Kêng măng 11/3, ta nâm nău ƀư tơm bah Bí thư Đảng uỷ, Thủ tướng Chính phủ Phạm Minh Chính, Ban Thường vụ Đảng uỷ Chính phủ hŏ rgum hop mpeh Đề án dăp rgum tay nhih pah kan ăp gưl n’hanh rdâk njêng trong ntĭt leo ƀư n’gâng kan tâm dâng 2 gưl.

Thủ tướng Chính phủ Phạm Minh Chính rnê âk, nchih nkah ăp nău rgop lĕ nuih n’hâm, dơn kan, nău gĭt blău bah ăp Uỷ viên Ban Thường vụ; đă Bộ Nội vụ djăt nău rgop ƀư wat jêh Đề án gay rblang dăn nău rgop Bộ Chính trị. Thủ tướng lah rjăp, nău  dăp rgum nhih pah kan, nkre đah dăp rgum nhih pah kan glêh tam, dăng, yach ngăch, geh nău tam, dơi Đảng, Ngih dak rgum tĭng ƀư n’hanh dơi geh nău tâm ban ŭch âk. Nău dăp rgum nhih pah kan gay njêng ntŭk soih aih hun hao; ntik n’hao săk geh, dơh uĕh, nsan dăng tâm rlong bah ăp n’gor tâm di đah nău hun hao aƀaơ; mpư n’hao nuih n’hâm ƀư tơm êng, nsrôih ndôr êng bah ăp gưl n’gâng kan tâm dâng; lơn lah gay an n’gâng kan dăch dêh đah ƀon lan lơn, grêt dăch ƀon lan  lơn, nkra nău kan bah nuĭh ƀon  lan ngăch lơn, dơh soih lơn, nsĭt tay nău rhơn răm an ƀon lan âk lơn.