Ôi 20/4, ta Ngih sam ƀŭt Đại học Sư Phạm Kỹ thuật nkual ƀon têh Hồ Chí Minh, Thủ tướng Phạm Minh Chính râng Nar rgum ntơm ndâk njêng nău kan Ngih dak rơh tal 7. Nău ƀư wăch rgum hang rbăn kon hŏk, sinh viên, nai ntĭm, nuĭh ntuh kơl, nuĭh way kan. Thủ tướng nkoch ntô̆ n’hao rnôk geh 42.000 nău nchrăp ƀư ntơm ndâk njêng nău kan luh bah kon hŏk, sinh viên, âk nău nchrăp ƀư lĕ jêng doanh nghiệp lôch uĕh, kơt dŏng công nghệ tâm lŏ mir kloh uĕh, dak si, rgâl mrô.

Thủ tướng mĭn lah, trong ndơ ntơm ndâk njêng nău kan geh jŏ jong, đă lôch jêh trong ƀư nău kơl, lơn lah mpeh prăk kaih, dŏng nău mĭn bôk rngok; hun hao prăk nkrem ntop kơl sinh viên bah tơm prăk kon nuĭh tâm rgop. Thủ tướng mpŏng rơh druh ndăm-luh tâm rnôk mrô-mbra rgop ƀư tơm khlay an hun hao khoa học công nghệ, rgâl mhe mĭn ƀư n’hanh rgâl mrô lam dak, rgop ndơ̆ Việt Nam hun hao ngăch n’hanh nâp nâl.