Ta Pôih tahen n'har bri mpông n'har bri quốc tế Lệ Thanh, trong leo ƀư "Ăp pơh kơl du rnăk ach o nkual n'har bri" dơi an ƀư đah 52 đảng viên mât uănh 132 rnăk ƀon lan, dŭt âk lah rnăk ach o. Tahen ntop kơl nar kan, ntĭm nti nuĭh ƀon lan mât tơm tăm, rgâl uĕh mir tơm, n'hao săk rnglăy nkra njêng. Yuh Hi Kri, rnoi nuĭh H'rê, rnăk ach o ta ƀon Bi, xă Ia Dom, n'gor Gia Lai, lah ngoay tâm ăp nuĭh dơi geh mpôl tahen n'har bri ntop kơl. Nău hăn ndrel, ntĭm nti dŭt n'hâm bah ăp nuĭh tahen kơl an rnăk vâl yuh Hi Kri geh tay nau dơi rgâl nau kan tuch tăm ndrel nau rêh:  "Rhơn ngăn, gŭ đah tahen ri rhơn ngăn. Gŭ ta n'har bri ri rnăk wâl gŭ đŏng dăch đah tahen, tahen kơl an rnăk vâl kŏ âk. Rnăk vâl lah ueh ngăn."

Mô knŭng hăn ndrel đah nuĭh ƀon lan tâm pah kan, tuch tăm, cán bộ, tahen sĩ Đồn Biên phòng mpông n'har bri quốc tế Lệ Thanh hôm uănh mĭn mât uănh ăp rnăk wâl nău kơl, nuĭh geh soan đah cách mạng. Ăp khay rmôt hăn chop khâl, pă nklâm ndơ, but uănh săk soan n'hanh pă dak si an dơm an ăp rnăk dơi kơl ta ntŭk. Ăp nău ƀư tâm rŏng rgop mât chăm nău rêh, mpơl nău dơn kan nău kan bah nuĭh tahen đah ăp nuĭh lĕ nsơr soan, khĭt yor nău kan mât njrăng bri dak. Tahen sôt rmanh 4/4 Rơ Chăm Nich, ta thôn Moóc Đen, xã Ia Dom, nkoch. gĭt na nê̆ nău tâm rnglăp nĕ bâh ăp rơh geh tahen tât ôp khâl, kơl rnôk kop ji n'hanh tâm ăp rơh lễ, Tết: "Ji kuet lah ma mô năn hăn ngih dak si ri hăn ngih dak si ntŭk ƀon Bi bah nkual n’har bri. Lah nsum oh nô biên phòng nar lễ, nar tết ri way hăn tât dơm. khâl rnăk wâl, pă nklâm ndơ. Oh nô ta ntŭk kơt nĕ dơm, ăp nuĭh tâm rŏng, tâm uănh khlay da dê."

 Bah meng ăp nău ƀư na nê̆ tâm mât chăm nău rêh, pah kan rgŏ jă hôm rgop gưl n'hao dăng nau tâm boh đah ƀon lan đah rmôt ƀư nau kan mât nkuăl n'har bri. Đại úy Trần Tuấn Linh, Chính trị viên Groi kruanh Đồn Biên phòng Mpông n'har bri quốc tế Lệ Thanh, an gĭt, rmôt kan mbơh ƀư âk nău kan rƀŏng sĭt tât tâm dâng kơt ndâk ƀư rdâk ƀư jay tâm rŏng, jay tâm rnglăp, ôp khâl rnăk dơi kơl, ntop kơl prăk n'hanh hun hao wăng sa. Tă bah nĕ, nuĭh ƀon lan geh tay ndơ đăp mpăn nău rêh jêng, nkre n'hao nău gĭt êng, nău dơn kan tâm rgop mât đăp mpăn rnă njrăng đăp mpăn ta ntŭk.  "Tă bah ăp ntrong ƀư kơl ƀon lan hun hao wăng sa ri nuĭh ƀon lan nkuăl n'har bri kŏ geh nau rnơm đah tahen biên phòng. Ngăn lah ndrel ma tahen n'har bri kơt lah du "n'gâng n'har rêh" pah kan, tuch tăm, hăn rlău nkual n'har bri ri tâm rgop đah Tahen n'har bri, mpôl kan dơi kan ta nkual nkual mpông n'har bri đăp mpăn rnă njrăng, đăp mpăn lam rêh jêng kon nuĭh."

Njok trong n'har bri n'gor Gia Lai, pah kan mât chăm nău rêh nuĭh ƀon lan way geh hăn ndrel đah nău kan rgŏ jă ƀon lan râng mât njrăng trong n'har bri, n'gâng n'har bri. Ta Pôih tahen n'har bri Ia Puch, cán bộ, tahen ƀa ƀơ gŭ kâp njrăng ta ntŭk, tâm rgop đah gưl ủy, n'gâng kan ƀon lan n'hanh ăp nuĭh nsing nơm nkoch trêng, rgŏ jă ƀon lan n'hao nău njrăng, lor nchrăp râng mât đăp mpăn rnă njrăng. Trung tá Nguyễn Đăng Dũng, Rmôt rgŏ jă ƀon lan, Pôih tahen n'har bri Ia Puch, nkoch:  "Nau kan ăp nar ri vay hăn jŭr ôp, pe mât puăn ndrel đah ƀon lan, jêh nĕ lah mbơh nchră an bu ranh ƀon, kruanh thôn ŭch ƀon lan, jêh ri râng tâm nchră mbơh đah gưl ủy, n'gâng kan ƀon lan n'hanh cán bộ tahen n'har bri lah mât đăp mpăn rnă njrăng. Ndrel đah nê ri kŏ bonh đă, nkoch trêng kônh wa mât chăm pah kan jan sa."

Ndrel đah nău tĭng ƀon lan, gĭt nău ta ntŭk, ăp bôk nău kan kơt "N'hao jâng chuat oh tât ngih sam ƀŭt", "Kon rong pôih tahen", "Ngih răm n'har bri" n'hanh nău ƀư khâl, kơl an ƀon lan rơh lễ, tết lŏ rgop nau ƀư nau kan đăp mpăn rêh jêng kon nŭih, mât uănh rơh druh ndăm n'hanh rnăk wâl hôm e jêr jŏt. Wa Siu H'Ler, Bí thư Đảng uỷ, Kruanh HĐND xã Ia Puch, lah rjăp, nau tâm boh đah tahen đah gưl kan uỷ, n'gâng kan n'hanh ƀon lan nar lơ dơi nâp nâl, njêng suan dăng rgum nsum tâm hun hao wăng sa - rêh jêng kon nuĭh nkre đah mât njrăng nhar bri.   "Ăp đồng chí tâm rmôt tahen n'har bri ƀa ƀơ nchrăp lor tâm rgop ndrel ăp nau kơl mbơh ân gưl uỷ, ntrŭnh ăp nau kan geh tât đăp mpăn rnă njrăng n'har bri. Nkre lah, kơl an ƀon lan jut jăng ach o, ndâk njêng ƀon lan mhe, tâm rgop đah ăp mpôl kan mât njrăng rnă njrăng đăp mpăn neh dak."

 Nău ngăn ta ăp ntŭk n'har bri an saơ, mât njrăng ƀư tơm, rnă njrăng neh dak, rnăk wâl mô knŭng nsing tâm nau kan mêt uănh, nkân njrăng ma hôm ân geh nau tâm ban nuih n'hâm, nsum mpôl ƀon lan. Rnôk nuĭh ƀon lan nsing nơm, lor nchrăp kan nsum đah mpôl rnoh nuĭh kan, n'har bri lam ƀon lan dơi nâp nâl ntơm bah tâm dâng. Đại tá Đoàn Ngọc Báu, Chính uỷ Rnâng kan rđau tahen Biên phòng n'gor Gia Lai mbơh, aơ lah n'gâng tơm gay ăp ntŭk n'har bri mât nâp đăp mpăn, nta trong dơh hun hao tuch tăm n'hanh n'hao nău rêh kônh wa ăp ƀon lan:   "Mbơh ƀư ăp trong kan mât uănh nâp nâl ta ntŭk, lôch nê lah mât uănh" gĭt ăp ntil nuĭh gay nchrăp ma mât đăp mpăn nkual n'har bri, đồng rơh hun hao mât rong, tuch tăm gay kơl ƀon lan hun hao wăng sa nau vay tâm nau rêh jêng."

Mât nâp nău ƀư tơm, rnă njrăng n'har bri n'hanh mât chăm nău rêh nuĭh ƀon lan lah bar nău kan tâm rgop na nê̆. Bah ăp nar pah kan kơl ƀon lan tuch tăm, nău tâm pă đah ăp rnăk dơi kơl tât nău rgŏ jă ƀon lan râng mât njrăng trong n'har bri, n'gâng n'har bri, Tahen n'har bri n'gor Gia Lai dôl rgop nâp nâl nuih n'hâm n'har bri, ndâk njêng nkual n'har bri đăp mpăn, nâp nâl. Rnôk nau rêh nar lơn geh mât chăm, nău nsing nơm n'hanh nău dơn kan bah nuĭh ƀon lan đah nău kan mât njrăng n'har bri tâm ban kơt dơi rdâk nkra tay, njêng jâng nsing gay nkual n'har bri Gia Lai hun hao nâp dăng./.