Wa H’Ních Niê nuĭh Rđe ta phường Tân An lôch dơi but săm dơm n’hâm suan tâm rơh lor bôk năp tă bah UBND n’gor Dak Lak ƀư nkoch.

“Lor bôk năp he dơi but săm dơm n’hâm suan kơt aơ, but uănh hôm ri mơ gĭt mhâm n’hâm suan he nơm. Săk gâp nơm n’hanh kônh wa tâm ƀon lan dŭt rhơn ngăn. Mpŏng ntơm bah aơ tât bah kơi tay dơi Đảng, Ngih dak uănh khlay lơn đŏng gay kônh wa ƀon lan but săm dơm tay.”

Tĭng wa Châu Thị Kim Phụng, Giám đốc Trạm Y tế phường Tân An, tâm 2 pơh ƀư but săm dơm n’hâm suan an nuĭh ƀon lan, ntop kơl nchih nău lư n’hâm suan điện tử n’hanh thẻ BHYT ta ứng dụng VNeID, n’gâng kan ta ntŭk hŏ ƀư lôch jêh 100% rlong lor n’hanh pơk hvi tay but săm dơm n’hâm suan lam ƀon lan.

“Nhih dak si ta ntŭk ƀư but săm nội, ngoại khoa, sêk - kang - măt, tôr - muh – rmlông ko, sơch năl n’hanh tâm pă ntil n’hâm suan an kônh wa. Nkre an ƀư du đêt rhŏ dŏng kỹ thuật kơt uănh năl mham, uănh năl dak chrai, tâm ban kơt tĭng ƀư chụp X-quang. Ndrel đah sơch but săm, ntŭk kan dak si ntop kơl nuĭh ƀon lan rgum ăp kôp nău lư, n’glăp rgum tâm siƀŭt but săm ji điện tử.”

Bác sĩ CKII Phạm Minh Hữu, Groi Giám đốc Sở Y tế n’gor Dak Lak an gĭt, tĭng ƀư nău rđău đă bah UBND n’gor n’hanh Nghị quyết mbrô 72 bah Bộ Chính trị mpeh but săm n’hâm suan tât leh, sơch but săm dơm an nuĭh ƀon lan, Sở hŏ an ƀư trong nchrăp tât lĕ rngôch ăp Trạm n’hanh Ntŭk kan dak si mpeh 102 xã, phường lam n’gor; kan nsum đah ăp trung tâm y tế n’hanh ntŭk kan dak si bah dih ngih dak nchrăp máy móc, ndơ ntrŭp dŏng n’hanh nuĭh kan rhŏ dŏng an ƀon lan. Tâm nê, rlong ƀư ta 4 xã, phường lah Tân An, Tuy Hòa, ăp xã Đồng Xuân n’hanh Krông Bông; 98 xã, phường hôm ƀa ƀă mbra an ƀư du rơh ntơm bah nar 1/7 tât. Tât aƀaơ, bơi 500 nuĭh ƀon lan hŏ dơi but săm ăp tŏng tĭng ntĭm nti bah Bộ Y tế, n’hanh pah kan sơch dôl an ƀư tay đah hang rbăn nuĭh. Bác sĩ Phạm Minh Hữu lah rjăp nău khlay bah nău lor nchrăp sơch but săm n’hâm suan lam ƀon lan.

“But săm n’hâm suan lam ƀon lan dơi tâm pă ƀư 3 rmôt tơm lah rmôt ntơm bah 0 – 6 năm deh, rmôt tơm bah 6 – 18 năm deh, hôm ƀa ƀă lah rmôt rlău 18 năm deh. Nău lor nchrăp but săm n’hâm suan dơi tâm pă ntil n’hâm suan tĭng nuĭh ƀon lan ta moh ntil, tĭng ăp rnoh dŭt uĕh, uĕh, dah găp mô lah châp ngăn, gay mhâm ƀư an nkrum lam, n’hanh rnôk năl geh nău ji ri njrăng đă kônh wa hăn tât ntŭk săm ngăch.”

N’gor Dak Lak lôch n’glăp nsum geh 3,34 rkeh ƀon lan. Tĭng ƀư Nghị quyết mbrô 72 bah Bộ Chính trị, lvang năm 2026–2030, Dak Lak nchrăp tâm pă 1.000 rmen prăk/năm gay but săm dơm n’hâm suan an nuĭh ƀon lan. Êng năm 2026, n’gor tâm pă 400 rmen prăk an 102 nhih dak si xã, phường, đah rnoh dŏng nklăp 350 rbăn prăk/nuĭh/tơ̆ săm. Wa Lương Nguyễn Minh Triết, Bí thư Tỉnh ủy Dak Lak lah rjăp, đah ntŭk têh hvi, ƀon lan srang ngai, rnoh âk rnăk ach o n’hanh ƀon lan rnoi mpôl đê̆ âk, pah kan mât chăm n’hâm suan lam ƀon lan lah nău dơn kan khlay, nsĭt nău rŏng kon nuĭh jru, đăp mpăn mô an geh du hê nuĭh ntlơi êng bah kơi. Bí thư Tỉnh uỷ Dak Lak đă ăp n’gâng kan bah n’gor, ăp ntŭk tĭng ƀư đah nuih n’hâm dơn kan âk.

“Ăp nhih pah kan, đơn vị n’hanh n’gâng kan dak si ân hăn tĭng ƀon, goh tĭng mpông gay đăp mpăn ăp nuĭh ƀon lan tât đah ndơ kơl, râng but săm n’hâm suan tât leh, lơn lah đah nuĭh dơi kơl, nuĭh âk năm deh, nuĭh quet nte, rnăk ach o n’hanh ƀon lan rnoi mpôl đê̆. N’gâng kan dak si lam n’gor ân rgum lĕ tơm ndơ, leo ƀư but săm ăp ntŭk du trong way blău kan, khoa học, đăp mpăn pah kan but săm n’hâm suan dŭt geh nău tam ngăn.”

Nău but săm n’hâm suan an lam ƀon lan mô dơn kơl ơm năl saơ, săm ngăch nău ji, bôk nău kan hôm rgop jêng nău way bên mât chăm n’hâm suan nchrăp lor tâm nsum mpôl ƀon lan. Đah nău lăp kan lam trong kan chính trị, nău ŭch ăp nuĭh ƀon lan dơi mât n’hâm suan, tât đah ntŭk but săm ji têh uĕh mhe dôl jêng ngăn ngăn, ndơ̆ Nghị quyết mbrô 72 bah Bộ Chính trị ơm lăp tâm nău rêh bri neh têh hvi.