Thôn Gia Xiêng, xã n’har bri Rờ Kơi, nkuăl Sa Thầy, n’gor Kon Tum geh bơi tât 300 rnăk đah rlau 1000 nŭih, ngăn lah rnoi Xơ đăng. Nô A Thể, Bí thư Chi bộ, Kruanh Thôn Gia Xiêng, mbơh, jêh rnôk ƀư dơi Đại hội Chi bộ tâm khay 11 năm e, 14 đảng viên bah Chi bộ geh pă ăp nau kan gay bonh đă ăp rnăk nkra tay mir ndrel kơl an 8 rnăk ach o hôm e bah thôn hun hao văng sa:

            ‘Chi bộ leo nau ntrŭnh jêh ri rƀŭn ƀon gay ntrŭnh kơl an ƀon lan. Mpeh văng sa mât chăm ăp ntil tơm tăm, mpa rong. Bonh đă kônh wa geh neh mô jêng ri rgâl rtơm tăm, nkra tay mir rgum tăm sầu riêng, mắc ca ndrel ăp ntil tơm tăm êng. Rnăk jêr lah mô geh ntŭk nsing rnơm ri rgum kônh wa kơl an rnăk nê. Khay ngăn lah ƀon lan tâm ban nuih n’hâm ma chi bộ”.

            Đảng bộ xã n’har bri Rờ Kơi, nkuăl Sa Thầy geh 13 chi bộ đah 176 đảng viên, tâm nê geh 6 chi bộ rnoi mpôl đê̆. Jêh ăp chi bộ ƀư dơi đại hội, tâm 2 nar 9-10/1/2025 đảng bộ xã ƀư Đại hội tal 18, năm kan 2025-2030.

            Nau ntrŭnh Đại hội Đảng bộ xã Rờ Kơi năl nau kan tâm rơh mhe hao văng sa tâm ăp năm geh 14%; rnoh rnăk ach o ăp năm huch ntơm 5-6%; tât năm 2030 xã geh du hê bôk nŭih lah 68 rkeh. Wa Mai Nhữ Nam, Groi Bí thư đảng uỷ, Kruanh UBND xã Rờ Kơi, mbơh, jêh geh ƀư đại hội, Đảng uỷ xã ngăch ƀư nau kan lăp tâm nkô̆ hun hao văng sa, rêh jêng:

            ‘Rnâng kan Đảng uỷ ntrŭnh ngăch nau ntrŭnh bah ăp nkô̆ nau ntrŭnh bah đại hội yơn mô dơi ân brơi. Jao nau kan ân ăp ntŭk kan chi bộ jêh ri ntrŭnh dĭng lĕ jur tâm dâng ngăn lah nŭih ƀon lan gay ma ƀon lan gĭt kloh ndrel nâm ƀư kloh nau ntrŭnh. Ƀư tĭng nau trŭnh nkra nâp mir tăm, jut ngih truh sat rgala neh tăm ntơm bah tơm gleh nar jêh tơm jong nar”.

            Tĭng nau nchrăp, Đảng bộ nkuăl Sa Thầy geh n’gor Kon Tum săch ƀư đại hội rlong ntơm rnôk ƀư tâm 6 khay bôk năm 2025. Ndri ma tât lơ 27/2 mhe rlau lam lĕ 11 xã, nkuăl têh bah nkual ƀư jêh Đại hội Đảng bộ năm kan 2025-2030. Đại hội săch 160 gưl uỷ viên, 55 uỷ viên Rnâng kan Đảng uỷ, 11 Bí thư Đảng uỷ ndrel 22 Groi Bí thư Đảng uỷ.

            Wa Y Sâm, Groi Bí thư Rnâng kan Nkuăl uỷ, Kruanh HĐND nkuăl Sa Thầy, mbơh, ƀư nau nchrăp mrô 127, lơ 28/2/2025 bah Bộ Chính trị, Ban Bí thư, Đảng bộ nkuăl Sa Thầy nsrŭng ƀư đại hội, yơn hôm ơm nau mĭn kâp, rnơm tâm nau dăp rgum trong kan chính trị ma hôm nsôih ƀư ăp nkô̆ nau hun hao:

            ‘Phung hên ƀư tĭng dơi ăp nau tă geh, nau dăng bah nkuăl. Ăp nau kan săk tam geh ntrŭnh ƀư. Êp nê hôm kuăl jă ăp tơm ntuh kơl gay ntuh kơl ndâk hun hao nkuăl. Đah nau kan ndâk njêng Đảng ri hên rgum mpeh nau kan ndâk njêng ntŭk kan đảng kloh, dăng, nâp ndrel kơl an nau kan ntĭm nti ân rmôt cán bộ tă bah nkuăl ân tât tâm dâng gay tŏng dơi ma nau kan mhe”.

            Ƀư tĭng nau ntrŭnh đă mrô 127 lơ 28/2/2025 bah Bộ Chính trị, Ban Bí thư n’gor uỷ Kon Tum ƀư nau rđau ân nsrŭng ƀư Đại hội Đảng bộ gưl xã, nkuăl năm kan 2025-2030. Ndrel ma nau ƀư tĭng rjăp nau rđau đă bah Trung ương, đah Đảng bộ ăp xã, nkuăl têh tâm n’gor Kon Tum ân ƀư Đại hội dôl nchrăp ƀư ân rjăp tĭng ăp nkô̆ nau ntrŭnh hun hao văng sa, rêh jêng. Nuih n’hâm kan, nau lăp kan nsum bah ăp gưl uỷ, n’gâng kan ndrel ƀon lan hŏ njêng nau nsôih rjăp gay ƀư ngăn ăp nkô̆ nau hun hao, rgop nau n’hao nau rêh ƀon lan ndrel ntrŭt dăng nau hun hao nâp nâl bah nkuăl./.