Ôi 11/3, ta Ngih Quốc hội ta Thủ đô Indonesia, Tổng Bí thư Tô Lâm lĕ rgum nchră đah Kruanh hội đồng Hiệp thương Nhân dân Indonesia, Ahmad Muzani. 2 Kruanh nkoch nău răm rhơn mpeh hun hao têh dăng, nar lơ hăn jru hvi, ngăn ngên n’hanh săk rnglăy, n’ăp tâm trôm ăp ding n’hanh âk trong, đah Quốc hội Việt Nam n’hanh Hội đồng Hiệp thương Nhân dân Indonesia;

mĭn lah tâm boh đah 2 Ngih pah kan ndâk njêng pháp luật du nău khlay lĕ rngôch tâm boh uĕh an nău hun hao tâm boh dăch dêh, kan ndrel âk ntil n’hanh kan ndrel têh lĕ rngôch Việt Nam-Indonesia, tă bah nău ndâk njêng n’hanh an ăp sam ƀŭt pháp luật, jêng ăp trong ƀư, nău kơl tâm di, dơh an mbơh ƀư kan ndrel ta ăp ntil nău, ngăn lah wăng sa, tăch rgâl n’hanh ntuh kơl đah 2 dak. Kruanh Ahmad Muzani mĭn lah Indonesia uănh khlay tâm boh đah Việt Nam, yor nău geh bah nuĭh ƀon lan 2 dak, yor đăp mpăn, kan ndrel, hun hao tâm nkual n’hanh lam ntŭr neh.