Năm nti mhe 2026 - 2027, n'gâng kan ntĭm nti n'hanh ntĭm nti n'gor Lâm Đồng nchrăp ndơ̆ lăp dŏng 250 jrô nti, tâm nĕ geh 200 jrô nti bộ môn n'hanh 50 ngih âk nău kan. Ndrel đah nĕ lah ăp ndơ dŏng kơl an, ntŭk pâl rlưn, ntŭk tiăr nti n'hanh ntŭk rhŏ dŏng nău rêh, rgop ăp njoat ƀư lôch uĕh ntŭk ntĭm nti, tŏng đah nău ŭch geh nti bâh kon hoc.

Ndrel đah ntuh kơl ntŭk ntô ndơ dŏng n'hanh ndơ ntrŭp dŏng, nău mât đăp mpăn ndrôm sam ƀŭt giáo khoa an kon hŏk, lơn lah kon hŏk ta nkual jêr jŏt dơi ntrŏng lah nău kan rgum tơm bah năp năm nti mhe. Ta năp măt Sở Giáo dục n'hanh Đào tạo Lâm Đồng lĕ dăn đă pă an rlău 49.7 rmen prăk gay rvăt ndrôm sam ƀŭt giáo khoa rơh 1 an kon hŏk ta ăp ngih sam ƀŭt nội trú, bán trú; kon hŏk ta 5 xă n'har bri, Đặc khu Phú Quý n'hanh ăp xă dŭt jêr jŏt.

Ta ăp ntŭk ntĭm nti, nău hun hao ndrôm sam ƀŭt dŏng nsum, thư viện sam ƀŭt giáo khoa, rgŏ jă ntrong leo pă n'hanh tâm rgâl sam ƀŭt đah ăp jrô nti tay dơi ntrôl dăng. Ăp ngih sam ƀŭt an lor ntop kơl kon hŏk rnoi mpôl đê̆, kon hŏk mpeh rnăk ach o, dăch kêng ach o, kon hŏk quet nte, kon hŏk kon đơi, bah nĕ rgop đăp mpăn lĕ rngôch kon hŏk geh tŏng ăp sam ƀŭt giáo khoa gay nti, mô an jêr jŏt mpeh wăng sa jêng nking n'gang tât ngih sam ƀŭt. Wa Nguyễn Văn Quang, Groi Kruanh UBND xă Đam Rông 4, n'gor Lâm Đồng, an gĭt, trong kan nchrăp năm nti mhe bah xă lĕ jêh, nchrăp wơt rlău 4.300 kon hŏk tât ngih sam ƀŭt: “Ntŭk ntô ndơ dŏng ngih sam ƀŭt ma ơm, khuch ri mpôl hên lĕ nchrăp prăk an nkra. Ăp ndơ dŏng ntĭm nti, ndơ dŏng nti ma mô tŏng ri mpôl hên lĕ uănh nđôi n'hanh an rvăt năp. Tât aƀaơ bôk năp lah nsưng mpan, jâng gung, ngih sam ƀŭt, jrô nti n'hanh kơp lĕ ma sam ƀŭt giáo khoa ăp ngih sam ƀŭt bah Đam Rông 4 lĕ nchrăp da dê. Nău săch kon hŏk đăp mpăn 100% ăp kon se tâm năm hăn nti dơi tât ngih sam ƀŭt. Mpôl hên nsrôih mât uănh uĕh ngăn đah ăp kon se lah kon hŏk mpeh rnăk ach o, rnăk jêr jŏt n'hanh ƀon lan rnoi mpôl đêt đŏng.”