Đah bu ndăm Jarai âk nău blău Rơ Châm Blinh, ta xã Ia Phí, n’gor Gia Lai, blău njêng mhe jêng du gâl mô dơi lah mô geh tâm nău rêh. Lôch nti ngành hội họa, yơn nô jêng geh nău dơi tâm trong kan âm nhạc đah ăp nău mprơ rblang ma bar ntil nău ngơi Jarai – Việt nsĭt ring lam Tây Nguyên, rêng lam âk ta trôm mạng. Geh bâr mprơ khar mha êng, dăng ndrel trong nchreng an uănh săk tơm bri neh têh hvi, ăp video “triệu View” bah Rơ Châm Blinh nsĭt tât an âk nuĭh djăt nău mhe. Ma âm nhạc, nô ŭch rŏng mât ndray, ntik n’hao săk tơm văn hóa rnoi nuĭh he. Tĭng Năm pâl nđaih gưl neh dak Gia Lai 2026, nô geh giải nhất Rơh tâm rlong video pâl nđaih Gia Lai 2026 đah nkô̆ “Ăp nuĭh ƀon lan Gia Lai lah du hê ntơh măt mbơh nkoch an pâl nđaih”. Ta Tâm nchră KOL n’gor Gia Lai 2026, ƀư nar 11/9, Rơ Châm Blinh nkoch:

"Gâp dŭt rhơn n’hao dơi Công an n’gor Gia Lai jă râng Tâm nchră KOL Gia Lai 2026. Ta aơ, gâp geh rnôk tâm mâp n’hanh tâm nđŭr đah âk yuh nô blău njêng mhe nkoch trêng nău lư tât bah Quy Nhơn tâm ban kơt ăp ntŭk êng ƀa ƀă đŏng. Aơ lah rnôk dŭt uĕh gay mpôl blău njêng mhe nkô̆ nău nkoch ndrel tâm kơt nti, buăt nthoi n’hanh nkơnh n’hơ rup gui ƀon tơm. Săk gâp nơm way ŭch rŏng ăp nuĭh blău ƀư njêng mhe nkô̆ nău nkoch rêng mbra nsrôih nkoch mbơh âk lơn đŏng mpeh rup uĕh văn hóa, nău way ơm n’hanh ăp lễ hội săk ntơr êng bah nkual neh dja."

Ma ăp video ngăn ăp nar, yuh Rah Lan H’Wĩ, ta thôn Kte Lớn A, xã Phú Thiện, n’gor Gia Lai, dôl rgop rêng lam săk ntơr văn hóa Jarai ta trôm mạng. Lôch nti Nhih nti Đại học Thể dục Thể thao Đà Nẵng, H’Wĩ geh nău way blău tăch rgâl online ta TikTok n’hanh Facebook. Ăp video mpeh văn hóa way ơm dơi yuh rhôp ta ƀon lan n’hanh tâm rnăk wâl he nơm dĭl hŏ wăch rgum hang rkeh tơ̆ nuĭh uănh. Ntơm bah nău way ôp brah wơt bôk n’hao săk, khôm bôk khôm tôr, ôp kuăl huêng tât ăp ndơ sa way bên kơt lha bum blang wâr, ka nklâm lha prit, blân tăng juh..., H’Wĩ nkoch văn hóa Jarai tât đah nuĭh uănh ma ăp rup gui dăch dêh. Mhe aơ, video rhôp tay rup mê̆ n’gon ndrănh yăng Jarai way ơm dơn geh tay nău uănh khlay bah mpôl tâm trôm mạng. Đah H’Wĩ, blău njêng mhe nkô̆ nkoch trêng nkre lah joi geh trong rêh, nkre lah trong ƀư rêng lam văn hóa ƀon tơm.

“Gâp ƀư nkô̆ nău nkoch ta TikTok, lơn âk nkoch mpeh njăr trong hăn joi prăk gay rdâk njêng du mblâm jay an me bơ̆. Ăp nkô̆ nê dơn geh nău uănh khlay, tĭng groi nđôi n’hanh n’grŏ tĭng bah dŭt âk nuĭh. Dơi râng Tâm nchră KOL n’gor Gia Lai lah du nău rhơn n’hanh lah suan ntrôl dŭt têh đah gâp. Ta njăr trong hăn  ƀư nkô̆ nkoch trêng, gâp way lah uĕh ăp nuĭh hŏ dêh rŏng, n’grŏ tĭng n’hanh ndrel hăn bah he. Nơm geh nău mât uănh khlay bah ăp nuĭh ma gâp mơ geh kơt nar aơ. Lôch tâm nchră dja, gâp ŭch rŏng rgop du gâl jê̆ n’hâm suan bah he gay nkơnh n’hơ, rêng lam ăp rup gui ta ntŭk he”.

Mô dơn ăp druh mom ƀư nkô̆ nău nkoch mpeh văn hóa, nău rêh, mpôl Công an dôl ndăn dŏng mạng xã hội gay nkoch rup gui dăch dêh, ngăn ngăn tât đah nuĭh ƀon lan đŏng. Thiếu tá Lại Văn Đạt, cán bộ Tổ An ninh, Công an xã Phú Thiện, lah ngoăy tâm ăp KOL bah n’gor Gia Lai dơi ăp nuĭh ta mạng gĭt tât đah trong ntĭt leo ƀư “Công an sĭt ƀon”. Tâm rnôk pah kan, mâp đah kônh wa, nô kơt nti êng nău ngơi Jarai gay trêng nti pháp luật ma nău ngơi rnoi mpôl đê̆; nkre rgŏ jă kơl an 500 katap an kon se nti jêr jŏt lor rnôk lăp tâm năm nti mhe. Ăp rup gui bah tâm dâng dơi Thiếu tá Lại Văn Đạt rhôp tay, nkoch mbơh ta mạng xã hội đah nkô̆ ngăn ngăn, wăch rgum hang rmưn nuĭh uănh. Tĭng nô, nău nti êng nău ngơi Jarai, wât văn hóa bah kônh wa kơl pah kan nkoch trêng, rgŏ jă dăch ƀon lan n’hanh geh nău tam lơn.

“Rnôk gâp kơt nti êng n’hanh gĭt nău ngơi rnoi mpôl đê̆ lah nuĭh Jarai ri tâm pah kan saơ dơh lơn, dăch dêh lơn jêng wât dơi nău ŭch rŏng mpŏng geh bah kônh wa ƀon lan. Ntơm bah nê gâp geh trong pah kan, nkoch trêng rgŏ jă grêt dêh đah ngăn ngăn, jêng dơi nuĭh ƀon lan rhơn răm n’grŏ tĭng rnôk mpôl hên ƀư nkoch trêng ma nău ngơi Jarai tâm ban kơt nău kơl bah ƀon lan”.

Tâm nchră KOL n’gor Gia Lai năm 2026, đah nkô̆ “Đại ngàn chạm biển xanh - Lan tỏa niềm tin số”, dơi ƀư tâm trôm Năm Pâl nđaih gưl neh dak 2026, gay buăt nthoi nsum mpôl, nkoch nău tă ơm gĭt kan n’hanh ndrel nkơnh n’hơ văn hóa, pâl nđaih, kon nuĭh Gia Lai. Nê lah rơh mâp bah ăp njônh uănh, ăp nău nkoch n’hanh ăp kon nuĭh dôl tĭng nar dŏng nău ring tam bah he gay rêng lam nău lư ngăn ngăn. Bah nê, rdâk njêng du ntŭk gŭ rêh keh mbrô đăp mpăn, rsang rnglay n’hanh dŭt nsing nơm.