ tât sŏk neh ta ntŭk, 6 rnăk ta ntŭk thôn gâp luh bah ơm ôi n'hanh hăn dŭt âk".

Geh neh gŭ mhe knŭng nkra du gâl jêr jŏt. Gay nuĭh ƀon lan ngăn ngên đăp mpăn nău rêh, geh ndơ ma hao rklaih luh ach o, xă Ia Rvê dôl ƀư lôch jêh samƀŭt pă an 266 ha neh tuch tăm ta ăp thôn 7, 12 n'hanh 13. Tĭng trong nchrăp bah ta ntŭk, ăp rnăk nchrăp geh pă an 1 ha. Ndrel đah neh tuch tăm, xă mbra mbơh ƀư ăp trong ntop kơl prăk manh thuk, ntĭm kỹ thuật, săch tơm tăm, mpa rong tâm di đah nău geh êng n'hanh nău dơi tuch tăm bah tĭng rnăk.

Wa Nguyễn Huy Tiến, Bí thư Đảng ủy xă Ia Rvê, an gĭt ta ntŭk mbra kơp uănh tay nuĭh, rnoh neh n'hanh ntrôl ngăch ƀư tĭng nău kơl, nkre ntop kơl neh ntu đah trong mkra nta joi nău rêh an nuĭh ƀon lan."Tâm let năp tay Đảng ủy, Ủy ban nhân dân xă ntĭm rđău ntŭk kan wăng sa mbra kơp uănh tay gay ma ƀư pă neh gŭ n'hanh neh tuch tăm, gay ma kơl an ƀon lan geh ndơ ma pah kan jan sa gay ma tuch tăm, ntop mât đăp mpăn nău rêh ta nkual n'har bri xã Ia Rvê. Ndrel đah pă neh, xă hôm nha geh ăp ntrong kan gay ma mbơh tơih ăp ntrong kan rêh jêng, rgâl nău pah kan jan sa gay ma ƀon lan đăp mpăn nău rêh, hăn ndrel jŏ jong ta nkual n'har bri."

 Ntơm bâh ăp lôk neh bôk năp tât nău nchrăp pă neh tuch tăm, nău kơl an neh ntu ta Ia Rvê dôl tĭng kơn mpŏng tât doh rklaih nău ŭch ngăn ngên bâh ƀon lan rnoi đê̆. Nău dơi bâh nău kơl kan mô dơn geh ta rnoh rnăk geh pă neh, ma hôm nha geh ta nău dơi kơl an ƀon lan geh ngih jay gŭ đăp mpăn, geh ndơ pah kan jan sa n'hanh njêng nău geh jŏ jong. Aơ lah nău khlay gay ƀon lan đăp mpăn ndâk nău kan, tâm dăch ma nkuăl n'har bri, rgop nău hun hao văng sa - rêh jêng ndrel mât nâp rnă njrăng tâm nkual.