Tâm nglan ngih săm ƀŭt THCS Nguyễn Văn Cừ, nkuăl ƀon têh Buôn Ma Thuột, n’gor Dak Lak, ăp kon se dôl ma pâl ăp nau kơt: tâm têk rse, njroh sạp, put măt nhŭp be. Oh Nguyễn Việt Hùng, kon se nti jrâu 8B, mbơh, aơ mô êng lah nau pâl, ma hôm lah nau hăn joi tât tu tơm rnoi mpôl nơm, yor ngih săm ƀŭt ƀư di rnôk Giỗ tổ Hùng Vương:

     “Bah bôk nau kan ri gâp ntô̆ n’hao ngăn nau ơm bah rnoi mpôl ndrel kŏ ân nơm gĭt tât nau vay ơm đŏng. Gâp saơ nkah gĭt ngăn tât nuih n’hâm ndâk neh dak bah Kđăch Hùng. Lah du hê kon se nti ri gâp ân nsôih nti gay mô ƀư me mbơ̆ rvê, nai ntĭm nti rngot ndrel ân geh dơi tâm di ngăn đah nau moh mon mleh bah Wa Hồ”.

Hôm oh Trần Văn Bảo kon se nti ndrel jrâu ri saơ nau ueh ndrel nau geh gĭt nau mhe tă bah nau tâm ơh ngơi “ndâk nkra êng” bah ăp băl nti tâm jrâu nơm, nkoch tât nau geh “bánh chưng bánh giầy”.

     “Ăp băl nti nsum jrâu ƀư nau ngơi tâm ơh dŭt n’hâm khuh n’gôr ngăn, ndrel gâp ŭch ngăn đŏng nê lah nau nkoch tâm ơh mpeh nau ơm geh bah bánh chưng, bánh dày. Nau ƀư tâm ơh nê geh nau khlay ndrel nau nkoch ân geh nau dơi geh nau blau tâm kon nŭih leo tât âk nau ueh tâm nau rêh ơm kăl e. Gâp kŏ geh nti đŏng nau mhe nê lah nơm ân nsôih hăn nti ân ueh gay dơi nsôih ndâk njêng ndrel rgop n’hâm bah nơm ân nau geh dơi bah nau rêh jêng”.

Ntơm bah bôk khay 3 tâm dâng, nai ntĭm ndrel kon se nti Ngih săm ƀŭt THCS Nguyễn Văn Cừ, hŏ nsôih ngăn tâm nau ƀư ăp nau njroh mprơ gay ma râng nau kan tâm rnôk aơ. Đah nkô̆ “Trong mham Lạc Hồng” nau kan geh ƀư rơh aơ di rnôk rƀŏng tât nar Hùng Vương (10/3 tâm dâng). Nai ntĭm kon se Vũ Thị Thu Hằng, Kruanh nau nti Lịch sử - Địa lý-Giáo dục công dân bah ngih săm ƀŭt nkoch: Mô êng lah du nau rƀŭn rgum ma hên ŭch ăp kon se nti gay gĭt jru jăp lơn mpeh nau khlay bah nar giỗ tổ, gay ăp kon se gĭt lơn tay mpeh nau ŭch rŏng neh dak, mô êng lah ntoh bah nau ngơi, ma hôm bah nau kan ndrel nau ƀư ngăn:

“Tâm nau kan trong mham Lạc Hồng, tổ hên hŏ ntĭm mbơh ân kon se joi gĭt, jêh nê joi ăp nau mprơ nkoch tât mẹ Âu Cơ, Lạc Long quân ndrel ăp băl ndâk ƀư nau tâm nkoch tâm ngơi ueh ngăn đŏng nê lah nau tâm ơh, bánh chưng, bánh dày bah rơh kđăch Hùng, nkoch nau ơm bah Kđăch Hùng hŏ ân nau kan ƀư kđăch bah nơm ân Lang Liêu, nau nkoch  bah du rhiăng tăp deh jêng du rhiăng nŭih kon đah âk nau kan ƀư njroh mprơ bah ăp kon se. Ntơm bah ăp nau kan aơ ri kơl an kon se joi saơ tay ăp nau pâl ơm kăl e bah ăp nkuăl neh gay ndâk nau kan khuh răm lơn”.

Gay kon se nti g

eh gĭt lơn ma nau ơm du trong ueh ngăn, ngih săm bŭt kŏ ƀư ăp nau tâm rlong joi gĭt mpeh rơh Kđăch Hùng Vương, rgum âk mpưm kon se nti râng. Ăp kon se geh pă jêng ăp rmôt gay ma ơh ăp nau ơm, nau ơm nkoch tât ăp Kđăch Hùng. Ndrel ma nê, ăp jrâu hôm nchrăp ăp mông nti nau ơm ntoh lư, kơt: Sơn Tinh – Thủy Tinh; nau nkoch bánh chưng, bánh giầy… ntơm bah nê kơl an kon se geh nau saơ ueh lơn mpeh nau ơm yau, ân geh jru đŏng mpeh nau vay rnoi mpôl. Oh Nguyễn Hoàng Nam, kon se nti jrâu 8C, ngih săm ƀŭt THCS Nguyễn Văn Cừ, rhơn nkoch:

“Gâp njêng jêng ơh nau ngơi bah kon ndăm Kđăch Đệ Nhị tâm rnôk ƀư nau tâm ơh nkoch tât nau ơm geh bánh chưng, bánh dày. Bah nau kan aơ, gâp ndơn saơ lah geh nau khlay ngăn tâm nau kan Kđăch Hùng hŏ pă nau ƀư Kđăch ân Lang Liêu yor geh nau blau, geh nuih n’hâm ueh, nkre lah kon se nuih ñ’hâm ŭch ma me mbơ̆ ndrel geh nau blau tâm rnôk pah lă pah kan đŏng. Ntơm bah nê kŏ ntô̆ n’hao lơn gtay nuih n’hâm geh nau blau mhe tâm nau pah kan jan sa bah nŭih ƀon lan Việt Nam. Gâp kŏ rhơn ngăn mpeh nau ơm bah rnoi mpôl nơm”.

Tĭng wa Nguyễn Văn Lợi, Groi hiệu trưởng ngih săm ƀŭt THCS Nguyễn Văn Cừ, nkuăl ƀon têh Buôn Ma Thuột, n’gor Dak Lak, nau ntĭm nti nau ơm yau kŏ kơt lah nkoch mbơh nau ơm yau bah ăp ngih săm ƀŭt rnôk aơ geh âk nau ƀư ngăn. Êng ăp nau vay ơm lah hăn leo nkao, mpoh kthup tâm ăp ntŭk ƀư ôp brah nkah Kđăch Hùng, tâm rnôk aơ geh âk nau đŏng ƀư gay kơl an kon se nti ƀư gay ma nkah tât nau ueh ơm bah rnoi nơm:

‘Nau kan ntĭm nti kon se rƀŏng tât mpeh tu tơm, yau ye dak mham Lạc Hồng ndrel ntĭm nti ân kon se gĭt kloh lơn mpeh nuih n’hâm bah che, mbơ̆ nơm hŏ geh n’hâm soan ndâk neh dak ndrel mât neh dak ndrel gay ăp kon se saơ nau kan bah nơm tâm nau ndâk njêng neh dak. Nau kan ntĭm nti aơ hŏ rlet rlau âk năm jŏ jong, njêng ân kon se geh nau gơih n’ơr, pâl n’aih ueh, njêng luh nau ueh răm rnôk ma kon se dôl hăn nti”.

Bah ăp nau kan bah dih mông nti, đah ăp nau ƀư kan âk ntil mô êng kơl an kon se nti tâm n’gor Dak Lak gĭt tay mpeh nau ơm yau ma hôm nchiăr nti nau blau pah kan âk nŭih du tŏ, nuih n’hâm tâm rnglăp ndrel nau nkah ngăn đah nau tu tơm rnoi mpôl. Aơ lah ăp nau khlay tâm nau kơl an kon se mât răk rong nuih n’hâm rŏng dak, nthoi tay nau vay “Ngêt dak nkah gĭt tu” bah rnoi mpôl Việt Nam./.