Ta nkual rnoi mpôl đê̆, neh gŭ, neh tuch tăm n'hanh nău kan hôm geh lah ăp nau kan geh ƀon lan, cử tri uănh khlay ngăn. Cử tri Puih Kơk, tâm ƀon Ia Grăng 1, xã Ia Grai, n'gor Gia Lai, ŭch Ngih dak geh nău kơl an tâm di đah ăp rnăk jêr jŏt."Ŭch Ngih dak uănh mĭn tât neh gŭ n'hanh neh tuch tăm bah kônh wa, kơl lor ăp nuĭh geh nău rêh dŭt jêr jŏt, pă joi nău kan ta ngih, ta ƀon gay pơk hun hao wăng sa ta ntŭk".

Ndrel nau mĭn rvê mpeh nau rêh, cử tri Rơ Mah Nhiên, tâm ƀon Ia Răng 2, xã Ia Grai, ŭch geh tay nău kan ta ntŭk, bah ir nău nuĭh kan mom hăn kan dak tâm ntŭk ngai:"Nău kan ta ntŭk mô geh, ăp băl mom ta Gia Lai hăn kan ngai dŭt âk, nău kan ƀư ta ntŭk mô geh. Mpŏng Đảng, Ngih dak uănh mĭn tay tât nkô̆ nău aơ gay kơl kônh wa hun hao wăng sa jêh aơ tă".

Cử tri Ndong Brừm, nuĭh K'ho ta xã Đam Rông 3, n'gor Lâm Đồng, mpŏng kâp Quốc hội an lor tơm ndơ hun hao nkual rnoi mpôl đê̆, lơn lah ntung trong n'hanh ăp nău kơl an nău rêh jêng:"Ŭch Quốc hội uănh khlay ntuh kơl ntung trong, dak si, ntĭm nti n'hanh ntop kơl kơl nău kan ân nuĭh ƀon lan; tâm pă tơm ndơ an tâm di gay n'hŭch tâm ƀah hun hao tâm ăp nkual, kơl kônh wa rklaih ach o nâp nâl".

Ăp nau đă tă bah tâm dâng kŏ ndŏ luh nau đă ƀư jêh nau kan neh ntu, mât đăp mpăn nău dơi tâm di bah nuĭh ƀon lan n'hanh droh rklaih jêr jŏt tâm rnôk ƀư. Cử tri H Nhip Bkrông, rnoi Rđe ta ƀon Cuôr, xã Ea M'Droh, n'gor Dak Lăk, ŭch ơm rklaih sam ƀŭt pă an sam ƀŭt kơp dơn dŏng neh:"Me bơ̆ pă an gâp 4 sào neh dăch ủy ban xã gay ƀư sa, yơn tât aƀaơ mô hŏ dơi pă nkhah săm ƀŭt kơp dơn dŏng neh. Gâp ŭch dơi geh săm ƀŭt moh săk nơm, gay ma đăp mpăn pah kan jan sa".

Ta nkual mper dak lêng, cử tri mpŏng ăp nău ntrŭnh mpeh ntuh kơl nsum an lor ndơ ƀư nău khlay, nkra ăp nău mô hŏ dơi ƀư jŏ jong, mât njrăng nkual ƀon lan gŭ bah năp trôk nar lơh. Cử tri Nguyễn Văn Mẹo, ta khu phố Từ Nham, phường Sông Cầu, n'gor Dak Lak, dăn đă ndăn nkra kơl nking n'gang rluh neh.

 "Ăp năm, dak bŭk lăp dŭt jru, ƀư ƀon lan bĭch mô đăp ăp rnôk tât khay mih phŭt sial. Dăn đă Quốc hội, Trung ương uănh kơp uănh ndâk ƀư mpir dak gay mât njrăng nuĭh ƀon lan".

Đah ăp ntŭk dak lêng, gôl dak, nău ŭch hun hao wăng sa nkre đah mât đăp mpăn neh dak, rnă njrăng kŏ geh cử tri uănh khlay ngăn. Wa Phạm Thanh Liêm, Kruanh UBND đặc khu Trường Sa, n'gor Khánh Hòa, đă lŏ ƀư jêh nau ntrŭnh ƀư nau kan, hun hao wăng sa dak lêng n'hanh trong ƀư êng an nkual gôl dak."Ŭch Quốc hội lŏ ƀư jêh nau kan hun hao văng sa dak lêng, kơl an ƀon lan joi ka, ntuh kơl ndơ dŏng kơl an lơh joi ka. Êng đah đặc khu Trường Sa, ŭch Quốc hội mât uănh tay, ƀư lôch jêh nău kơl êng gay wăch rgum tơm ndơ kan, ndâk ƀư ntung trong nsum mpôl, rhŏ dŏng hun hao wăng sa - rêh jêng kon nuĭh đah nau ƀư nâp nâl neh dak, rnă njrăng".

 Tĭng nău mbơh bâh Ủy ban Trung ương Mặt trận Tổ quốc Việt Nam, hŏ geh rlău 2.800 nau rgop, nau đă bah cử tri, ƀon lan lam dak njoăl tât rơh rƀŭn tal bar, Quốc hội khóa XVI. Cử tri n'hanh Nuĭh ƀon lan hôm e mĭn rvê bah năp nău rlăm jru ta trong mạng, lơn lah nău dŏng nău blău mĭn njêng kon nuĭh gay rlăm nchih mbơh nău lư, rnoh mrô gay ma sŏk dŏng drăp ndơ; rvê mpeh nău kloh ueh đăp mpăn ndơ ngêt sa, khuch djơh ntŭk ntu gŭ âm; rnoh ngăch nkra sam ƀŭt hành chính ta du đêt ntŭk hôm mbrơi….Ủy viên Bộ Chính trị, Kruanh Ủy ban Trung ương MTTQ Việt Nam, Bùi Thị Minh Hoài đă:"Dăn đă Chính phủ, ăp nhih pah kan dơi kan, ăp ngor n'hao dăng hăn ôp uănh, uănh nđôi, mêt rjăp gay ngăch ban saơ n'hanh mhal rjăp ăp nău ƀư tih mpeh ndơ rlăm, dak si rlăm, ndơ ngêt sa rlăm, tih mpeh kloh ueh đăp mpăn ndơ ngêt sa n'hanh ăp nău ƀư ƀô djơh ntŭk ntô gŭ âm; dăn đă Quốc hội, Chính phủ djăt ntĭm rđău ƀư lôch jêh tâm ban trong kan pháp luật n'hanh rgum dôh rklaih ăp jêr jŏt khăn, wăk kol tâm nău kan neh ntu, trok tâm, ntop kơl ntŭk gŭ mhe, ndâk ƀư tay nău rêh rêh mhe an nuĭh ƀon lan rnôk ƀư sŏk mplơ̆ neh”.

 Ăp nău dăn đă bah Tây Nguyên tât ăp nkual neh dak mpơl nău ŭch rŏng ngăn ngên bah cử tri, nkre ndơ̆ luh nău đă gay Quốc hội djăt tay, uănh rjăp n'hanh ntrŭt ntrôl mkra geh nău tam ăp nkô̆ nău bah ngăn ngên, tŏng đah nău nsing nơm n'hanh nău mpŏng ŭch bah ƀon lan./.