Bộ Chỉ huy Quân sự n’gor hŏ nsŏng kơl an Rnâng kan Tỉnh ủy Dak Lak ƀư ntăm an ndah rup Kruanh Hồ Chí Minh an 102 xã, phường ta n’gor. Aơ lah nău kan geh nkô̆ khlay rƀŏng tât mbah rhơn 80 năm Nar sơch lăp kan lam lĕ rngôch lor bôk năp bah Quốc hội Việt Nam n’hanh mbah rhơn Đại hội đại biểu lam dak tâl XIV bah Đảng. Ndah rup Kruanh Hồ Chí Minh tă bah Bộ Quốc phòng ntăm an dơi trah mon ma dak kông, ƀư ndê na nê̆, mpơl kloh nuih n’hâm nâp djhưn, dêh bên n’hanh rŏng nuĭh bah Wa.

Ndah rup jâk rlău 70kg, prêh 80cm, rkăng 74cm n’hanh hvi 35cm. Nău ntăm an ndah rup Wa Hồ lah du nău kan geh nkô̆ hôr chính trị, nuih n’hâm êng uănh khlay, mpơl nău nkah gĭt, mpư rnê n’hâm suan têh kuâng bah Wa đah rnoi nuĭh Việt Nam. Aơ lah nău nsing nơm, nău mpŏng bah Đảng, Ngih dak n’hanh Mpôl tahen njuăl tât gưl ủy, n’gâng kan n’hanh ƀon lan tâm dâng tâm rnôk hun hao mhe; rgop ntik n’hao tay nuih n’hâm tâm rnglăp, dơn ngoăy, ntrôl dăng nău kơt nti n’hanh ƀư tĭng nuih n’hâm uĕh lŏng, trong gŭ rêh Hồ Chí Minh.