Kêng măng 28/12, ta xã Ia Dom (n’gor Gia Lai), Binh đoàn 15 (Bộ Quốc phòng) ƀư Lễ ntơm rdâk mon jay rot văn hóa xã Ia Dom. Aơ lah ndơ ƀư ntơm bôk năp tâm bôk nău kan rdâk mon 9 jay rot văn hóa an ƀon lan ăp xã n’har bri mpeh nhâp nar bah bar n’gor Gia Lai n’hanh Quảng Ngãi. Tĭng trong nchrăp, 9 jay rot văn hóa dơi ntuh kơl rdâk njêng đah lĕ rngôch rnoh khlay 20 rmen prăk. Ăp mblâm jay geh rnoh hvi nklăp 130m², prêh rlău 17m.

Ăp jay rot dơi ƀư nkre tĭng di kơt nău way jay ơm, nkre tâm di đah săk tơm văn hóa bah ƀon lan ăp rnoi mpôl đê̆ tâm nkual n’har bri Gia Lai n’hanh Quảng Ngãi. Nchrăp, lĕ rngôch 9 mblâm jay mbra ƀư lôch jêh n’hanh n’glăp dŏng tâm khay 9/2026. Lah ta rnôk ntơm pah ƀư, Thượng tướng Trương Thiên Tô, chủ nhiệm Tổng cục Chính trị Tahen ƀon lan Việt Nam  an gĭt: nău ntuh kơl rdâk mon jay rot văn hóa ta ăp xã n’har bri Tây Nguyên mpơl nău uănh khlay bah Đảng, Ngih dak n’hanh Mpôl tahen đah ƀon lan rnoi mpôl đê̆, gay rdâk nâp tâm rnglăp lam ƀon lan, rdâk njêng nâp “ntŭk nsing nuih n’hâm ƀon lan”, nkre đah nău mât nâp đăp mpăn chính trị, njrăng n’gang neh dak- rnă njrăng ta ntŭk.