Lôch ntơm ƀư rêng nău kan ntrŭt ntrôl ngăch pâl nđaih năm 2026 đah nkô̆ “Dak Lak – Sĭt mpeh drăp ndơ ơm yău ntlơi an tay”, du păng rup n’grêh rêh, âk săk ntơr hŏ mbrơi ntoh ta me neh dja – ntŭk bri dak Tây Nguyên têh hvi rlai lăp ndrel dak lêng trôk nar duyên hải. Bah tâm râp nău rêh văn hóa way ơm tât ăp rlong saơ uĕh mhe, lĕ rngôch dôl njêng suan rhôp êng geh da dê, ndơ̆ Dak Lak jêng ntŭk tât lăp uĕh, nkah nkơnh njăr trong hăn uănh saơ ƀư an nuih n’hâm năch tâm n’hanh bah dih dak nđơr.

Lôch n’glăp nsum, N’gor Dak Lak geh du ntŭk pâl nđaih mha êng – ntŭk bri neh têh hvi Tây Nguyên mâp trôk dak lêng duyên hải. Tâm nê, bri neh Tây Nguyên lah nău ntĭt bah suan rêh wên jong, luh rsang rnglay tâng jru bah văn hóa way ơm ăp rnoi mpôl đê̆, ri nkual duyên hải mpeh luh nar lah nău khuh n’gôr, rlai lăp bah dak lêng. Dŭt njrăng uănh khlay, bah bri neh têh hvi jŭr duyên hải bah Dak Lak nsum du jâng nsing me neh yôk ŭnh-bazan uĕh êng, rlai lăp ntŭk văn hóa chĭng gong n’hanh Bài chòi Nam Trung bộ. Tâm bah ri aơ nơh, ta Dak Lak hŏ ƀư âk nău kan pâl nđaih kơt: leo ƀư mpôl famtrip hăn uănh năl ntŭk pâl nđaih ndrel mpôl way leo hăn pâl jong nar, báo chí, KOLs, KOCs; Tâm nchră uănh năl lôch jêh du njăr trong hăn pâl nđaih “Dak Lak – Sĭt mpeh drăp ndơ ơm yău ntlơi an tay”, ƀư Hội chợ tăch rgâl- pâl nđaih, OCOP & ndơ kah khaly ta ntŭk; Âm nhạc – DJ – ka ƀlir rhŏ dŏng năch...

Wa Lê Phúc Long, Groi Giám đốc Sở Văn hóa, Thể thao n’hanh pâl nđaih Dak Lak mbơh lư:

"Năch pâl nđaih rnôk hăn tât Dak Lak mpeh nhâp nar ri ntrŏng mbra rlong saơ văn hóa chĭng gong n’hanh mpôl hên mbra geh ăp ndơ ƀư pâl nđaih rlong uănh saơ kơt tŏ kông, tŭr chĭng goh gong, rlong uănh saơ chraih chĭng. Hôm đah mpeh luh nar geh Bài chòi ri he mbra rdâk njêng ăp tour Bài chòi. Kơt nê ri he mbra an năch rlong uănh saơ, dơi mprơ, dơi nsoh ndơ way ơm; dŏng ăp ndơ uh goh way ơm bah ƀon lan, ntơm bah nê mbra lăp măt uănh an năch”

Ntơm bah pơk bôk năp ntơm pơk ăp nău kan pâl nđaih n’gor Dak Lak năm 2026,  nuĭh ƀon lan n’hanh năch hŏ dơi n’glăp săk he tâm măng njroh mprơ săk ntơr êng. Wa Cao Hữu Nhạc ta phường Tuy Hòa, n’gor Dak Lak mpơl nău nsing nơm mpeh nău mpŏng hun hao pâl nđaih ta n’gor.     

"Dŭt di nuih n’hâm mpeh du rêng njroh mprơ rloh rlău bah Tây Nguyên têh hvi tât nkual duyên hải, lah tât du ntil rnôk n’glăp nsum ri păng geh ăp nău dơh uĕh êng. Aơ lah rnôk pơk luh, buăt nthoi đah ăp nkual ma nău mha êng lah buăt nthoi đah Tây Nguyên mpeh Duyên hải, mbra lah du nău dơh an nău hun hao pâl nđaih."

Tĭng Sở Văn hóa, Thể thao n’hanh pâl nđaih Dak Lak, lôch rnôk pơk hvi ntŭk hun hao, pâl nđaih ta ntŭk geh âk nău dơh geh gay jêng ăp ntŭk tâm nkrêp kan nsum đah nkual bri neh têh hvi n’hanh duyên hải. Aơ lah jâng nsing khlay gay âk ntil ndơ rlong saơ, n’hao dăng tâm rlong bah ntŭk tât. Năm 2025, Dak Lak hŏ wơt rlău 7,3 rkeh tơ̆ năch, hao rlău 31% rđĭl đah ndrel khay dja năm e nơh. Êng quý I/2026, lam n’gor wơt nklăp 2,3 rkeh tơ̆ năch, nsĭt geh pâl nđaih geh rlău 4.100 rmen prăk, mât tay rnoh hun hao uĕh.  

N’gor rƀŏng trong pâl nđaih jêng n’gâng kan wăng sa tơm khlay, tĭng kơn rdâk njêng săk ntơ lư “Dak Lak- Sĭt mpeh drăp ndơ ơm yău ntlơi an tay” jêng ntŭk tât uĕh bah năch tâm n’hanh bah dih dak. bah râp chĭng rngân uĕh ntŭk bri neh têh hvi tât nău mprơ Bài chòi n’gôr gră mpeh duyên hải, păng rup Dak Lak mpơl âk săk ntơr, n’grêh rêh n’hanh wăch âk. Yor nău tâm rlai lăp nê dôl njêng suan lăp măt uănh uĕh êng, kuăl jă năch rlong tât, joi gĭt n’hanh nklân năl ăp tŏng du dor neh săk ntơr, suan rêh dăng.