Ta lễ hội cà phê Buôn Ma Thuột tâl 9 năm 2025, kêng măng 11/3, UBND n’gor Dak Lak hŏ geh rơh mâp dơm 27 mpôl năch dak bah dih. Nkre n’gor hŏ ký ton tâm boh đah n’gor Attapeu, dak CHDCND Lào. Na nê̆, kruanh UBND n’gor Dak Lak hŏ mâp 27 mpôl năch dak bah dih jă tât râng Lễ hội cà phê Buôn Ma Thuột.

Tâm nê geh wa bu ur Vanusia Nogueira, Tổng Giám đốc Mpôl mât bôk kan cà phê lam ntŭr neh; ăp nuĭh Đại sứ đặc mệnh toàn quyền Hoa kỳ ta Việt Nam, Đại sứ Mông Cổ ta Việt Nam, Đại sứ Philippines ta Việt Nam, Tổng lãnh sự Nga ta nkual ƀon têh Hồ Chính Minh, Tổng lãnh sự Ấn Độ ta nkual ƀon têh Hồ Chí Minh, Tổng lãnh sự Lào ta Đà Nẵng... Lah ta rơh wơt, wa Trương Công Thái, Groi kruanh UBND n’gor Dak Lak mpŏng, tâm ăp nar râng lễ hội, ăp năch dak bah dih mbra geh ăp nău rlong saơ uĕh mpeh me neh, kon nuĭh Dak Lak lah nsum n’hanh nkual ƀon têh Buôn Ma Thuột lah êng. Păng ŭch rŏng Đại sứ quán ăp dak ta Việt Nam, Mpôl n’gâng kan ăp n’gor dak kâng n’har, Tổng lãnh sự ăp dak, ndrel mpôl năch dak bah dih mbra ndrel Dak Lak ring lam ăp rnoh khlay văn hóa, n’hŭm kah mha êng, luh bah cà phê Buôn Ma Thuột tâm ban kơt săk geh hun hao âk mpưm bah nkual neh “Rsang rnglăy bri neh têh hvi” tât băl mpôl lam ntŭr neh.