Năm 2025 dơi geh uănh lah du năm geh nău mhe bâh n’gor Gia Lai tâm nău mât uănh, mbơh tơih ăp nău kơl an mpeh nău rêh jêng đăp mpăn đah ƀon lan rnoi đê̆. Nău ntoh lư lah bôk nău kan jut jăng ngih rông mpông sat đah rlău 12 rbăn ngih jay geh ƀư mhe n’hanh nkra mhe, ntop kơl an ăp rnăk ach o, dăch ach o n’hanh rnăk dơi kơl geh njoat đăp mpăn hun hao ntŭk gŭ, đăp mpăn pah kan jan sa. Ndrel đah nĕ, rnoh khlăy ăp ntil ndơ tuch tăm tơm bâh ta ntŭk kơt lah cao su, điêù, tiu, cà phê, sầu riêng geh mât ta rnoh âk, njêng nău geh đăp mpăn, rgâl mhe na nê̆ nău rêh bâh nuĭh ƀon lan. Ngăn lah, nău mbơh tơih ƀư trong têh Quy Nhơn - Pleiku lĕ pơk du trong mhe geh âk nău knơm mhe mpeh nău tâm rgop trong hăn, geh âk nău ntuh kơl n’hanh njêng nău hun hao wăng sa- rêh jêng nâp nâl an n’gor tâm let năp tay. Ta năp ăp nău rgâl mhe ueh aơ, wa Khiêm, ta thôn Dôr 1, xã Đăk Đoa, n’gor Gia Lai rhơn nkoch.“ trong têh hăn bâh Pleiku- Quy Nhơn hăn let nkual Glar n’hanh âk mir ba ƀon lan tâm rnoh ntrơn ntŭk gŭ. ƀon lan rhơhn, đăp măn ma pah kan gay ma geh nău geh an rnăk vâl, ƀư tĭng ăp nău ntrŭnh bâh Đảng, ngih dak. Đah nău kan 134, jut jăng ngih rông mpông sat ngih dak lĕ geh ƀư lôch, ƀon lan knơm n’hanh lah ueh Đảng, ngih dak lĕ mât uănh, nta nău dơh nơih an ăp nuĭh geh nău rêh đăp mpăn, đăp mpăn pah kan jan sa hun hao”.

Ăp năm dăch aơ, nău ntuh ƀư trong hăn, kơl kĩ thuật pah kan jan sa, ndrel đah ntŭk tăch rgâl ăp nar lơ ma pơk hvi lĕ nta nău dơh nơih gay ma ƀon lan đăp mpăn đah mir ba. Mô dơn mât kơl an hun hao wăng sa, rêh jêng, ƀon lan hôm nha geh uănh khlăy mât rbăy nău ueh êng, nău tâm rnglăp rdâk njêng ƀon lan đăp mpăn.

Ta xã Đức An, n’gor Lâm Đồng, yan pe lêh geh âk kơl an âk rnăk nsĭt tay nău geh mbơm ntgăn, geh ndơ ma mât kơl an nău rêh, vơt năm mhe tâm nău đăp mpăn, nđơr rhơn. Wa Điêủ Kêu, nuĭh geh knơm ta ƀon Njranglu, xã Đức An an gĭt. Năm 2026, ƀon lan an nsrôih pah kan jan sa an nău rêh ăp nar lơ ma hơm răm đăp mpăn.“Rnoh khlăy ăp ntil ndơ tăm kơt cà phê, sầu riêng năm aơ hôm nha khlăy, geh rnoh đăp mpăn. Nău geh an ƀon lan âk đŏng, ƀon lan rhơn vơt năm mhe. Tât năm mhe ƀon lan geh tay nău nsrôih gay ma đăp mpăn pah kan jan sa, hun hao nău kan”.

Lôch nglăp nsum, xã Đăk Ui, nkual mpeh nhâp nar n’gor Quảng Ngãi (ntơm nơh lah 2 xã Đăk Ngọk n’hanh Đăk Ui, nkuăl Đăk Hà, n’gor Kon Tum)- dôl geh lăp du njăr trong hun hao mhe. Aƀaơ xã ghe klâp ma 12 rbăn nuh, ƀon lan rnoi đê̆ geh rlău 60%, dŭt âk lah nuĭh Xê Đăng. Mô dơn âk nău ueh êng, Đăk Ui hôm nha lah nkual neh geh nău way ơm cách mạng têh dăng. Ta ăp rơh tâm lơh tâm su, ta aơ tă lah ntŭk pah kan, mât rong, mpôn cán bộ, tâm rgop soan nuĭh, drăp ndơ an  cách mạng.

Ƀon lan kan lŏ mir- mât tăm bri lah nău jrŏng tơm ta Đăk Ui đah ăp ntil tơm tăm kơt cà phê, cao su, bum blang, ba lŏ...Năm mhe nơh nău geh du hê nuĭh geh bơi tât 60 rkeh prăk, nău rêh ƀon lan đăp mpăn, rnoh rnăk ach o lĕ huch âk, rnoh rnăk sâm geh lơ ma hao . Lôch geh pă dăp ntŭk kan hành chính, Đăk Ui ntơm ndâk nsơm nău way ơm cách mạng, rgum lĕ rnoh nuĭh kan, mpŏng tât hun hao nâp nâl. Yuh Y Thu, ta thôn Đăk Kơ Đêm, ŭch rŏng.“Tâm năm 2026, Đại hội đại biêủ lam dak tal 14 bâh Đảng, n’gâng kan 2 gưl mbra geh leo neh dak lăp ta rơh hun hao lĕ rngôch, ngăch doh rklaih  ăp nău jêr jŏt an neh dak, an ta ntŭk. Ngăn lah, rnôk ƀư ăp ntil săm ƀŭt đah ƀon lan geh nău kan ueh tâm di, ngăch ndăn. Gâp ŭch xã, n’gor pah kan an dơh nơih lơn, nta ăp nău kan gay ma ƀon lan dơi geh ƀư âk ntil ndơ, ndơ kan ăp nar lơ ma ueh lơn, rnoh geh khlăy, kơl an ƀon lan n’hao nău geh, đăp mpăn nău rêh jêng”.

 Năm 2025 mhe nơh,. ndrel đah nău pă dăp tay trong kan n’gâng kan ta ntŭk 2 gưl, ngih dak lĕ geh ƀư dơi nău kan jut jăng ngih truh sat.Âk rnăk geh vơt năm mhe tâm ngih têh ueh, răm. Wa Ksor Beo nuĭh Jarai, nuĭh geh nău knơm ta xã Ia Grai, n’gor Gia Lai an gĭt, bâh geh mât kơl bâh Đảng, ngih dak, ƀon lan lĕ mô hôm geh rnăk rêh tâm ăp ngih jay truh sat,nău rêh bâh ƀon lan lĕ geh njoat rgâl mhe. Wa mpơl nău ŭch rŏng.Lah ueh Đảng, ngih dak lĕ geh ăp nău kơl an ƀon lan, tâm nĕ, kơl an ăp rnăk ach o, rnăk jêr jŏt gay ma ƀư ngih jay, ƀư ntŭk gŭ, nkra ngih jay an ƀon lan rnăk ach o, dăch ach o tâm ba năp nơh lĕ geh kơl an ƀon lan rgâl mhe, đăp mpăn nău rêh jêng. Kơt ta ƀon Blang Yang mpôl hên, ăp rnăk ach o, mô tŏng ndơ lĕ geh kơl an ngăch tâm di. Năm mhe tât knơm Ngih dak an geh kơl tay an ƀon lan tâm nău uănh săm nău ji mô sŏk prăk an ƀon lan, mô sŏk prăk nti an oh kon hoc rnoi đê̆.

Năm 2025, pâl nđaih ntŭk rêh jêng ta ƀon Tring, phường Buôn Hồ, n’gor Đăk Lăk lĕ geh mât kơl ntuh kơl bâh âk bôk nău kan, nău nchrăp kan bâh Ngih dak. Tât aƀaơ, buôn Tring lĕ geh njêng rnâng kan mât uănh pâl nđaih ntŭk rêh jêng. Rdâk njêng nău kan leo kan tâm di, leo ƀư nti nău dơi leo pâl nđaih, ntĭm nti mpôl njroh mprơ tŭr chĭng goh gong, kơl an rdâk njêng website, trang mạng xã hôị, nkre lah tâm rgop đah ăp ntŭk kan leo pâl nđaih tâm n’hanh bah dih n’gor gay ma mbơh tơih, mbơh ntil ndơ pâl nđaih.

Tĭng nău mbơh bâh wa H Nưn Mlô, kruanh rmôt leo pâl nđaih ntŭk rêh jêng ƀon Tring, tâm năm mhe 2026 aơ, ƀon lan  mbra geh dơn ăp nău nti kan mpeh lơ ƀư mbơh pla n’hơ nău kan way ơm, rdâk njêng bôk nău kan văn nghệ dân gian geh nău mpơl tâm ntŭk rêh jêng, bâh nĕ nkre njêng ndơ pâl nđaih ntoh lư, nkre ntop mât rbăy, trĕ lam nău ueh êng bâh ƀon lan ta ntŭk. Wa H Nưn Mlô an gĭt.“Gâp lĕ kuăl jă, rgŏ jă oh yuh mpeh nău tât tay mbra tât râng nti tay gay a geh dơi gĭt vât njroh mprơ ăp nău ueh êng way ơm kơt ei rei, kưt, khan...nsrôih nti mbra geh rơh ƀư du măng njroh mprơ dŭt ueh, jă lĕ rngôch oh yuh, ƀon lan tâm bon tât râng, djăt uănh”.

Năm mhe nơh, bu ur K’Ho Ka Thuân, ta xã Hoà Ninh, n’gor Lâm Đồng, lĕ geh rdâk njêng nău ntơ ndơ tanh cheh Ka Thuan Minz, ntop ndơ̆ ndơ nsoh way ơm bâh nuĭh K’Ho tât dăch lơn đah ƀon lan. Bâh nău kan kachoh kho ao, Ka Thuân gĭt tâm rgop đah kĩ thuật mhe gay ma njêng ăp ntil ndơ tâm di đah nău ŭch bâh ƀon lan, nkre lah mbơh tơih, tăch ndơ bâh mạng xã hôị, pơk hvi ntŭk tăch ndơ tât âk ntŭk kơt lah Bảo Lộc, Bảo Lâm. nău kan aơ mô dơn ntop mât rbăy nău ueh văn hoá K’Ho ma hôm nha kơl tăch rvăt ndơ tanh cheh, njêng nău geh an ƀon lan ta ntŭk.

Nău mĭn njêng kan “Nsĭt tay nău geh tât an ăp nuĭh” bâh Ka Thuân lĕ geh giaỉ Nhì rơh tâm rlong ntơm njêng nău kan rgâl mhe mĭn kan ta n’gor Lâm Đồng năm 2024. Nkoch mpeh trong mpŏng kan tâm let năp tay, Ka Thuân ŭch an geh hun hao tay nău ntơ, ndơ̆ ndơ tanh cheh bâh nuĭh K’Ho tât đah âk nuĭh lơn, bâh nĕ ntop njêng nău geh, kơl an ƀon lan dăch bên n’hanh mât nău kan way ơm. “Năm mới 2026, gâp ŭch nsĭt tât ăp ntil ndơ ueh ơm bâh ƀon lan nơm gay ma hun hao wăng sa rnăk vâl lor, lôch nĕ ŭch nsĭt tât ăp ntil ndơ pla n’hơ aơ pla n’hơ ta n’gor gay ma ŭch n’gâng kan ta n’gor Lâm Đồng mât uănh tât ntŭk ka choh ndơ bâh nuĭh K’Ho aơ, kơl an ntuh kơl mpeh ăp ntil ndơ máy mok gay ma ăp băl mom, ăp mê̆ ăp u tâm ƀon ndrel ƀư kan đah he”.

 Ta bon Bu Ndoh, xã Nhân Cơ, n’gor Lâm Đồng, ƀon lan dŭt rhơn rnôk ma ndơ dŏng ntung trong geh ƀư nâp ueh, pah kan tuch tăm ăp nar lơ ma geh săk rnglăy đah ăp ntil tơm công nghiệp geh rnoh khlăy kơt cà phê, tiu, sầu riêng. năm mhe nơh, ăp ntil tơm tăm aơ lĕ an nău geh ueh, njêng nău kan nâp nâl gay ma ƀon lan đăp mpăn pah kan jan sa.

Wa Thị Oanh, rnoi Bunong, nuĭh geh nău knơm ta ƀon Bu Ndoh, xã Nhân Cơ nkoch, ăp nău rgâl mhe ueh nĕ dôl geh ntop tay nău knơm, nău nsrôih gay ma ƀon lan lăp năm mhe đah nău nđơr n’hanh nău knơm, mpŏng tât nău rêh ăp nar lơ ma đăp mpăn, ueh lăng n’hanh nâp nâl.“Nău rêh bâh ƀon lan aƀaơ lĕ geh hun hao âk ngăn, ndơ dŏng ntung trong, điện ngih nti lĕ tât ta ƀon. Đah nău kan lah cán bộ bu ur, ƀư nău kan mặt trận rĭ gâp dôl geh rgŏ jă ƀon lan kơt nti, gĭt nău kan khoa học, kĩ thuật dŏng tâm nău pah kan jan sa gay ma nău wăng sa lơ ma hun hao lơn”.

Wa Rmah Le (rnoi Jarai, ƀon Kte xã Ia Hrú, n’gor Gia Lai an gĭt, năm mhe nơh trôk nar mô geh dơh nơih rnôk ma geh mih dak buk geh mbro, yơn dŭt lap lah rnăk vâl wa hôm nha geh nău geh bâh rgâl tơm tăm. Rnăk vâl wa geh 5ha tơm tao, yan mhe nơh geh klâp ma 420 rkeh prăk. Ndrel đah rnoh prăk ntêm ta năp nĕ, rnăk wa lĕ geh ƀư ngih jay mhe ueh khlăy rlău 1 rmen prăk. Vơt năm mhe tâm jay mhe, wa Rmah Le rhơn nkoch.Ntơm nơh tăm bum, tăm mbo nău geh mô âk, aƀaơ rgâl jêng tăm tao rĭ nău geh âk lơn. Yor nĕ, nău rêh bâh rnăk vâl geh rgâl âk, geh prăk ƀư jay. tât tay, gâp ŭch manh prăk ngân hàng chính sách gay ma dơi an manh neh, pơk hvi rnoh neh tăm tao”.