Tâm jay jê̆ bah jâng yôk ta thôn Tà Điệk, xã Vĩnh Thạnh, n’gor Gia Lai, wa Yang Danh hôm choh bàn phím ăp nar đŏng. Păng joi gĭt mpeh văn hóa rnoi Ba Na Kriêm. Đêt nuĭh gĭt lah, trong leo păng hăn tât nar aơ hŏ dơi tor luh bah ơm ntơm bah 13 năm deh, rnôk bu klô jê̆ Yang Danh ndrel âk kon se nti ăp n’gor Tây Nguyên hăn rlău dor Trường Sơn hăn tât Bắc kơt nti n’hanh dơi mâp Wa Hồ. wa Yang Danh nkah tay:

“Wa ôp gâp: mon lah moh rnoi nuĭh? Gâp ơh mon lah rnoi nuĭh Ba Na, ndrĭ lah Wa ôp mon di lah kon său anh hùng Núp đŏng! Lôch nê Wa ôp ăp mon geh sông hơm, nsoh tŏng răm, piăng geh kah đŏng. Lôch nê Wa njrăng đă lah ăp mon lah ăp găr ntil khlay bah miền Nam, bah Trường Sơn Tây Nguyên, ăp mon gŭ ta aơ ân nsrôih, kơt nti an jăp blău, di lah găr ntil khlay bah miền Nam gay jêh aơ tay neh dak dơn ngoăy ăp mon sĭt tâm Nam rdâk njêng tay neh dak he”.

Ăp nău ntĭnh ntăn bah Wa Hồ hŏ ƀư an nuĭh n’hâm nđơr nti bah klô ndăm nuĭh Ba Na mô rlu nsrôih tiăr, nti. Năm 1969, lôch nti lĕ phổ thông, Yang Danh sơch nău kan ƀư báo n’hanh pah kan ta Radio nău ngơi Việt Nam ta Hà Nội. Tât năm 1975, păng râng nti tay ta Khoa Báo chí, Nhih nti Tuyên huấn Trung ương gay n’hao lơn đŏng nău way blău kan bah he ŭch tĭng.

Lôch tốt nghiệp, păng jêng phóng viên Báo Gia Lai - Kon Tum. Ntơm bah ăp rơh hăn pah kan tâm dâng, ndrel gŭ, ndrel sa n’hanh ƀon lan, păng ntơm năl lah âk rnoh khlay văn hóa way ơm bah nuĭh Ba Na dôl dơi mât ndray. Wa Yang Danh nkoch:

“Rnôk hăn nti dơi ntĭm ăp nău uĕh di, njêng an săk nơm ăp nău mĭn, ăp nău kan n’hanh mbơh ngơi uĕh di lơn. Ntŭk hăn moh ndơ ƀư gâp kơl kônh wa kăch ba, jik pih, măng sĭt ngêt ndrănh yăng tât măng n’hanh sĭt gâp nchih tay da dê. Ăp nău way ơm gâp nchih lĕ kơt jay rot, chĭng gong, sreh rpu gay jêh aơ tay ăp nuĭh rŏ uănh. Năm aơ lah gâp di 80 năm deh yơn nha hôm gŭ choh rplay siƀŭt đŏng”.

Nklăp tă bah nău gĭt kan bah du hê nuĭh ƀư báo hŏ kơl păng jêng nuĭh rgum joi văn hóa way ơm đăp dêh. Ăp siƀŭt nchih tay tĭng păng bah ƀon dja tât ƀon êng. Ăp nău nkoch mpeh jay rot, chĭng gong, ot ndrong, ôp brah lah yang mô lah nău ngơi Ba Na Kriêm dơi păng mât ndray tay lĕ ma nuih n’hâm dêh rŏng đah rnoi nuĭh he.

Bol tât bah kơi nơh dơn pah kan ta nkuâl Vĩnh Thạnh n’hanh n’gor Bình Định ntơm nơh, yơn mô hŏ du tơ̆ păng ƀah rih đah nău mât ndray văn hóa rnoi nơm. Păng hŏ n’gluh 10 nău nchih gŭ mĭn, rgum joi, rblang nău mpeh văn hóa Ba Na Kriêm, kơt: Ndrănh yăng, ndơ sa, jay rot, mir ba, sreh rpu, ăp nău ndrong…Âk ndơ geh păng ƀư hŏ geh ndơ nkhôm dŭt têh bah Hội Văn nghệ dân gian Việt Nam.

Wa Bùi Tấn Thành, Bí thư Đảng ủy xã Vĩnh Thịnh, Kruanh UBND nkuâl Vĩnh Thạnh bah năp nar n’glăp nsum, an gĭt, lĕ nuih n’hâm kan bah wa Yang Danh lah mât ndray săk tơm văn hóa Ba Na Kriêm:

“Păng hŏ dăn đă n’hanh pơk jrô ntĭm nti rplay siƀŭt, ntĭm nău ngơi Ba Na Kriêm an cán bộ pah kan ta ăp n’gâng kan bah nkuâl rnôk nê nơh. Nê lah ngoăy tâm ăp nău ŭch rŏng bah wa Yang Danh, du hê nuĭh way mĭn rnê mât ndray săk tơm văn hóa. Ăp lễ hội ta ntŭk nơm ri hôm jă păng gay râng mât ndray ăp rnoh khlay văn hóa bah nuĭh Ba Na Kriêm ta ntŭk đŏng”.

Mô dơn ăp nuĭh ƀư pah kan văn hóa, âk rơh kơn cán bộ n’hanh nuĭh ƀon lan ta nkuâl Vĩnh Thạnh gĭt tât wa Yang Danh ma ăp nău nchih geh ngăn ma jru hơr đŏng. Tĭng wa Đinh Thị Nớt, Groi Bí thư Đảng ủy xã Vĩnh Thịnh, tă ƀư cán bộ Radio ƀoh rup nkuâl Vĩnh Thạnh (ơm), tâm ăp nău nchih bah Yang Danh, văn hóa- nău rêh bah nuĭh Ba Na mpơl luh dăch dêh.

“Wa nchih lơn âk nkoch mpeh nău way ơm. Rŏ nău nchih bah wa gâp mơ lah rlưn đah oh nô lah he nchih mô dơi ban wa ôh, nchih ma tâm ban kơt ngơi, kơt nkoch nău”

Njăr trong hăn rlău n’gul rach năm krêp dêh đah văn hóa rnoi nơm bah Wa Yang Danh, mô dơn rgop khlay tâm nău mât ndray, ntik n’hao săk tơm văn hóa rnoi mpôl đê̆, ma hôm mpoh hit du chông ŭnh an lĕ nău gĭt blău. Ta 80 năm deh, wa hôm lah nuĭh leo lor trong chrat ang mpeh nău dơn kan lam rêh jêng kon nuĭh n’hanh nuih n’hâm rŏng ƀon tơm neh dak gay ăp rơh kơn nar aơ kơt nti n’hanh ƀư tĭng.