Ăp nar rlău aơ, mpôl Công an n'gor Dak Nông hŏ lơh chrai mbro ăp rơh tâm ntul sa prăk nchroh chưng play; tâm nê geh rnoh prăk tâm ntul nchroh rlău 600 rmen prăk. Geh 2 chuyên viên ăp Sở ta n'gor Dak Nông geh tât mât bôk kan tâm ntul nchroh chưng play sa prăk.

Nar 6/12, Kruanh rđău kan n'gor Dak Nông hŏ tât nkhôm rnê an ăp cán bộ tahen Phòng An ninh mạng n'hanh njrăng, n'gang nuĭh tih dŏng công nghệ cao ndrel Công an 2 nkuâl Dak R’lấp n'hanh Dak Glong, ăp đơn vị 5 rkeh prăk, yor geh nău dơi ngăch prăl tâm nău rlăch ndăng, lơh chrai 3 rơh tâm ntul nchroh chưng play sa prăk. Bah năp nê, ăp nhih pah kan Công an n'gor hŏ dơi Bí thư Tỉnh ủy Dak Nông nkhôm ndal 120 rkeh prăk lôch lơh chrai rơh tâm ntul nchroh chưng play sa prăk rlău 600 rmen prăk.

Tĭng ƀư nar rgum rdôl lơh mpôl tih djơh, mât đăp mpăn, rnă njrăng Tết Nguyên đán Qúy Mão 2023, lơn lah tâm rnôk  ƀư World Cup, Công an n'gor Dak Nông hŏ rlăch ndăng, lơh chrai mpôl tâm ntul nchroh chưng play sa prăk ma trong mạng Internet dŭt têh bah ntơm tât aƀaơ ta n'gor dja. Công an Dak Nông hŏ nhŭp kân 17 nuĭh, sŏk mplơ̆ 04 máy tính ndjôt ti, âk tài khoản ngân hàng, điện thoại, máy tính ndjôt ti, ndeh ô tô…, bôk năp hŏ năl dơi rnoh prăk tâm ntul nchroh chưng play sa prăk rlău 600 rmen prăk. Dŭt njrăng lah tâm rnoh ăp nuĭh geh ban nhŭp geh Lương Ngọc Thành - chuyên viên Sở Tài nguyên n'hanh Môi trường n'gor Dak Nông, n'hanh Nguyễn Ngọc Trung - chuyên viên Sở Kế hoạch n'hanh Đầu tư n'gor Dak Nông. Lương Ngọc Thành (deh năm 1993) dơi năl lah nuĭh n'gâng tơm, mât na nê̆ ăp nău kan bah mpôl tâm ntul nchroh chưng play sa prăk bơi 600 rmen prăk.

VOV Tây Nguyên/Nuĭh rblang: Điểu Thân