Wa Nguyễn An Vinh, tă ƀư Bí thư N’gor ủy Dak Lak, nuĭh lĕ geh rlău 50 năm pah kan ta n’gor mĭn lah, nău ntrŭnh nglăp nsum 2 n’gor lah du njoat hăn di đah nău ngăn n’hanh mpŏng ŭch bah nuĭh ƀon lan:

Gâp saơ aơ lah nău ƀư dŭt di nuih n’hâm ƀon lan bah lĕ 2 n’gor. Ăp cán bộ tă pah kan tâm rơh tâm lơh tâm su kơt gâp wât dŭt kloh nău tâm boh ndrel, nău rŏng đah Dak Lak n’hanh Phú Yên. Ta rơh tâm lơh mprơh Mỹ, Phú Yên lĕ jêng nuĭh kơl nâp nâl, pă an ndơ sông sa, bôh, phe, n’hanh ndơ dŏng an Dak Lak. Rlơ̆ tay, Dak Lak lah ntŭk nsing têh bah Phú Yên bah mpeh nkual yôk yang. Nău tâm boh nĕ jru hvi tât rnoh nuĭh ƀon lan tă mât ndrăy nău mprơ, nău mprĭng “Sông Ba chảy xuống Đà Năng/Ai yêu Dak Lak cho bằng Phú Yên.

Tâm bôk rngok bah ăp nuĭh tahen tă lăp deh khĭt yor đăp mpăn rnoi nuĭh, nău tâm boh đah 2 n’gor mô knŭng lah nău ntop ntŭk ntô, ma hôm lah nău rŏng mpôl băl. Wa Bùi Văn Khiêm, tahen ơm tă râng rklaih đăp mpăn Phú Yên năm 1975, aƀaơ rêh ta Dak Lak, mô dơi pôn nău rngot nkoch:

Gâp tă lôr đah oh nô gâp ŭch Dak Lak nglăp đah Phú Yên. Mô mĭn tât nău nĕ lŏ jêng ngăn. Gâp nkah gĭt rnôk tâm lơh tâm su, bah Buôn Ma Thuột gâp hăn jŭr Phú Yên, hăn trong bri jêh lĕ luh dak lêng, n’hanh gâp ŭch ôi taơ klak trong têh hăn ngăch njok dak me Ba ri jŭr Dak Lak ri nău rŏng dŭt uĕh. Aƀaơ geh nglăp nsum 2 n’gor Dak Lak đah Phú Yên ri mô geh nău êng ma nău ŭch bah gâp di jêng ngăn.

Du nuĭh lĕ saơ kăl e êng, wa Tô Tấn Tài, hôm kuăl lah Ama H’Oanh, tă ƀư Bí thư Thị ủy Buôn Ma Thuột-deh ta Phú Yên, yơn lĕ an lôch săk an nău kan cách mạng ta Dak Lak. Wa tă mât âk nău kan khlay jêh nar neh dak kơp dơn n’hanh lah ngoăy tâm âk cán bộ n’gâng tơm an ntrong leo cách mạng ta nkuăl Lắk bah năm 1959. Nkoch nău rhơn mpeh nău ntrŭnh nglăp nsum 2 n’gor, wa nkoch năm răm rhơn yơn mô chuêl an uănh khlay mpeh nău tâm rnglăp ndrăng nơm, nsum mpôl.

Rwê lah rwê m’hâm ƀư ndrăng nơm soih na nao, ƀon lan wât lĕ, tâm rnglăp ngăn ngên tâm rnglăp. Yor he rwê đê đê̆, bah năp đaơ he geh rơh nkhah êng du đêt n’gor Bình Trị Thiên, jêh nĕ Quảng Nam Đà Nẵng, Phú Yên Khánh Hòa. Yơn rnôk nĕ lah mô hŏ di ngăn, tal 2 tay lah trong kan nchrăp nău mĭn an ƀon lan mô hŏ uĕh jêng geh nău âk n’gor geh nglăp tay geh uh ah. Aƀaơ nsing nơm tâm nu nău mhe đah nău mĭn bah Đảng ntĭm rđău rjăp, ƀư uĕh trong kan nău mĭn an ndrăng nơm bah nĕ rêng tâm ƀon lan ri saơ uĕh đŏng hôm.

Wa Niê Thanh Mai, Kruanh Hội Văn học nghệ thuật n’gor Dak Lak, geh bơ̆ nuĭh Phú Yên, mê̆ nuĭh Dak Lak-uănh năl jru hvi lơn ta mpeh văn hóa. Wa Niê Thanh Mai an lah, Phú Yên geh văn hóa dak lêng, Dak Lak kah njŭng bah ăp rnoi mpôl đêt Tây Nguyên. Lah gĭt joi uĕh, aơ mbra du jâng văn hóa âk ntil, uĕh reh, geh âk nău nđơr an mĭn njêng nghệ thuật, hun hao pâl nđaih n’hanh tâm nđŭr văn hóa.

Mpôl hên dŭt mpŏng n’hanh ŭch mpôl hên dơi ntop tay an nsum n’hanh tâm pă ăp nău blău ơm an nsum kơt geh âk ndơ rklă mpeh 2 ntil nău. Lah kơt geh âk trong nchrăp n’hanh trong ƀư na nê̆ ri ăp nău ƀư mbra dŭt âk n’hanh uĕh reh tâm năm tât.

Trong uănh bah nuĭh ƀon lan mpơl nău tâm ban ŭch, Wa Nguyễn Song Thoại, Tổ dân phố 8, nkuăl têh Quảng Phú, nkuăl Cư M’gar, n’gor Dak Lak an gĭt:

“Aƀaơ Dak Lak đah Phú Yên lah tâm di, geh yôk, geh dak lêng. Yơn pơng jêr nău văn hóa mô di wăng sa ri moh ntŭk dơi ƀư lĕ, nâm ơm”.

Nău rgum nsum đah Dak Lak n’hanh Phú Yên mô knŭng lah nău ntrŭnh hành chính, ma hôm nău plơ̆ sĭt bah du nău tâm mâp tay lĕ tă tâm tĭng bah kăl e tâm lơh tâm su. Đah ntŭk ntô neh ntu tâm ntop, văn hóa uĕh n’hanh lịch sử ndrel, n’gor Dak Lak mhe dơi mpŏng mbra hao jêng mhe ta nkual Nam Trung Bộ n’hanh Tây Nguyên. Bah meng nĕ, kơt ăp nău rgop lĕ nkoch, nkô̆ nău khlay lah tâm ban ŭch tâm ndrăng nơm cán bộ kruanh n’hanh nău tâm ban nuih n’hâm ƀon lan. Knŭng rnôk nĕ, tâm rngôk nglăp nsum mư ngăn ngên dơi mât soan dăng lĕ rngôch, luh jêng du ntŭk ntô hun hao mhe, tâm di n’hanh nâp nâl.