Puăn nuĭh dơi ntăm n’hao lah: Lê Văn Đông, Đào Thịnh Cường, Trần Thế Kính n’hanh Nguyễn Đức Bằng. Aơ lah săk ntơ tư pháp dŭt têh tâm rêng ngạch Kiểm sát viên bah n’gâng kan Kiểm sát.

Lah ta rơh lễ, Tổng Bí thư, Kruanh dak Tô Lâm mbah rhơn ăp nuĭh dơi ntăm n’hao, nkre lah rjăp aơ lah nău rhơn n’hao têh n’hanh lah nău mbăk kan jâk bah năp Đảng, Ngih dak, Ƀon lan, Hiến pháp n’hanh pháp luật. Tổng Bí thư, Kruanh dak đă ăp Kiểm sát viên n’hao nău săk blău tĭng ƀư nău dơi kan công tố, kiểm sát nău kan tư pháp; sŏk geh nău nsing nơm, di pháp luật, tâm ban n’hanh di ngăn bah tĭng n’glêh an ƀư mâng weh. Nkre, ân njrăng bah geh ntôn dơm nuĭh mô geh nău tih, lăn nuĭh tih; mô ƀoi nhŭp ăp nău tih tâm pit drăp ndơ, wăng sa n’hanh mô an nde nău geh mpôl, lăp rglah tih pháp luật ƀư chrai nău way rnâng kan.