Ta thôn Vĩnh Trường, xă Phước Dinh, n’gor Khánh Hòa, âk rnăk dôl nchrăp trơn gay jao an neh ndâk ƀư Ngih măy điện hạt nhân Ninh Thuận 1. Nău nuĭh ƀon lan uănh ngăn rnôk aơ rnoh trok neh, ntop kơl n’hanh tâm pă ntŭk gŭ rnôk trơn tât ntŭk gŭ mhe. Wa Nguyễn Văn Trong, nuĭh ƀon lan xă Phước Dinh an gĭt, rnôk gĭt khay 3 mhe rlău, Quốc hội lĕ an trong ƀư, nău kơl mhe gay dôh rklaih ăp wăk kol an nău trok, sŏk neh, mkra nău dăn đă bah năp nĕ, nuĭh ƀon lan dŭt rhơn.

Ngih dak trok uĕh an kônh wa, kônh wa dŭt rhơn. Ngih dak trok, ntop kơl uĕh ngăn an kônh wa gay geh prăk hăn ntŭk gŭ mhe hun hao lơn, mô hôm geh nuĭh plơ̆ ach o tay.

Ndrel đah nău joi nău rêh n’hanh ntŭk gŭ mhe, nău trơn, nkra môch blang u che lah nău ƀư âk nuĭh ƀon lan nkual nău nchrăp ƀư dŭt rwê. Đah khân pơng, aơ mô knŭng lah nău trơn môch, ma hôm geh tât tĭng djăt, nău way ơm n’hanh nău ryơk an nuĭh lĕ roh. Yor rĭ, nuĭh ƀon lan mpŏng ŭch nău ƀư an geh mông nar nchrăp uĕh, tâm di đah nău way ta ntŭk. Wa Nguyễn Thanh Hiệp, nuĭh ƀon lan nkual nău nchrăp ƀư, xă Phước Dinh nkoch dăn đă:

Rnăk wâl gâp geh 6 mlâm môch an trơn, gâp tĭng mro nău ntrŭnh bah Đảng, Ngih dak jao an neh ndâk ƀư ngih măy hạt nhân Ninh Thuận 1. Rnôk thanh minh aơ bơi lĕ hôm ri gâp dăn đă xă rhoăt ngăch kuih khâl, gay an kônh wa nchrăp uĕh.

Dŭt khay mhe rlău, Ủy ban Thường vụ Quốc hội an Nghị quyết ntop tay, nkra di du đêt trong ƀư, nău kơl êng ntuh kơl ndâk ƀư nău nchrăp ƀư điện hạt nhân Ninh Thuận. Tă bah nĕ lôch jêh rpăih pháp lý mpeh trok, ntop kơl n’hanh ƀư ntŭk gŭ, nkre đăp mpăn nău dơi geh an nuĭh ƀon lan tâm nkual nău nchrăp ƀư. Tĭng nău ntrŭnh mhe, ăp rnăk tŏng ndơ mbra dơi jao neh ta nkual gŭ mhe n’hanh dơi an 100% prăk dŏng neh. Đah rnoh neh lŏ mir mô di neh rwăt lĕ rgâl nău ŭch dŏng ta n’hêl na nê̆ yơn mô năn dăn rgâl, Ngih dak hôm e uănh mĭn tay trok tĭng nău dŏng ngăn.

Wa Nguyễn Văn Quế, Kruanh UBND xă Vĩnh Hải an gĭt, knơm trong ƀư, nău kơl mhe, trong kan trok, sŏk neh bah nău nchrăp ƀư điện hạt nhân Ninh Thuận 2 dôl dơi ntrôl ngăch.

Lĕ rngôch trong kan kơp uănh, joi nuĭh tơm neh tât aƀaơ lĕ jêh, mpôl hên lĕ ntĭm rđău gưl bah dâng an rnoh khlay tĭng Nghị quyết 121 mhe ngăn. Dĭng lĕ ăp nuĭh tŏng geh mbơh kloh lah 487 rnăk.

Tĭng wa Nguyễn Văn Nhựt, Giám đốc N’gâng kan Công thương n’gor Khánh Hòa, dĭng lĕ rnoh neh sŏk gay ndâk ƀư ngih măy điện hạt nhân Ninh Thuận 1 n’hanh Ngih măy điện hạt nhân Ninh Thuận 2 lah rlău 760 ha, đah bơi 1.400 rnăk an trơn. Nău Quốc hội jao an Nghị định 121 lĕ dôh rklaih âk ntŭk kol trok neh, ntop kơl n’hanh ntŭk gŭ mhe. Knơm nĕ, trong kan sŏk neh ta ăp ntŭk dôl dơi ntrôl ngăch, ntop tay nău tâm ban ŭch tâm ƀon lan. Aƀaơ n’gor Khánh Hòa dôl mbơh ƀư tĭng nuih n’hâm ndăn, nsrôih jêh sŏk neh bah năp dŭt khay 6 năm aơ gay jao an nuĭh tơm ntuh kơl mbơh ƀư nău nchrăp ndâk nkra.

Nghị quyết aơ lĕ dôh rklaih dŭt âk, lơn lah ăp nău rgop dăn đă bah n’gor Khánh Hòa, rgop rgâl na nê̆ lơn n’hanh êp lơn đah nuĭh ngăn tâm rnôk trok. Yor nê, ƀư tĭng trok, sŏk neh ngăch lơn, dơn geh nău tâm ban ŭch bah nuĭh ƀon lan. Aƀaơ n’gor dôl rgum dŭt n’hâm, ndăn kơp uănh n’hanh an rnoh khlay tĭng trong trok gay ndơ̆ an nuĭh ƀon lan tâm nar êp ngăn.