Quốc hội lah ntŭk ăp nkô̆ nău bah nău rêh dơi lah uănh, tâm nchră n’hanh rgâl jêng trong kơl, pháp luật. Yơn nău nkoch mô dơn n’glĕ ta ntŭk tâm nchră. Nău cử tri uănh khlay lơn lah ăp n’glêh an nê gĭt ngăch lăp tâm nău rêh, droh rklaih ăp jêr jŏt n’hanh njêng luh ăp nău rgâl ngăn ngăn đŏng lah mô.

Nău dja dơi mpơl dŭt kloh ta Rơh hop mô way leh bôk năp, Quốc hội khóa XVI mhe mpôch dŭt lôch 17 nar pah kan. Quốc hội hŏ n’gluh an dŏng 15 luật, 6 nghị quyết quy phạm pháp luật, an nău rgop bôk năp đah 7 trong nchrăp luật n’hanh n’glêh an 7 nghị quyết khlay, gay nkra ăp nkô̆ nău ntoh luh bah ngăn ngăn, droh rklaih kô̆ yơn, nta trong dơh lơn an ƀon lan, doanh nghiệp.

Dŭt njrăng uănh, ta rơh hop hŏ geh 2.680 nău rgop tâm nchră ta rmôt n’hanh 535 nău rgop ta hội trường. Ăp rnoh dja an saơ ta ntŭk tâm nchră mô tăch luh bah nău rêh, ma lah ntŭk rgum, rblang năl n’hanh nkoch lah ăp nkô̆ nău dôl ndơ̆ luh bah ngăn ngăn.

Ntơm bah njônh uănh nê, tâm boh đah Quốc hội đah cử tri mô dơn lah tâm mâp, djăt lor n’hanh bah kơi ăp rơh hop. Nê hôm lah rnôk ƀư mbro: cử tri nkoch ăp nău jêr jŏt, khoah; đại biểu Quốc hội nđơn mbơh tay nău lah nê ta ntŭk tâm nchră; Quốc hội ƀư jêng trong luật, nghị quyết; lôch nê ăp nhih pah kan Ngih dak tĭng ƀư n’hanh nuĭh ƀon lan groi nđôi, plơng ơh tay. Kruanh Quốc hội Trần Thanh Mẫn lah rjăp:

“Nău dơi bah rơh hop an saơ tay nău khuh n’gôr bah “nău Đảng di đah nuih n’hâm ƀon lan”, ndrel hăn ngăn ngăn, nsrôih chính trị dŭt âk bah Quốc hội, Chính phủ, ăp nhih pah kan, ăp n’gor geh tât tâm nău lor nchrăp nkra ăp nkô̆ nău ntoh luh bah ngăn ngăn, mô an mbrơi nkai, kol khan, đah nuih n’hâm: hŏ lăn ma lah ri ân ƀư ngăn, ƀư dĭl, ƀư di, ƀư nsĭt geh nău dơi”.

Nău mpơl lor dja n’gluh nău ŭch geh đah ăp đại biểu Quốc hội nơm đŏng: mô dơn djăt nău cử tri, ma ân tĭng grêt tât dŭt ăp nkô̆ nău cử tri ndơ̆ luh. Yor du trong kơl uĕh tĭng ƀư geh nkô̆ khlay ngăn rnôk ƀon lan saơ geh nău tam tâm nău rêh dơm. Yor kơt nê̆, Kruanh Quốc hội đă ăp mpôl đại biểu Quốc hội, đại biểu Quốc hội lor nchrăp groi nđôi, ngăch dăn đă ăp wăk kol, nău ntoh luh ngăn ngăn. Nkre, ăp nhih pah kan dâk ƀư ân lor nchrăp, mô kâp nơm, tâm nje, mô an nuĭh ƀon lan n’hanh doanh nghiệp kâp jŏ.

Kruanh Quốc hội Trần Thanh Mẫn lah rjăp, neh dak he dôl lăp tâm rơh “nsan ngăch, đăt ndal”, ăp n’glêh an dơi uănh an dŏng ta Rơh hop dja lah ntŭk nsing tâm di khlay gay Chính phủ, ăp n’gâng kan bah lơ, bah n’gor an ƀư nău kan tâm ăp khay kêng dŭt năm 2026, nsrôih ƀư tât rnoh hun hao 2 mbrô n’hanh ăp rnoh tât hun hao lvang năm 2026 - 2030.

He mbra dơi lah, ntơm bah ntŭk tâm nchră tât nău rêh lah du njăr trong tâm rhot bar ding. Cử tri njuăl nău lah bah he tât Quốc hội; Quốc hội nđơn mbơh tay ăp nău ŭch rŏng mpŏng geh tâm di nê jêng n’glêh an trong kơl; n’hanh nău rêh nơm lah ntŭk nklân năl săk tam bah ăp trong n’glêh an nê. Rnôk trong ndăch nê dơi mât dŏng mbluh soih, tâm boh đah Quốc hội n’hanh cử tri mbra mô n’glĕ ta nău ntơh măt, ma jêng nău ndrel hăn, groi nđôi n’hanh ndrel nta trong dơh hun hao./.