Tâm trôm ăp nău ƀư bah Lễ hội Cà phê Buôn Ma Thuột rơh tal 9, ôi 11/3 lĕ ƀư rƀŭn nchră “Tăch rgâl lam ntŭr neh-Boăt nthoi, n’hao prêh Cà phê Việt”. Geh rlău 700 nuĭh ntoh măt râng rƀŭn nchră, tâm rnoh aơ geh âk nuĭh ntoh măt lam ntŭr neh tât bah rmôt kan cà phê lam ntŭr neh-ICO, nuĭh tăch rgâl ăp dak: Anh, Đức, Nhật Bản, Mỹ, Úc, Singapore, Hàn Quốc, Trung Quốc, Brazil...

Rƀŭn nchră rgum tâm nchră ăp nkô̆ nkô̆ nău jru mpeh nău kan cà phê, kơt: Nu nău ntŭk tăch cà phê lam ntŭr neh, trong way dŏng cà phê; Ăp nău tâm di đah nkual tăm cà phê... Ndrel đah nĕ, ăp nuĭh ntoh măt tâm nchrăp mpeh nău ƀư tơm doanh nghiệp tâm nău n’hao prêh cà phê lam ntŭr neh; Nu nău tăch n’gluh cà phê,  mĭn uănh trong ntŭk tăch n’hanh mpêr n’gar dŏng cà phê lam ntŭr neh aƀaơ hin, nchrŏng trong ntŭk tăch an nău kan ndơ cà phê Việt Nam.