Ăp nar dŭt khay 3, ta trong têh hăn ngăch Khánh Hòa-Buôn Ma Thuột, lvang rlău Tiểu khu 1148, neh bri thôn Ea Rớt, xă Cư Pui, nkuăl Krông Bông, rlău 30 kơp dơn ndrel âk ndeh têh bah Công ty CP Tập đoàn Đạt Phương dôl ndăn ƀư. Nô Vũ Đức Hùng, cán bộ mât uănh mpeh kỹ thuật bah công ty an gĭt: Aơ lah ndơ ndranh XL03 mpeh tâm nău nchrăp ƀư gưl 2, đah 14km rlŏ rlău bri tât mpông trôm mŭr trong neh Phượng Hoàng. Yơn lah, tât dŭt khay 9 năm e, công ty mư dơi jao an neh ƀư, ƀư mbrơi nklăp 30%.

Công ty dôl ƀư 2 ding mpông Tây n’hanh mpông Đông. Mpeh mpông Tây ƀư bah khay 9/2024, dŭt âk ƀư ntung n’hanh trôm mŭr mpeh mpông Đông mhe mbơh ƀư bah khay 2/2025 n’hah knŭng mhe geh đêt %, nău kan dŭt âk lah kuih mbuh neh. Aƀaơ hôm geh wăk kol rlău 3 ha neh bri hon êng ta gưl neh ntop tay mô hŏ dơi rgâl. Mpôl hên mpŏng ŭch dơi rgâl ngăch gay ƀư dơh.

Nău nchrăp ƀư gưl 2 geh dĭng lĕ rnoh ntuh kơl rlău 10.436 rmen prăk, jong bơi 40 km, ntơm bôk bah nkual têh Ninh Hòa, n’gor Khánh Hòa, rlău ăp nkuăl M’Drắk, Krông Bông n’hanh Ea Kar bah n’gor Dak Lak. Aơ lah nău nchrăp ƀư gưl geh prăk ntuh kơl têh ngăn, yor Mpôl mât uănh nău nchrăp ƀư 6-N’gâng kan Xây dựng ƀư tơm ntuh kơl. Yơn lah, ngăch ƀư ta aơ aƀaơ mbrơi bah 12%-27%, bôl tĭng gưl ndranh.

 Wa Nguyễn Thanh Tú, Groi Mpôl ƀĭt joet ăp nău kan Tập đoàn Đèo Cả, an gĭt ăp naư kan dôl ƀư ndơ XL01, jong 11 km, geh trôm mŭr Phượng Hoàng jong 1,7 km, 10 mlâm ntung gưl 1 n’hanh 5,6 km trong... dĭng lĕ khlay ndơ ndranh 3.083 rmen prăk. Tâm rnoh 4 mpông trôm mŭr an ƀư, mpông mŭr kiău mpeh Khánh Hòa mô hŏ dơi pơk yor kol 1,9 ha neh bri mô hŏ dơi rgâl. Rlău ma nĕ, gưl ta-luy ka lơ prêh đah ma trôm mŭr mpeh bah ma n’gor Dak Lak dôl kol neh bri nkra njêng bah du rnăk mô hŏ jêh mkra.

 Mpeh n’gor Dak Lak, aƀaơ gưl neh rlău 6.000 m2 mô hŏ dơi uănh an trong mkra sŏk lơi n’hanh geh trong trok an nuĭh ƀon lan. Khân pơng đă nuĭh ndranh an rlu kan ndâk ƀư ta gưl rnoh neh aơ. Mpeh n’gor Khánh Hòa, mpôl hên mhe pơk mpông trôm mŭr mpeh ma tâm lơ 15/3 mhe rlău; mpeh kiău hôm e dôl kâp trong mkra uănh an drăp ndơ n’glêh dŭt, jêh tâm rlong mư wơt dơn jao an neh, jêh nĕ mư ndơ̆ măy lăp an ndâk ƀư.

Tâm 3 nău nchrăp ƀư gưl nău trong têh hăn ngăch Khánh Hòa-Buôn Ma Thuột, nău nchrăp ƀư rlău n’gor Dak Lak dơi geh ngăch ƀư dŭt uĕh yơn mâp âk wăk kol mpeh neh, lŭ ndâk ƀư, neh mbuh, trong điện ƀon lan dŏng n’hanh nău nkhŭt ndôk nja.

Wa Nguyễn Thiên Văn, Groi Kruanh UBND n’gor Dak Lak, an gĭt, n’gor dôl ntĭm rđău dŭt n’hâm dôh rklaih ăp wăk kol geh tât ntu neh mbuh, lŭ ndâk ƀư n’hanh trong điện; đă gưl nkuăl, xă ndăn tâm nchră, bônh ăp rnăk jao an neh.

Mpôl hên lĕ ntĭm rđău Mpôl mât uănh, nuĭh ndanh, UBND nkuăl Krông Pắk n’hanh ăp n’gâng kan, nău kan nsrôih ntrôl ngăch pă neh an nuĭh ndranh ƀư. Mpeh mô tŏng lŭ ndâk ƀư, n’gor lĕ tâm ban ŭch đah Mpôl mât uănh n’gor Dak Lak n’hanh ăp nuĭh ndranh, ndrel đah Mpôl mât uănh nău nchrăp ƀư mrô 6, đă njŭn lŭ bah Nău nchrăp ƀư gưl nău 2 mpeh nău nchrăp ƀư gưl nău 3 gay ntrôl ngăch. Mpeh trong điện ƀon lan dŏng, UBND nkuăl lĕ ntĭm rđău ăp xă mbơh ƀư ngăch, nău ntop kơl nuĭh ƀon lan, nkre nta nơih an nuĭh ndranh ƀư.

Tât aƀaơ, nău nchrăp ƀư gưl 1 yor n’gor Khánh Hòa ƀư tơm ntuh kơl lĕ jao an bơi 93% măt trong, yơn ngăch ƀư knŭng geh mô tât 49%, mbrơi 8,3% nkôp đah trong nchrăp. Nău nchrăp ƀư mâp wăk kol ta 15 ntŭk bâp kol sŏk neh; nău trơn ntung trong kơt ăp trong điện cao thế, cáp viễn thông, trong ŭnh ang trong... dôl mâp jêr jŏt. Wa Đinh Văn Thiệu, Groi Kruanh UBND n’gor Khánh Hòa, ntĭm kloh ăp wăk kol an dôh rklaih an nău nchrăp ƀư:

Tâm rnoh 42 nău, geh 18 nău an tâm pă ntŭk gŭ mhe. Aƀaơ, neh ntŭk gŭ mhe mpeh tâm nkual ntŭk gŭ mhe dơi n’gor Khánh Hòa lĕ ndâk ƀư tâm pă tŏng an ăp nuĭh ntŭk gŭ mhe. Êng mpeh 24 rnăk mô pă ntŭk gŭ mhe, n’gor mbra mkra lôch ta năp lơ 30/3 tât. Lah ăp rnăk mô kan ndrel ŭch trong mkra trok jao an neh, mbra ƀư sŏk tĭng nău ntrŭnh, yor mô hôm geh trong êng.

Tât aƀaơ, nău nchrăp ƀư trong têh hăn ngăch Khánh Hòa-Buôn Ma Thuột lĕ ƀư geh bơi 2 năm, tâm ban du gâl nar khay an nău nchrăp ƀư. Yơn lah âk “ntŭk bâp kol” bah nar bôk năp ta nău nchrăp ƀư aơ hôm e nkân. Aơ lah nking n’gang têh đah nău rƀŏng jêh tâm dŭt năm 2026 n’hanh ndơ̆ an dŏng bôk năm 2027 ma Thủ tướng Chính phủ lĕ n’gluh an.